ଜାତୀୟ ସେବା ଯୋଜନା ଛାତ୍ରଛାତ୍ରୀଙ୍କ ମଧ୍ୟରେ ସେବା ମନୋବୃତ୍ତି ଓ ଶୃଙ୍ଖଳା ଉଦ୍ରେକ କରୁଛି : ମନ୍ତ୍ରୀ ଶ୍ରୀ ରୋହିତ ପୂଜାରୀ

ଓଡ଼ିଶା ତାଜା ନ୍ୟୁଜ (୧୯ ଅକ୍ଟୋବର ବୁଧବାର ) ଭୁବନେଶ୍ୱର :- ଜାତୀୟ ସେବା ଯୋଜନା (ଏନ୍‌ଏସ୍‌ଏସ୍‌) ଯୁକ୍ତ-୨ଠାରୁ ବିଶ୍ୱବିଦ୍ୟାଳୟ ପର୍ଯ୍ୟନ୍ତ ପ୍ରତ୍ୟେକ ସ୍ତରରେ ଫଳପ୍ରଦ ହୋଇଆସିଛି । ଏହା ଛାତ୍ରଛାତ୍ରୀମାନଙ୍କ ବୌଦ୍ଧିକ ବିକାଶ ସହ ସେମାନଙ୍କ ମଧ୍ୟରେ ସେବା ମନୋବୃତ୍ତି ଓ ଶୃଙ୍ଖଳା ଉଦ୍ରେକ କରୁଛି । ଆଜି ଜୟଦେବ ଭବନରେ ଅନୁଷ୍ଠିତ ଜାତୀୟ ସେବା ଯୋଜନାର ବିଗତ ଦୁଇ ବର୍ଷ ଯଥା ୨୦୨୦-୨୧, ୨୦୨୧-୨୨ ନିମନ୍ତେ ପୁରସ୍କାର ବିତରଣ ଉତ୍ସବରେ ରାଜ୍ୟ ଉଚ୍ଚଶିକ୍ଷା ମନ୍ତ୍ରୀ ଶ୍ରୀ ରୋହିତ ପୂଜାରୀ ଯୋଗଦେଇ ଏହି ମତ ପ୍ରକାଶ କରିଛନ୍ତି । ଜାତୀୟ ସେବା ଯୋଜନା ଛାତ୍ରଛାତ୍ରୀମାନଙ୍କ ମଧ୍ୟରେ ଥିବା ଆତ୍ମଶକ୍ତି, କର୍ମନିଷ୍ଠା ଏବଂ ସେବା ମନୋଭାବ, ଏକ ସୁନ୍ଦର ଦେଶ ଗଠନରେ ସହାୟକ ହେଉଅଛି ।ଏହି ସଂସ୍ଥା ଛାତ୍ରଶକ୍ତିର ସଦ୍‌ବିନିଯୋଗର ପ୍ରତିବିମ୍ବ ମାତ୍ର । ୧୯୬୯ ମସିହା ସେପେଫମ୍ବର ୨୪ ତାରିଖରୁ ଦେଶରେ ଏହି ଯୋଜନାର ଶୁଭାରମ୍ଭ କରାଯାଇଥିବାବେଳେ ଆଜି ଏହା ମହାଦ୍ରୁମରେ ପରିଣତ ହୋଇପାରିଛି । ଏନ୍‌ଏସ୍‌ଏସ୍‌ ଆଭିମୁଖ୍ୟ ‘କେବଳ ମୁଁ ନୁହେଁ ତୁମେ ମଧ୍ୟି’ (Not Me but You) । ଏହା ସ୍ୱାର୍ଥହୀନ ସେବାର ପ୍ରତୀକ ସହ ସମାଜରେ ଗଣତନ୍ତ୍ର ଭାବଧାରା ଦୃଢ଼ୀଭୂତ କରୁଛି । ସେ୍ୱଚ୍ଛାସେବୀମାନେ ଶିକ୍ଷା, ପରିବେଶ ସୁରକ୍ଷା, ସ୍ୱାସ୍ଥ୍ୟରକ୍ଷା