ନୟାଗଡ଼ ଜିଲ୍ଲାରେ ୪ ଜଣ ସରପଞ୍ଚ ଓ ୩ ଜଣ ସମିତି ସଭ୍ୟ ଅପ୍ରତିଦ୍ୱନ୍ଦୀ ହେବା ବିଜୁ ଜନତା ଦଳ ଉପରେ ଜନସାଧାରଣଙ୍କ ବିଶ୍ୱାସ ଓ ଆସ୍ଥାକୁ ପ୍ରତିପାଦିତ କରୁଛି
ଓଡ଼ିଶା ତାଜା ନ୍ୟୁଜ୍ ( ୩ ଫେବ୍ରୁଆରୀ ଗୁରୁବାର ) ନୟାଗଡ଼ :- ଜିଲ୍ଲାରେ ୨୯୮୮ ୱାର୍ଡ଼ସଭ୍ୟ ପଦବୀ ମଧ୍ୟରୁ ୧୦୭୯ ପଦବୀ ପାଇଁ ୱାର୍ଡ଼ସଭ୍ୟ ଅପ୍ରତିଦ୍ୱନ୍ଦୀ ଭାବେ ବିଜୟ ଲାଭ କରିବା ବିରୋଧି ବିଜେପି ଏବଂ କଂଗ୍ରେସର ସାଂଗଠନିକ ଦୁର୍ବଳତାକୁ ସ୍ପଷ୍ଟ କରୁଛି । ନୟାଗଡ଼ ଜିଲ୍ଲାରେ ବିରୋଧି କେଉଁ ସ୍ଥିତିରେ ଅଛନ୍ତି, ମତଦାନ ପୂର୍ବରୁ ସ୍ପଷ୍ଟ ଅନୁମାନ ହେଲାଣି । ଏଥିସହିତ ଜିଲ୍ଲାରେ ୪ ଜଣ ସରପଞ୍ଚ ଓ ୩ ଜଣ ସମିତି ସଭ୍ୟ ଅପ୍ରତିଦ୍ୱନ୍ଦୀ ହେବା ବିଜୁ ଜନତା ଦଳ ଉପରେ ଜନସାଧାରଣଙ୍କ ବିଶ୍ୱାସ ଓ ଆସ୍ଥାକୁ ପ୍ରତିପାଦିତ କରୁଛି । ନୟାଗଡ଼ ଜିଲ୍ଲାରେ ୮ଟି ବ୍ଲକ, ୨୪ ଜିଲ୍ଲା ପରିଷଦ ଆସନ ରହିଛି ।
୮ ଟି ବ୍ଲକ ଅଧିନରେ ୧୯୪ ପଞ୍ଚାୟତର ସରପଞ୍ଚ ଏବଂ ସମିତି ସଭ୍ୟ ପଦବୀ ସହ ଜିଲ୍ଲାରେ ୨୯୮୮ ୱାର୍ଡ଼ସଭ୍ୟ ପଦବୀ ପାଇଁ ନିର୍ବାଚନ ପ୍ରକିୟା ଆରମ୍ଭ ହୋଇଥିଲା । ମାତ୍ର ପ୍ରାର୍ଥୀପତ୍ର ପ୍ରତ୍ୟାହାର ପରେ ଜିଲ୍ଲାରେ ଏକ ହଜାରରୁ ଉର୍ଦ୍ଧ୍ୱ ୱାର୍ଡ଼ସଭ୍ୟ ଅପ୍ରତିଦ୍ୱନ୍ଦୀ ହେବା ଶାସକ ଦଳ ସପକ୍ଷରେ ନିର୍ବାଚନ ଯିବ ବୋଲି ଚର୍ଚ୍ଚା ହେଉଛି । ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକରେ ୫୭୪ ୱାର୍ଡ଼ସଭ୍ୟ ମଧ୍ୟରୁ ୨୨୦, ରଣପୁର ବ୍ଲକରେ ୫୧୭ ୱାଡ଼ସଭ୍ୟ ମଧ୍ୟରୁ ୧୫୯, ୪୩୫ ୱାର୍ଡ଼ସଭ୍ୟ ମଧ୍ୟରୁ ୧୮୫, ନୂଆଗାଁ ବ୍ଲକର ୩୪୩ ୱାର୍ଡ଼ସଭ୍ୟ ମଧ୍ୟରୁ ୨୦୩, ଦଶପଲ୍ଲା ବ୍ଲକର ୨୭୬ ୱାର୍ଡ଼ସଭ୍ୟ ମଧ୍ୟରୁ ୧୬୩, ଗଣିଆ ବ୍ଲକ ୧୧୯ ୱାର୍ଡ଼ସଭ୍ୟ ମଧ୍ୟରୁ ୬୩, ଖଣ୍ଡପଡ଼ା ବ୍ଲକର ୩୮୨ ୱାର୍ଡ଼ସଭ୍ୟ ମଧ୍ୟରୁ ୧୭, ଭାପୁର ବ୍ଲକର ୩୪୨ ୱାର୍ଡ଼ସଭ୍ୟ ମଧ୍ୟରୁ ୬୯ ଜଣ ଅପ୍ରତିଦ୍ୱନ୍ଦୀ ଭାବେ ନିର୍ବାଚିତ ହୋଇଛନ୍ତି ।
ସେହିଭଳି ଭାବେ ନୟାଗଡ଼ ନିର୍ବାଚନ ମଣ୍ଡଳୀ ଅନ୍ତର୍ଗତ କ୍ରିଦାଶପୁର ପଞ୍ଚାୟତ ସରପଞ୍ଚ, ସମିତି ସଭ୍ୟ, ନଡ଼ିଆଳି ପଞ୍ଚାୟତ ସରପଞ୍ଚ, ବାଣ୍ଠପୁର ପଞ୍ଚାୟତ ସରପଞ୍ଚ, ସମିତିସଭ୍ୟ ଏବଂ ଦଶପଲ୍ଲା ନିର୍ବାଚନ ମଣ୍ଡଳୀ ଗାତେରୀ ପଞ୍ଚାୟତର ସରପଞ୍ଚ ଓ ସମିତି ସଭ୍ୟ ଅପ୍ରତିଦ୍ୱନ୍ଦୀ ଭାବେ ନିର୍ବାଚିତ ହେବା ଜିଲ୍ଲାରେ ଏକ ଅନ୍ୟନ୍ୟ ରାଜନୈତିକ ପରିସ୍ଥିତି ସୃଷ୍ଟି କରିଛି । ଅପ୍ରତିଦ୍ୱନ୍ଦୀ ଭାବେ ନିର୍ବାଚିତ ହୋଇଥିବା ୱାର୍ଡ଼ସଭ୍ୟଙ୍କ ମଧ୍ୟରୁ ୯୮ ପ୍ରତିଶତ ବିଜୁ ଜନତା ଦଳ ସମର୍ଥିତ ବୋଲି ଆଭାସ ମିଳିଛି । ସେହିଭଳି ଭାବେ ସମସ୍ତ ସରପଞ୍ଚ ଏବଂ ସମିତି ସଭ୍ୟ ମଧ୍ୟ ବିଜେଡି ସମର୍ଥୀତ ବୋଲି ଜଣାଯାଇଛି ।
ଜିଲ୍ଲାରେ ବିରୋଧି ଦଳ ଅତ୍ୟନ୍ତ ଦୁର୍ବଳ ସ୍ଥିତିରେ ରହିଥିବା ବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନୀତି ଏବଂ ଆଦର୍ଶ ପାଇଁ ବିଜେଡି ସମର୍ଥୀତ ପ୍ରାର୍ଥୀ ସହଜ ବିଜୟ ଲାଭ କରିବେ ବୋଲି ଆଲୋଚନା ହେଉଛି । ଓଡ଼ିଶାବାସୀଙ୍କ ପାଇଁ ମୁଖ୍ୟମନ୍ତ୍ରୀଙ୍କ ପରିଶ୍ରମ ଏବଂ ସଂଗ୍ରାମର ମୁଲ୍ୟ ନୟାଗଡ଼ ବାସୀ ଚଳିତ ନିର୍ବାଚନରେ ପ୍ରତିଫଳିତ କରିବେ ବୋଲି ଆଭାସ ମିଳୁଛି । ନୟାଗଡ଼ ପୁଣି ଥରେ ବିଜେଡି ଗଡ଼ ଭାବେ ଉଭା ହେବ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି ।
