ବିଜେବି କଲେଜର ଛାତ୍ରୀ ରୁଚିକା ମହାନ୍ତିଙ୍କ ଆତ୍ମହତ୍ୟା ଘଟଣା ମଧ୍ୟ ଏ ର୍ୟାଗିଂ ଯୋଗୁଁ ଘଟିଥିଲା । ଏଥିରେ ସଂପୃକ୍ତ ଅପରାଧି ମାନଙ୍କୁ ସରକାର ଧରିଲେ ନାହିଁ । ଷଡ଼ଯନ୍ତ୍ର କରି ଘଟଣାକୁ ଚାପି ଦେଇଛନ୍ତି । ରୂଚିକାର ମା’କୁ ପୋଲିସ ବିଜେବି କଲେଜ ଗେଟପାଖରୁ ଘୋଷାରି ଘୋଷାରି ନେଇ ଆସିଲା । ଏହି ଅନ୍ୟାୟ ପ୍ରସଙ୍ଗରେ ଯିଏ ପ୍ରତିବାଦ କଲେ ତାଙ୍କ ବିରୋଧରେ କେସ କରିବାପାଇଁ ବିଜୁ ଛାତ୍ର ଜନତା ପକ୍ଷରୁ ବିଜେବି କଲେଜରେ କିଛି ଛାତ୍ରଙ୍କୁ ପ୍ରରୋଚିତ କରାଗଲା । ସବୁଠାରୁ ଚିନ୍ତାର ପ୍ରସଙ୍ଗ ଏହିକିଯେ ବିଜୁ ଛାତ୍ର ଜନତା ଦଳ ବିଭିନ୍ନ ସରକାରୀ ବିଶ୍ୱବିଦ୍ୟାଳୟ ଓ ମହାବିଦ୍ୟାଳୟରେ ଯେଉଁ କ୍ୟାମ୍ପସ କମିଟି ଗଠନ କରିଛନ୍ତି ତାହା ସେଇ ଶିକ୍ଷାନୁଷ୍ଠାନ ମାନଙ୍କରେ ଦୌରାତ୍ମ୍ୟ କରୁଛନ୍ତି ।
କ୍ୟାମ୍ପସରେ ବିଜୁ ଛାତ୍ର ଜନତା ଦଳର ଦାଦାଗିରି ଚାଲିଛି । କିଛି ଅସାମଜିକ ଛାତ୍ରଙ୍କୁ ନେଇ ବିଜୁ ଛାତ୍ର ଜନତା ଦଳ ସବୁଠାରେ କ୍ୟାମ୍ପସ କମିଟି ଗଠନ କରିଛି । କୁହାଯାଇଥିଲା ଶିକ୍ଷାନୁଷ୍ଠାନର ଦୁର୍ନୀତି, ଭ୍ରଷ୍ଟାଚାର, କଲେଜ କର୍ତୃପକ୍ଷଙ୍କ ମନମାନି ଓ ଛାତ୍ରଛାତ୍ରୀ ମାନଙ୍କର ସୁରକ୍ଷାକୁ ନେଇ ବିଜୁ ଛାତ୍ର ଜନତାର କ୍ୟାମ୍ପସ କମିଟି କାର୍ଯ୍ୟ କରିବ । ମାତ୍ର ବିନାୟକ ଆଚାର୍ଯ୍ୟ କଲେଜ ର୍ୟାଗିଂ ଘଟଣାରୁ ଏହା ସ୍ପଷ୍ଟ ଯେ ବିଜୁ ଛାତ୍ର ଜନତାର କ୍ୟାମ୍ପସ କମିଟି କଲେଜ କ୍ୟାମ୍ପସରେ ଆତଙ୍କରାଜ ଚଲାଇଛି । କେବଳ ଶାସକ ଦଳର ବାହୁଛାୟା ତଳେ ରହି ଏମାନେ କ୍ୟାମ୍ପସରେ ର୍ୟାଗିଂ କରୁଛନ୍ତି । ବିନାୟକ ଆଚାର୍ଯ୍ୟ କଲେଜର +୨ ପ୍ରଥମ ବର୍ଷର ଛାତ୍ରୀକୁ କଲେଜ ପରିସରରେ ବିଜୁ ଛାତ୍ର ଜନତା ଦଳ କ୍ୟାମ୍ପସ କମିଟିର ଆବାହକ ଅଭିଶେକ ନାହାକ ନାନାଦି ଅତ୍ୟାଚାର କରିଥିଲେ ।
