ଗଜପତି ଜିଲ୍ଲା ଗଙ୍ଗାବାଡ ପଞ୍ଚାୟତର ବିଭିନ୍ନ ଗାଁ ଓଡିଶା- ଆନ୍ଧ୍ର ସୀମାନ୍ତବର୍ତ୍ତୀ ହୋଇଥିବାରୁ ଏଗୁଡ଼ିକୁ ନିଜ କବଜାକୁ ନେବା ପାଇଁ ଆନ୍ଧ୍ର ପ୍ରଶାସନ ସବୁବେଳେ ପ୍ରୟାସ କରିଆସୁଛି । ଗଙ୍ଗାବାଡ କିମ୍ବା କେରାଣ୍ଡି ପଞ୍ଚାୟତର କୌଣସି ଲୋକଙ୍କ ସାମାନ୍ୟ ଦେହ ଖରାପ ହେଲେ ଆନ୍ଧ୍ରର ମନ୍ଦସା ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରିବାକୁ ପଡୁଥିଲା । ଏଥିରୁ ଫାଇଦା ନେଇ ଆନ୍ଧ୍ର ଏହି ଅଞ୍ଚଳର ଲୋକଙ୍କୁ ନିଜ ପକ୍ଷକୁ ଟାଣିବା ପାଇଁ ପ୍ରୟାସ କରୁଥିଲା । ଏହି ଅଞ୍ଚଳର ଲୋକଙ୍କୁ ସ୍ବାସ୍ଥ୍ୟ ଠାରୁ ଶିକ୍ଷା ଯାଏଁ ସବୁକିଛି ପାଇଁ ଆନ୍ଧ୍ର ଉପରେ ନିର୍ଭର କରିବାକୁ ପଡୁଥିବା ଯୋଗୁଁ ଏହାର ଫାଇଦା ନେଇ ଏଠିକାର ଲୋକଙ୍କୁ ରାସନ୍ କାର୍ଡ, ଭତ୍ତା ଭଳି ବିଭିନ୍ନ ଯୋଜନାରେ ସାମିଲ କରି ନିଜ ପଟକୁ ଆକର୍ଷିତ କରିବା ପାଇଁ ଆନ୍ଧ୍ର ପ୍ରଶାସନ ବାରମ୍ବାର ପ୍ରୟାସ କରିଆସୁଛି । ତେବେ ଏହାର ଜବାବ ଦେବା ପାଇଁ ଜିଲ୍ଲା ପ୍ରଶାସନ ବର୍ତ୍ତମାନ ଅଣ୍ଟା ଭିଡିଛି ।
ଏହାକୁ ନେଇ ଅଞ୍ଚଳବାସୀ ଖୁସି ପ୍ରକାଶ କରିବା ସହ ଏଭଳି ଜରୁରୀକାଳୀନ ଆବଶ୍ୟକତାକୁ ପୂରଣ କରିଥିବାରୁ ସରକାର ଏବଂ ପ୍ରଶାସନକୁ ଧନ୍ୟବାଦ ଜଣାଇଛନ୍ତି ।ତେବେ ଏହି ଅଞ୍ଚଳ ପାଇଁ ସବୁଠାରୁ ବଡ ସମସ୍ୟା ହେଉଛି ମୋବାଇଲ୍ ଫୋନ ନେଟୱାର୍କ । ଅଧିକାଂଶ ଅଞ୍ଚଳରେ ମୋବାଇଲ୍ ନେଟୱାର୍କ ନଥିବାରୁ ବର୍ତ୍ତମାନ ଚମ୍ପାପୁର ନିକଟରେ ଆମ୍ବୁଲାନ୍ସକୁ ରଖାଯାଉଛି । କାରଣ ଏଠାରେ ନେଟୱାର୍କ ଆସୁଥିବାରୁ ଲୋକେ ଆମ୍ବୁଲାନ୍ସ ସହ ଯୋଗାଯୋଗ କରିବାରେ ସୁବିଧା ହେଉଛି । ତେବେ ବର୍ତ୍ତମାନ ପ୍ରଶାସନ ଏହି ଅଞ୍ଚଳର ବିକାଶ ପାଇଁ ଅଣ୍ଟା ଭିଡିବା ନିଶ୍ଚିତ ଭାବରେ ଓଡ଼ିଶାର ସୀମାସୁରକ୍ଷା ପାଇଁ ଶୁଭଙ୍କର । କିନ୍ତୁ ଏଭଳି ଅଞ୍ଚଳକୁ ଗମନାଗମନ ନିତି ଦିନିଆ ରାସ୍ତା ନିର୍ମାଣ ଓ ମୋବାଇଲ ସେବା ଅପେକ୍ଷାରେ ରହିଛନ୍ତି ଲୋକେ ।