ଦିଗରେ ବିଭିନ୍ନ ସେବାମୂଳକ କାର୍ଯ୍ୟ କରୁଛନ୍ତି । ସମାଜରୁ କୁସଂସ୍କାର ଦୂରକରିବା, ମହିଳାମାନଙ୍କ ଅଧିକାର, ଯୌତୁକ ପ୍ରଥା, ମଦ୍ୟପାନ, ବୃକ୍ଷରୋପଣ କାର୍ଯ୍ୟକ୍ରମ ଗ୍ରହଣ କରୁଛନ୍ତି ।

ଏହି ଯୋଜନାର ସଫଳତା ପାଇଁ ସରକାର ଗୁରୁତ୍ୱ ଦେଉଛନ୍ତି । ଆଗାମୀ ସମୟ ଏହି ଯୋଜନାରେ ପୁରସ୍କାର ରାଶି ବର୍ଦ୍ଧିତ କରବା ପାଇଁ ବ୍ୟବସ୍ଥା କରାଯିବ ବୋଲି ଉଚ୍ଚଶିକ୍ଷା ମନ୍ତ୍ରୀ ଶ୍ରୀ ପୂଜାରୀ ପ୍ରକାଶ କରିଥିଲେ । ‘ମୋ କଲେଜ’ ଅଭିଯାନ ପରିଚାଳନା ସଂଗଠନର ଅଧ୍ୟକ୍ଷ ଶ୍ରୀ ଆକାଶ ଦାସ ନାୟକ ତାଙ୍କ ଅଭିଭାଷଣରେ ଏନ୍‌ଏସ୍‌ଏସ୍‌ ସେ୍ୱଚ୍ଛାସେବୀମାନେ ସାଧାରଣ ନୁହେଁ ଅସାଧାରଣ ବୋଲି ମତପ୍ରକାଶ କରିଥିଲେ । ସେମାନଙ୍କର ମାନବିକତା ଅତ୍ୟନ୍ତ ମହାନ । ଆଦର୍ଶ ନାଗରିକ ହୋଇ ସମୃଦ୍ଧ ରାଷ୍ଟ୍ରଗଠନରେ ଭାଗୀଦାର ହେବାକୁ ସେ ସେ୍ୱଚ୍ଛାସେବୀମାନଙ୍କୁ ଆହ୍ୱାନ ଦେଇଥିଲେ । ଅନ୍ୟତମ ସମ୍ମାନିତ ଅତିଥି ଆଞ୍ଚଳିକ ନିର୍ଦ୍ଦେଶିକା, ଏନ୍‌ଏସ୍‌ଏସ୍‌ ଆଞ୍ଚଳିକ ନିର୍ଦ୍ଦେଶାଳୟ,ଭୁବନେଶ୍ୱର ସୁଶ୍ରୀ ସରିତା ପଟେଲ ତାଙ୍କ ଅଭିଭାଷଣରେ ନିର୍ଦ୍ଦେଶାଳୟ ଦ୍ୱାରା ଗ୍ରହଣ କରାଯାଇଥିବା ସମାଜସେବା ଯୋଜନାର ରୂପରେଖର ବିସ୍ତୃତ ବିବରଣୀ ପ୍ରଦାନ କରି କହିଥିଲେ ଯେ ଅଧିକ ଛାତ୍ରଛାତ୍ରୀ ଏହି ଯୋଜନାରେ ଯୋଗଦେଇ ସୁସ୍ଥ ସମାଜ ଗଠନରେ ଏହା ସହାୟକ ହେବେ ବୋଲି ଆଶାପ୍ରକାଶ କରିଥିଲେ । ଉଚ୍ଚଶିକ୍ଷା ବିଭାଗ ପ୍ରମୁଖ ଶାସନ ସଚିବ ଶ୍ରୀ ବିଷ୍ଣୁପଦ ସେଠୀ ତାଙ୍କ ସଭାପତିତ୍ୱ ଅଭିଭାଷଣରେ ସନ୍ଥକବି