ସେଠାରେ କଲେଜର ଛାତ୍ରଛାତ୍ରୀମାନେ ଉପସ୍ଥିତ ଥିଲେ ମଧ୍ୟ ଭୟରେ କେହି ବାଧା ଦେଉନଥିଲେ । କାରଣ ଅଭିଶେକ ଥିଲା ଶାସକ ଦଳର ପ୍ରତିନିଧି । ଏଠାରେ ଯେଉଁ ର୍ୟାଗିଂ ଘଟଣା ଏବେ ପଦାକୁ ଆସିଛି ତାହା ଏକମାତ୍ର ଘଟଣା ନୁହେଁ । ପୂର୍ବରୁ ଏହି କଲେଜରେ ଏହିପରି ଘଟଣା ଘଟୁଥିବା ବେଳେ ମଧ୍ୟ କେହି ମୁଁହ ଖୋଲୁନଥିଲେ । ସୁତରାଂ କଲେଜର ଛାତ୍ରୀମାନେ ଏଠାରେ ଏକ ଭୟଙ୍କର ପରିସ୍ଥିତିରେ ପାଠପଢ଼ୁଥିଲେ । ସେହି ଛାତ୍ରୀଙ୍କୁ ଯେଉଁଭଳି ଭାବରେ ଅଭିଶେକଙ୍କ ନିର୍ଦ୍ଦେଶରେ ସଂଘବଦ୍ଧ ଭାବରେ ର୍ୟାଗିଂ କରାଯାଉଥିଲା ତାହା ଅତ୍ୟନ୍ତ ଦୁଃଖଦାୟକ ଘଟଣା । ଅଭିଶେକ ବାରମ୍ବାର କଲେଜ କ୍ୟାମ୍ପସ ଭିତରେ ଏଭଳି କାଣ୍ଡ କଲେ ମଧ୍ୟ ଅଧ୍ୟାପକ, ପ୍ରିନସ୍ପାଲ ବା କଲେଜ କର୍ତୃପକ୍ଷ କୌଣସି ପ୍ରକାର ପଦକ୍ଷେପ ନେଉନଥିଲେ ।
କାରଣ ସ୍ଥାନୀୟ ବିଜେଡ଼ି ନେତା, ପ୍ରଶାସନ ଓ ପୋଲିସ ଠାରୁ ସେ ଅଭୟ ପାଉଥିଲା ଏବଂ ରାଜ୍ୟସାରା ଗଠିତ ବିଜୁ ଛାତ୍ର ଜନତା ଦଳର କ୍ୟାମ୍ପସ କମିଟି ମଧ୍ୟ ସିଧାସଳଖ ଏମାନଙ୍କର ସାହାଯ୍ୟ ପାଉଛନ୍ତି । ତେଣୁ ଏପରି ଘଟଣା ଓଡ଼ିଶାରେ ବିଭିନ୍ନ କଲେଜରେ ଘଟୁଛି । ମାତ୍ର ସରକାରଙ୍କ ଆଂଟି ର୍ୟାଗିଂ ଓ ଶୃଙ୍ଖଳା କମିଟି ସଶକ୍ତ ନୁହେଁ । କାରଣ ଅଧିକାଂଶ ର୍ୟାଗିଂ ଘଟଣାରେ ବିିିଜୁ ଛାତ୍ର ଜନତା ଦଳର ସଭ୍ୟମାନେ ଓ ପ୍ରତିନିଧିମାନେ ସଂପୃକ୍ତ । ସରକାର ତୁରନ୍ତ ପ୍ରତି କଲେଜରେ ଆଂଟିର୍ୟାଗିଂ ଓ ଶୃଙ୍ଖଳା କମିଟିକୁ ସଶକ୍ତ କରିବା ସହ ଏହାକୁ ମନିଟର କରିବାପାଇଁ ଉପଯୁକ୍ତ ବ୍ୟବସ୍ଥା କରନ୍ତୁ । ର୍ୟାଗିଂ ଉପରେ ସରକାରଙ୍କ ସର୍ତକ ନଜର ରହୁ । ବିଜୁ ଛାତ୍ର ଜନତା ଦଳର କ୍ୟାମ୍ପସ କମିଟି ଅବୈଧ ଘୋଷଣା କରାଯାଉ । କାରଣ କଲେଜର ପରିସରକୁ ଏହି ଛାତ୍ର ଅନୁଷ୍ଠାନ ଅସ୍ଥିର ଓ ଅଶାନ୍ତ କରୁଛି ।
