ଓଡ଼ିଶା ତାଜା ନ୍ୟୁଜ (୨୭ ଅଗଷ୍ଟ ଶନିବାର ) ବୈପାରିଗୁଡା – ବୈପାରିଗୁଡା ବ୍ଲକ ମୁଖ୍ୟଛକ ସହିତ ରାସ୍ତାର ବିଭିନ୍ନ ଛକ ସ୍ଥାନ ମାନଙ୍କରେ ଗାଈଗୋରୁଙ୍କ ରାଜୁତି ଏବେ ଚାଲିଥିବାର ଦେଖିବାକୁ ମିଳୁଛି । ସକାଳ ସମୟରେ ରାସ୍ତା ଖାଲି ରହିଥିବା ବେଳେ ସଂନ୍ଧ୍ୟା ସମୟରୁ ରାତିସାରା ଗାଈଗୋରୁ ଓ କୁକୁର ମାନଙ୍କ କବଜାରେ ରାଂଚି ବିଜୟୱାର୍ଡ ଜାତୀୟ ରାଜପଥ ବୈପାରିଗୁଡା ଗ୍ରାମ ସହିତ ଦିଗାପୁର ଯିବା ରାସ୍ତା ଓ ଗୌଡସାହି ରାସ୍ତା ରହୁଥିବା ବେଳେ ଏଥିପାଇଁ ଯାନବାହାନ ଚଳାଚଳରେ ଘୋର ବ୍ୟାଘତ ହେବା ସହ ଅନେକ ସମୟରେ ଗାଈଗୋରୁ ଙ୍କ ପାଇଁ ଛୋଟବଡ ଯାନବାହାନ ଦୁର୍ଘଟଣା ମଧ୍ୟ ଘଟୁଛି । ବେଳେ ବେଳେ ଗାଡିମଟର ଧକ୍କାରେ ଗାଈଗୋରୁ ଆହତ ହେଉଥିବା ମଧ୍ୟ ନଜିର ରହିଛି ।
କିଛି ଦିନ ତଳେ ଏମିତି କିଛି ଘଟଣା ବୈପାରିଗୁଡା ଗ୍ରାମ ସ୍ଥିତ ବିରଖମ୍ବ ପୋଲ ନିକଟରେ ଦେଖିବାକୁ ମିଳିଥିଲା ଏବଂ ସେହି ସ୍ଥାନରେ କିଛି ଗାଈ ଗୋରୁ ଶୋଇଥିବା ସମୟରେ ଅଜଣା ଗାଡି ଧକ୍କାରେ ଗୋଟିଏ ଗାଈ ମୃତ୍ୟୁବରଣ କରିଥିବାର ଜଣାପଡିଛି । ତେବେ ପରିତାପର ବିଷୟ ଯେ ଏତେ ଦିନ ପର୍ଯ୍ୟନ୍ତ ସେହି ସ୍ଥାନରେ ଗାଈ ପଡି ରହିଥିଲେ ମଧ୍ୟ ଗାଈର ମାଲିକ ମୃତ ଗାଈ କୁ ସାଙ୍ଗରେ ନେଲେ ନାହିଁ । ବର୍ତିମାନ ବୈପାରିଗୁଡା ଗ୍ରାମ ସହ ବାହାର ଗ୍ରାମଗୁଡିକ ଚାଷବାସରେ ପରିପୂର୍ଣ୍ଣ ହୋଇଥିବା ବେଳେ ବୁଲା ଗାଈଗୋରୁ ଚାଷ ବିଲରେ ପଶି ଫସଲ ନଷ୍ଟ କରୁଥିବାର ଶୁଣିବାକୁ ମିଳୁଛି ।
ସୂଚନା ଅନୁସାରେ ବୈପାରିଗୁଡା ସହରରେ ବୁଲା ଗାଈ ବଳଦଙ୍କ ପାଇଁ ସମସ୍ୟା ଅନେକ ହେଉଛି । ସହରରେ ମାଳ ମାଳ ଗାଈଗୋରୁ, ବଳଦ, ଶଣ୍ଡ, ସେମାନଙ୍କ ସଂଖ୍ୟା ଦିନ କୁ ଦିନ ରାସ୍ତା ଉପରେ ବଢିବାରେ ଲାଗିଛି । କେଉଁଠି ରାସ୍ତା କବ୍ଜା କଲେଣି ତ ଦୈନିକ ବଜାରରେ ପରିବାର ଦୋକାନୀଙ୍କ ପରିବା ଖାଇ ଗଲେଣି । ରାତ୍ରି ଅନ୍ଧାରରେ ଲୋକେ ଗାଈଗୋରୁ ଙ୍କୁ ଜାଣି ନ ପାରି ଦୁର୍ଘଟଣାର ଶିକାର ବି ହେଉଛନ୍ତି । ରାଜରାସ୍ତାରେ ସଞ୍ଜ ହେବା ମାତ୍ର ଗୋରୁଗାଈଙ୍କ କବ୍ଜାରେ ସହର ରହୁଥିବା ବେଳେ ପ୍ରଶାସନ କର୍ମଚାରୀ ସବୁ ଦେଖି ମଧ୍ୟ ନ ଦେଖିବା ନ୍ୟାୟରେ ଗାଡିମଟର ବୁଲାଇ ଚାଲି ଯାଉଛନ୍ତି ।
ପ୍ରଶାସନ ପକ୍ଷରୁ ବୈପାରିଗୁଡା ସହର ସମେତ ପାଖପାଖରେ ଅଂଚଳର ଗାଈଗୋରୁ ମାଲିକ ମାନଙ୍କୁ କୌଣସି ପ୍ରକାର ନୋଟିସ କିମ୍ବା ତାଗିଦ୍ ହେଉନଥିବାରୁ ଗାଈଗୋରୁ ମାଲିକ ମାନେ ମଧ୍ୟ ଖୁଲମଖୁଲା ଗାଈଗୋରୁ ରାସ୍ତା ଉପରେ ଛାଡୁଥିବା ଦେଖିବାକୁ ମିଳୁଛି । ତେଣୁ ବୁଲା ଗାଈଗୋରୁଙ୍କୁ ଆକଟ ପାଇଁ ତୁରନ୍ତ କାହାକୁ ଦାୟିତ୍ୱ ଦିଆଯାଉ ନଚେତ ପ୍ରଶାସନ ପକ୍ଷରୁ ଏହି ମାଲିକ ମାନଙ୍କ ପ୍ରତି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣ ରେ ମତ ପ୍ରକାଶ ପାଉଛି ।