ଭୀମଭୋଇଙ୍କ ପଂକ୍ତିର ଉଦାହରଣ ଦେଇ ଛାତ୍ରଛାତ୍ରୀମାନେ ସମାଜରେ ବସବାସ କରୁଥିବା ଅସହାୟ ବ୍ୟକ୍ତିମାନଙ୍କୁ ସହଯୋଗର ହାତ ବଢ଼ାଇବା ପାଇଁ ପରାମର୍ଶ ଦେଇଥିଲେ । ଜାତୀୟ ସେବା ଯୋଜନା ମାଧ୍ୟମରେ ସଡ଼କ ସୁରକ୍ଷା, ଐତିହାସିକ ସ୍ଥାନର ସୁରକ୍ଷା ଓ ବିକାଶ ଉପରେ ବିଶେଷ ଗୁରୁତ୍ୱ ଦିଆଯିବା ଦ୍ୱାରା ଛାତ୍ରଛାତ୍ରୀମାନେ ମଧ୍ୟ ଏକ ଶୃଙ୍ଖଳିତ ସମାଜ ଗଠନରେ ସହାୟକ ହୋଇପାରିବ । ସେମାନେ ସେବା ଓ ସମାଜ ସଂସ୍କାରରେ ସହାୟକ ହେଉଅଛନ୍ତି ବୋଲି ସେ ମତ ପ୍ରକାଶ କରିଥିଲେ । ବିଗତ ୨୦୨୦-୨୧, ୨୦୨୧- ୨୨ ବର୍ଷର ରାଜ୍ୟ ଜାତୀୟ ସେବା ଯୋଜନାର ପୁରସ୍କାରଗୁଡ଼ିକ ଅତିଥିବୃନ୍ଦ ପ୍ରଦାନ କରିଥିଲେ । ରାଜ୍ୟ ଜାତୀୟ ସେବା ଯୋଜନା ଅଧିକାରୀ ଡ. ରମେଶ ଚନ୍ଦ୍ର ବେହେରା ପ୍ରାରମ୍ଭିକ ସୂଚନା ପ୍ରଦାନ ସହ ରାଜ୍ୟ ଜାତୀୟ ସେବା ଯୋଜନାର ଅଗ୍ରଗତି ସଂପର୍କରେ ସୂଚନା ପ୍ରଦାନ କରିଥିଲେ । ଡ. ବ୍ରଜନାରାୟଣ ପାତ୍ର ଧନ୍ୟବାଦ ଅର୍ପଣ କରିଥିଲେ । ପ୍ରଥମ ପର୍ଯ୍ୟାୟ କାର୍ଯ୍ୟକ୍ରମରେ ସମବେତ ଛାତ୍ରଛାତ୍ରୀମାନଙ୍କ ସହ ପୂର୍ବତନ ଏନ୍‌ଏସ୍‌ଏସ୍‌ ପରାମର୍ଶଦାତା ଡ. ଭଗବାନ ପ୍ରକାଶ ସମାଜସେବାର ବିଭିନ୍ନ ଦିଗ ଉପରେ ଆଲୋଚନା କରିଥିଲେ । ଏହି ପୁରସ୍କାର ବିତରଣ ଉତ୍ସବରେ ରାଜ୍ୟର ବିଭିନ୍ନ ବିଶ୍ୱବିଦ୍ୟାଳୟ ଏନ୍‌ଏସ୍‌ଏସ୍‌ ସଂଯୋଜକ, ଜିଲ୍ଲା କାର୍ଯ୍ୟକ୍ରମ ଅଧିକାରୀ, ମହାବିଦ୍ୟାଳୟ କାର୍ଯ୍ୟକ୍ରମ ଅଧିକାରୀ, ଛାତ୍ରଛାତ୍ରୀ ଏବଂ ଜାତୀୟ ସେବା ଯୋଜନା ସଂପର୍କିତ ଅଧିକାରୀବୃନ୍ଦ ଉପସ୍ଥିତ ଥିଲେ ।