ରାସ୍ତାରେ ଉଡୁଛି ଟଙ୍କା : ବରମୁଣ୍ଡା ଫ୍ଲାଏ ଓଭର ବ୍ରିଜ ଠାରୁ

ଓଡ଼ିଶା ତାଜା ନ୍ୟୁଜ (୨୦ ସେପ୍ଟେମ୍ବର ମଙ୍ଗଳବାର ) ଭୁବନେଶ୍ବର :- ଭୁବନେଶ୍ବରର ବରମୁଣ୍ଡା ଫ୍ଲାଏ ଓଭର ବ୍ରିଜ ଠାରୁ ସତ୍ ସଙ୍ଘ ବିହାର ପର୍ଯ୍ୟନ୍ତ ଜାତୀୟ ରାଜପଥ ଉପରେ ଦିନ ଗୋଟାଏଠାରୁ ଟଙ୍କା ଉଡିବା ଆରମ୍ଭ ହେଲା । କୋଡିଏ, ପଚାଶ,ଶହେ ଦୁଇଶହ ,ଦୁଇ ହଜାର ଆଦି ମୂଲ୍ୟର ନୋଟସବୁ ଉଡିଲା । ରାସ୍ତାରେ ଯାଉଥିବା ଲୋକେ ଦୁଇଚକିଆ ,ଚାରି ଚକିଆ ,ତିନିଚକିଆ ଯାନସବୁ ଅଟକାଇ ନୋଟ ଗୋଟାଇବାରେ ଲାଗିଲେ । ଜାତୀୟ ରାଜପଥ ଉପରେ ଦୃତ ଗତିରେ ଯାନବାହନ ଚଳାଚଳ କରୁଥିବାରୁ ଅନେକ ଛୋଟ ଛୋଟ ଦୁର୍ଘଟନା ମଧ୍ୟ ଘଟିଲା, କିନ୍ତୁ ଲୋକଙ୍କର ଟଙ୍କା ଗୋଟାଇବା ବନ୍ଦ ହେଲାନାହିଁ ।

ଲୋକେ ଟଙ୍କାଗୋଟାଇବା ସମୟକୁ ବର୍ଷା ପ୍ରବଳ ବେଗରେ ମାଡି ଆସୁଥାଏ । ଟଙ୍କା ଗୋଟାଉଥିବା ଲୋକେ ଧରିବା ମାତ୍ରକେ ଏସବୁ ନକଲି ବୋଲି ଜାଣିପାରୁଥାନ୍ତି । ଏହିସବୁ ନୋଟ ଉପରେ ଭାରତୀୟ ମନୋରଞ୍ଜନ ବ୍ୟାଙ୍କ, ଫୁଲ୍ ଅଫ ଫନ୍, ଦୋ ହଜାର ନମ୍ବର, ମେଁ ଧାରକ କୋ ଏକ ସୌ ନମ୍ବର ଅଦା କରନେକା ବଚନ ଦେତା ହୁଁ, ମେଁ ହୁଁ କରୋଡପତି ଆଦି ମୁଦ୍ରିତ ହୋଇଛି । ଏଭଳି ମନୋରଞ୍ଜନ ପାଇଁ କଲର ପ୍ରିଣ୍ଟ କରି ଶହଶହ ସଂଖ୍ୟାରେ ରାସ୍ତାରେ ଫୋପାଡିବାର ଅନ୍ୟ କୌଣସି ଉଦ୍ଦେଶ୍ୟ ରହିଥିବା ଅନୁମାନ କରା ଯାଉଛି ।

ନକଲି ଟଙ୍କା ଫୋପଡାହେବା ଏବଂ ବର୍ଷା ଆସିବା ମଧ୍ୟରେ ଖୁବ କମ୍ ସମୟ ବ୍ୟବଧାନ ରହିଥିବାରୁ ବର୍ଷାରେ ରାସ୍ତାରେ ପଡିଥବା ନୋଟସବୁ ନଷ୍ଟ ହୋଇ ଯାଇଥିଲା । ମନୋରଞ୍ଜନ ପାଇଁ କଲର୍ ପ୍ରିଣ୍ଟ ବାବଦରେ ବିପୁଳ ଅର୍ଥ ଖର୍ଚ କରାଯିବା ସହଜରେ ଗ୍ରହଣୀୟ ହୋଇପାରୁ ନଥିବାରୁ ଏହି ଘଟନା ଉପରେ ପୁଲିସ ତଦନ୍ତ ହେବା ଆବଶ୍ୟକ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି ।