ଓଡ଼ିଶା ତାଜା ନ୍ୟୁଜ୍ (୧୦ ଡିସେମ୍ବର ଶୁକ୍ରବାର ) ଭୁବନେଶ୍ୱର :- ଆଜି ପ୍ରଦେଶ ଛାତ୍ର କଂଗ୍ରେସ ସଭାପତି ଶ୍ରୀ ୟାସିର ନୱାଜଙ୍କ ନେତୃତ୍ୱରେ ମମିତା ମେହେରଙ୍କୁ ନ୍ୟାୟ, ହତ୍ୟାକାରୀ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କରଙ୍କ ଗିରଫ ଓ ବହିଷ୍କାର ଏବଂ ହାଇକୋର୍ଟରେ କାର୍ଯ୍ୟରତ ଜଜଙ୍କ ତତ୍ୱାବଧାନରେ ଘଟଣାର ଏସଆଇଟି ତଦନ୍ତ ଦାବିରେ ଲୋୟର ପିଏମଜି ଠାରେ ଏକ ବିରାଟ ବିକ୍ଷୋଭ ସଭା ହୋଇଥିଲା । ଏହି କାର୍ଯ୍ୟକ୍ରମରେ ଶ୍ରୀ ନୱାଜ କହିଥିଲେ ମମିତା ମେହେର ନ୍ୟାୟ ନପାଇବା ପର୍ଯ୍ୟନ୍ତ ଏବଂ ହତ୍ୟାକାରୀ ମନ୍ତ୍ରୀ ଦିବ୍ୟଶଙ୍କରଙ୍କୁ ବହିଷ୍କାର ଏବଂ ଗିରଫ ନକରିବା ପର୍ଯ୍ୟନ୍ତ ଛାତ୍ର କଂଗ୍ରେସ ତାର ଆନ୍ଦୋଳନ ଜାରି ରଖିବ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିବ୍ୟଶଙ୍କରଙ୍କୁ ସୁରକ୍ଷା ଦେବାପାଇଁ ଛାତ୍ର କଂଗ୍ରେସର ଆନ୍ଦୋଳନକୁ ଚପାଇଦେବା ପାଇଁ ପୋଲିସ ବଳ ପ୍ରୟୋଗ କରିବା ଅଗଣତାନ୍ତ୍ରିକ ବୋଲି ସେ କହିଥିଲେ । ୨୧ ବର୍ଷର ନବୀନ ଶାସନରେ ମହିଳା ଲୁଣ୍ଠିତ, ଅତ୍ୟାଚାରିତ ଏବଂ ନ୍ୟାୟ ପାଇବାରୁ ବଂଚିତ । ନବୀନ ପଟ୍ଟନାୟକ ନିଜ ଶାସନକକାଳରେ ଗଣଦୁଷ୍କର୍ମ ଏବଂ ହତ୍ୟାର ଶୀକାର ହୋଇଥିବା କୌଣସି ମହିଳାଙ୍କୁ ନ୍ୟାୟ ଦେଇପାରି ନାହାନ୍ତି ବରଂ ଚକ୍ରାନ୍ତ କରି ଘଟଣାକୁ ଚପାଇ ଦେବାକୁ ଉଦ୍ୟମ କରିଛନ୍ତି ।
ସବୁଠାରୁ ଦୁଃଖର ବିଷୟ ଏହିକିଯେ ଅଧିକାଂଶ ମହିଳା ଦୁଷ୍କର୍ମ ଓ ହତ୍ୟା ଘଟଣାର ବିଜେଡ଼ିର ବିଧାୟକ ଓ ନେତାମାନେ ସଂପୃକ୍ତ । ସୁତରାଂ ଓଡ଼ିଶାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନାରୀ ଜାତିର ଶତୃ । ଏହି କାର୍ଯ୍ୟକ୍ରମରେ ରାଷ୍ଟ୍ରୀୟ ଛାତ୍ର କଂଗ୍ରେସର ସଂପାଦିକା ତଥା ଓଡ଼ିଶା ପ୍ରଭାରୀ ସୁଶ୍ରୀ ଅନୁଲେଖା ବୋଷା ଯୋଗଦେଇ କହିଥିଲେ ଯେ ଓଡ଼ିଶାରେ ମହିଳା ଅସୁରକ୍ଷିତ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୀଡ଼ିତା ମହିଳାଙ୍କୁ ନ୍ୟାୟ ଦେବାରେ ଉଦାସୀନ ।
ଏହି କାର୍ଯ୍ୟକ୍ରମେରେ ପ୍ରଦେଶ କଂଗ୍ରେସ କମିଟି ସଭାପତି ଶ୍ରୀ ନିରଞ୍ଜନ ପଟ୍ଟନାୟକ ଯୋଗଦେଇ କହିଥିଲେ ଯେ ନାରୀ ନିର୍ଯ୍ୟାତନା କ୍ଷେତ୍ରରେ ଦେଶରେ ଓଡ଼ିଶା ପ୍ରଥମ । ଏହି କ୍ଷେତ୍ରରେ ନବୀନଙ୍କ ମା’କୁ ସମ୍ମାନ ଆହ୍ୱାନ ଏକ ପ୍ରହସନ । ମମିତା ମେହେର ପ୍ରସଙ୍ଗ ଓଡ଼ିଶାରେ ମହିଳାଙ୍କ ପ୍ରତିଦିନ ହେଉଥିବା ଅନ୍ୟାୟ ଓ ଅତ୍ୟାଚାର ଜଳ୍ୱନ୍ତ ଉଦାହରଣ । ଅନ୍ୟମାନଙ୍କ ମଧ୍ୟରେ କଂଗ୍ରେସ ବିଧାୟକ ଦଳ ନେତା ଶ୍ରୀ ନରସିଂହ ମିଶ୍ର, ପୂର୍ବତନ ପିସିସି ସଭାପତି ଶ୍ରୀ ଜୟଦେବ ଜେନା,