ର୍ୟାଗିଂକୁ ରୋକିବା ପାଇଁ ଦେଶରେ ୭ଟି ରାଜ୍ୟ ତଥା ମହାରାଷ୍ଟ୍ର, କେରଳ, ତାମିଲନାଡ଼ୁ, ପଶ୍ଚିମବଙ୍ଗ, ଉତର ପ୍ରଦେଶ ପ୍ରମୁଖ “ପ୍ରୋହିବିସନ ଅଫ ର୍ୟାଗିଂ ଆକ୍ଟ” ପ୍ରଣୟନ କରିଛନ୍ତି । ମାତ୍ର ର୍ୟାଗିଂ କ୍ଷେତ୍ରରେ ଓଡ଼ିଶା ଦେଶରେ ତୃତୀୟ ସ୍ଥାନରେ ରହିଥିବା ବେଳେ ସରକାର ବିଧିବଧ ଭାବରେ “ପ୍ରୋହିବିସନ ଅଫ ର୍ୟାଗିଂ ଆକ୍ଟ” କାହିଁକି ପ୍ରଣୟନ କରୁନାହାନ୍ତି ତାହା ଆଜି ସାଧାରଣରେ ପ୍ରଶ୍ନବାଚୀ ହୋଇଛି । ଉଚ୍ଚଶିକ୍ଷା ମନ୍ତ୍ରୀ ଶ୍ରୀ ରୋହିତ ପୂଜାରୀ ମନ୍ତ୍ରୀ ପଦରେ ଅଛନ୍ତି କି ନାହିଁ ତାହା ଜନସାଧାରଣ ଅନୁଭବ କରିପାରୁ ନାହାନ୍ତି । ସେ ନିଘୋଡ଼ ନିଦରେ ଶୋଇଛନ୍ତି । ତାଙ୍କର ଅବଧି ଆରମ୍ଭରୁ ର୍ୟାଗିଂର ମାତ୍ରା ୬୦ ପ୍ରତିଶତ ବୃଦ୍ଧି ହେବା ଦୁର୍ଭାଗ୍ୟଜନକ । ସେ ଏ ସମ୍ବଦ୍ଧରେ ମୁହଁ ବି ଖୋଲୁ ନାହାନ୍ତି ।
ଯଦି ସାରା ରାଜ୍ୟରେ କ୍ୟାମ୍ପସକୁ ଭୟମୁକ୍ତ କରିବାପାଇଁ ଉଚ୍ଚଶିକ୍ଷା ମନ୍ତ୍ରୀ ତୁରନ୍ତ ନିର୍ଦ୍ଦିଷ୍ଟ ବ୍ୟବସ୍ଥା ନକରନ୍ତି ତେବେ ତାଙ୍କୁ ଭୁବନେଶ୍ୱରରେ ଏବଂ ରାଜ୍ୟସାରା ବିରୋଧ ପ୍ରଦର୍ଶନ କରାଯିବ ବୋଲି ଶ୍ରୀ ନୱାଜ ଚେତାବନୀ ଦେଇଛନ୍ତି । ଯେହେତୁ ଆଂଟିର୍ୟାଗି ସେଲ ସଶକ୍ତ ଓ ସକ୍ରିୟ ନାହିଁ ତେଣୁ ପ୍ରତିଦିନ ଏଭଳି ଅପରାଧିକ ଘଟଣା କ୍ୟାମ୍ପସରେ ଘଟୁଛି । ଏହାର ସଚେତନତା ହେଉନାହିଁ କିମ୍ବା କଲେଜ କାନ୍ଥରେ ଟୋଲ ଫ୍ରି ନମ୍ବର ବି ଲେଖାଯାଇ ନାହିଁ । ଆଂଟି ର୍ୟାଗିଂ ସେଲରେ ସ୍ଥାନୀୟ ଥାନା, ପ୍ରଶାସନିକ ଅଧିକାରୀ, ବୁଦ୍ଧିଜୀବି, ଅଭିଭାବକ, ସାମ୍ବାଦିକ ପ୍ରମୁଖ ଦାୟିତ୍ୱ ସମ୍ପନ୍ନ ବ୍ୟକ୍ତି ବିଶେଷ ରହିଲେ ଏହା ର୍ୟାଗିଂ ରୋକିବା ପାଇଁ ସମର୍ଥ ହୋଇ ପାରିବ । ର୍ୟାଗିଂ ପ୍ରବଣ ଶିକ୍ଷାନୁଷ୍ଠାନକୁ ଚିହ୍ନଟ କରାଯାଇ ଏହା ଉପରେ ସତର୍କ ନଜର ରଖାଯାଉ । ଏହି ସାମ୍ବାଦିକ ସମ୍ମିଳନୀରେ ଉପସଭାପତି ସୁନିଲ ମାଟିଆ, ସାଧାରଣ ସଂପାଦକ ରଞ୍ଜିତ ସେନାପତି, ସାଗର ପଟ୍ଟନାୟକ, ମୁଖପାତ୍ର ଶ୍ରୀ ମହାନ୍ତି, ସ୍ନେହା ଜେନା ଓ ସମିର ରାଉତ ପ୍ରମୁଖ ଉପସ୍ଥିତ ଥିଲେ ।
