ରଣପୁର ମଝି ଆଖଣ୍ଡ ଗ୍ରାମର ଶ୍ରୀକମଳେଶ୍ଵରଙ୍କ ପୀଠରେ ପ୍ରସିଦ୍ଧ ରୁକୁଣା ରଥଯାତ୍ରା ଅନୁଷ୍ଠିତ

ଓଡ଼ିଶା ତାଜା ନ୍ୟୁଜ୍ (୯ ଏପ୍ରିଲ ଶନିବାର ) ରଣପୁର ମଝି ଆଖଣ୍ଡ :- ପବିତ୍ର ଅଶୋକାଷ୍ଟମୀ ଉପଲକ୍ଷେ ରଣପୁର ନିକଟସ୍ଥ ମଝି ଆଖଣ୍ଡ ଗ୍ରାମର ଶ୍ରୀକମଳେଶ୍ଵରଙ୍କ ପୀଠରେ ପ୍ରସିଦ୍ଧ ରୁକୁଣା ରଥଯାତ୍ରା ଅନୁଷ୍ଠିତ ହୋଇଛି । ଗତବର୍ଷ କୋଭିତ କଟକଣା ଥିବାରୁ ବିନା ଭକ୍ତରେ ରଥ ଗଡିଥିଲା । ରଣପୁର ଜଗନ୍ନାଥ ମନ୍ଦିର ପ୍ରଶାସନ ତରଫରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଥିଲା ।

ଏହି ରଥଯାତ୍ରା ଦେଖିବା ପାଇଁ ପାଖଆଖ ଅଞ୍ଚଳବାସୀ ଭିଡ଼ ଜମାଇଥିଲେ । ସକାଳେ ଶ୍ରୀକମଳେଶ୍ଵରଙ୍କ ସମସ୍ତ ନୀତିକାତି ସମ୍ପନ୍ନ ହେବା ପରେ ରଥ ପ୍ରତିଷ୍ଠା କରାଯାଇଥିଲା । ପରେ ବାବା ଶ୍ରୀକମଳେଶ୍ଵରଙ୍କୁ ସେବାୟତମାନେ ରଥାଋଢ କରିଥିଲେ । ପରେ ରଥ ଟଣା ହୋଇ ଆସି ରଘୁନାଥ ମନ୍ଦିରଠାରେ ପହଞ୍ଚିଥୁଲା ।

ରଘୁନାଥ ମନ୍ଦିରରେ ଅଶୋକାଷ୍ଟମୀ ଅବସରରେ ଅବସ୍ଥାନ କରିବାପରେ ରବିବାର ମଧ୍ୟ ଏହି ମନ୍ଦିରରେ ବାବା କମଳେଶ୍ଵର ଅବସ୍ଥାନ କରିଥିଲେ । ସୋମବାର ମହାପ୍ରଭୁ ପୁଣି ନିଜ ମନ୍ଦିରକୁ ପ୍ରସ୍ଥାନ କରିବେ ।

ଏଠାରେ ସୂଚନାଯୋଗ୍ୟ ମହାପୁରୁଷ ଅଚ୍ୟୁତାନନ୍ଦ ଏହି କମଳେଶ୍ୱରଙ୍କ ପୀଠରେ ହରିବଂଶ ରଚନା କରିଥିଲେ । ଜଗନ୍ନାଥ ମନ୍ଦିର ପ୍ରଶାସନ ତରଫରୁ ତହସିଲଦାର ଯୁଗଳ କିଶୋର ମିଶ୍ର, ମ୍ୟାନେଜର ରମେଶ ପ୍ରଧାନ, ସ୍ଥାନୀୟ ସରପଞ୍ଚ ରଶ୍ମିତା ତରେଇ ପ୍ରମୁଖ ଉପସ୍ଥିତ ଥିଲେ ।