ବିଧାୟକ ତାରାପ୍ରସାଦ ବାହିନୀପତି, ସୁରେଶ କୁମାର ରାଉତରାୟ, ରମେଶ ଜେନା, ସନ୍ତୋଷ ସିଂ ସାଲୁଜା, ଅଧିରାଜ ମୋହନ ପାଣିଗ୍ରାହୀ, ଦାଶରଥି ଗମାଙ୍ଗ, ରଜତ ଚୌଧୁରୀ, ଗଣେଶ୍ୱର ବେହେରା, ଦେବାଶିଷ ପଟ୍ଟନାୟକ, ସତ୍ୟପ୍ରକାଶ ନାୟକ, ବିଶ୍ୱଜିତ ଦାଶ, ଶିବାନନ୍ଦ ରାୟ ପ୍ରମୁଖ ଅଂଶଗ୍ରହଣ କରି ମମିତା ମେହେର ପ୍ରସଙ୍ଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭର୍ତ୍ସନା କରିଥିଲେ । ଛାତ୍ର କଂଗ୍ରେସର ବହୁ କର୍ମୀ ଧାରଣା ସ୍ଥଳରୁ ଖସି ଯାଇ ବିଧାନସଭା ଗେଟ ପାଖରେ ବିକ୍ଷୋଭ କରୁଥିବା ବେଳେ ପୋଲିସ ସେମାନଙ୍କୁ ଗିରଫ କରିଥିଲା ।
ଏପଟେ ଧାରଣାସ୍ଥଳରେ ଆନ୍ଦୋଳନରତ ଛାତ୍ରଙ୍କୁ ଅଗଣତାନ୍ତ୍ରିକ ଭାବେ ପୋଲିସ ଆକ୍ରମଣ କରିଥିଲା । ପୋଲିସର ବର୍ବର ଆକ୍ରମଣରେ କିରଣ ସାହୁ, କାର୍ତିକେଶ୍ୱର କାଣ୍ଡି, ସୁନିଲ ମାଟିଆ, ଶାନ୍ତିଲତା ବେହେରା, ସମିଉଲ ହକ, ସୌମ୍ୟ ଷଣ୍ଢ, ସୁବ୍ରତ ବେହେରା, ନିଷିତି ବେହେରା ଓ ନିହାର ବେହେରା ପ୍ରମୁଖ ଶତାଧିକ ଛାତ୍ର କଂଗ୍ରେସ ନେତା ଲହୁଲୁହାଣ ହୋଇଛନ୍ତି । କିଛି ଛାତ୍ରନେତା ମଧ୍ୟ କ୍ୟାପିଟାଲ ହସପିଟାଲରେ ଚିକିତ୍ସିତ ହେଉଛନ୍ତି । ସବୁଠାରୁ ଦୁଃଖର ବିଷୟ ଏହିକିଯେ ପୋଲିସ କଂଗ୍ରେସ ଭବନ କାର୍ଯ୍ୟାଳୟରେ ପଶି ସେଠାରେ ଉପସ୍ଥିିତ ଥିବା କିଛି କଂଗ୍ରେସ ନେତା ଓ ଛାତ୍ର କଂଗ୍ରେସ ନେତୃବର୍ଗଙ୍କୁ ଅତି ଅମାନୁସିକ ଭାବରେ ଆକ୍ରମଣ କରିଥିଲେ ।
କଂଗ୍ରେସ ଭବନର ବିଭିନ୍ନ ରୁମରେ ପଶି ମହିଳା କଂଗ୍ରେସ କର୍ମୀଙ୍କ ଉପରେ ମଧ୍ୟ ଆକ୍ରମଣ କରିଛି ଏବଂ ଅନ୍ୟ କଂଗ୍ରେସ କର୍ମୀମାନଙ୍କୁ ନିର୍ଦ୍ଦୟ ଭାବରେ ପିଟିଛି । ଏହାର ପ୍ରତିବାଦରେ ଛାତ୍ର କଂଗ୍ରେସର କର୍ମକର୍ତାମାନେ ମାଷ୍ଟରକ୍ୟାଂଟିନ ଛକଠାରେ ୫ ଘଂଣା ଧରି ରାଜରାସ୍ତା ଅବରୋଧ କରିଥିଲେ । ସଂଧ୍ୟା ପୂର୍ବରୁ ପରିଶେଷରେ ଭୁବନେଶ୍ୱର ଡିସିପି ପୋଲିସ ଆକ୍ରମଣ ଘଟଣାରେ ଦୁଃଖ ପ୍ରକାଶ କରିବା ସହ ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନର ନିରପେକ୍ଷ ତଦନ୍ତ ଏବଂ ୭ଦିନ ଭିତରେ ବିହୀତ ପଦକ୍ଷେପ ନେବାପାଇଁ ପ୍ରତିଶ୍ରୁତି ଦେବାପରେ ଆନ୍ଦୋଳନ ପ୍ରତ୍ୟାହୁତ ହୋଇଥିଲା ।
