ଓଡ଼ିଶା ତାଜା ନ୍ୟୁଜ୍ (୨୩ ଫେବ୍ରୁଆରୀ ବୁଧବାର ) ଭୁବନେଶ୍ୱର :- ଓଡ଼ିଶା ରାଜଭବନରେ ମହାମହିମ ରାଜ୍ୟପାଳ ପ୍ରଫେସର ଶ୍ରୀଯୁକ୍ତ ଗଣେଶୀ ଲାଲଙ୍କ କରକମଳରେ କେନ୍ଦ୍ର ସାହିତ୍ୟ ଏକାଡେମୀର ପୂର୍ବତନ ସଭାପତି ଓ ଭାରତର ବିଶିଷ୍ଟ ଉପନ୍ୟାସକାର ଶ୍ରୀଯୁକ୍ତ ସୁନୀଲ ଗଙ୍ଗୋପାଧ୍ୟାୟଙ୍କ ମୂଳ ବଂଙ୍ଗଳା ରଚିତ ଏବଂ ପୂର୍ବତନ ପୋଲିସ୍ ଆଇ.ଜି. ଶ୍ରୀଯୁକ୍ତ ବିଧୁଭୂଷଣ ମିଶ୍ରଙ୍କ ଧର୍ମପତ୍ନୀ ବିଶିଷ୍ଟ ଗାଳ୍ପିକା ଓ କବି ଶ୍ରୀମତୀ ଗୀତା ମିଶ୍ରଙ୍କ ଦ୍ୱାର ଓଡ଼ିଆରେ ଅନୁଦିତ ହୋଇଥିବା ଉପନ୍ୟାସ ‘ପୂର୍ବପଶ୍ଚିମ’ର ଲୋକାର୍ପଣ ହୋଇଯାଇଛି ।
ରାଜ୍ୟର ସଂମ୍ଭ୍ରାନ୍ତ ପ୍ରକାଶନ ସଂସ୍ଥା ଅପୂର୍ବା ପ୍ରକାଶନୀ ଦ୍ୱାରା ପ୍ରକାଶିତ ହୋଇଥିବା ପ୍ରାୟ ଏକହଜାର ପୃଷ୍ଠା ବିଶିଷ୍ଟ ଏହି ମନଲୋଭା ଓ ଚି ାକର୍ଷକ ଉପନ୍ୟାସ ପୂର୍ବପଶ୍ଚିମ ଭାରତୀୟ କଥା ସାହିତ୍ୟର ଏକ ରତ୍ନ ଆଭୁଷଣ କହିଲେ ଅତ୍ୟୁକ୍ତି ହେବନାହିଁ । ‘ଦେଶ’ ପତ୍ରିକାରେ ଧାରାବାହିକ ଭାବେ ପ୍ରକାଶିତ ହୋଇ ଅନେକ ଶ୍ରଦ୍ଧା ସାଉଁଟି ଥିବା ଏହି ଏବଂ ଏକ ବିଶାଳ କାନ୍ଭାସ୍ରେ ଚିତ୍ରିତ ଏହି ସୁଦୀର୍ଘ ଉପନ୍ୟାସର ଘଟନା ପ୍ରବାହ ଏପାଖ ଏବଂ ସେପାଖ ବଙ୍ଗଳାକୁ ଏକ ସଙ୍ଗରେ ସ୍ପର୍ଶ କରି ପାରିଛି ।
ପଚାଶ ମସୀହାର ମଧ୍ୟଭାଗରୁ ଆରମ୍ଭ ହୋଇ ଦୁଇ ବଙ୍ଗଳାର ରାଜନୈତିକ ଓ ସମାଜିକ କ୍ଷେତ୍ରରେ ଚିତ୍ରପଟ ବଦଳର ସ୍ରୋତ କେଉଁପରି ଭାବେ ଏହି ଅଶୀଦଶକର ଶୋଭନୀୟ କାହାଣୀ ସହ ମିଳିତ ହୋଇଚି, ଏଇ ଉପନ୍ୟାସ ତାହାର ଏକ ଜୀବନ୍ତ ଦଲିଲ୍ । ଏହି ଲୋକାର୍ପଣ କାର୍ଯ୍ୟକ୍ରମରେ ଅପୂର୍ବା ଅଧ୍ୟକ୍ଷ କ୍ଷୀରୋଦ ପତିଙ୍କ ସହ ଅନୁବାଦିକା ଶ୍ରୀମତୀ ମିଶ୍ର ନିଜର ଦୁଇ କନ୍ୟା ସମ୍ବିତା ଓ ସୁମିତାଙ୍କ ସହ ଉପସ୍ଥିତ ରହି ରାଜ୍ୟପାଳ ମହୋଦୟଙ୍କ ଆଶୀର୍ବାଦ ଗ୍ରହଣ କରିଥିଲେ ।
