ହିଞ୍ଜିଳିକାଟୁ, ରିପୋର୍ଟ /ଶେଷଦେବ ସାହୁ ( ଓଡିଶା ତାଜା ନ୍ୟୁଜ୍ ) କରୋନା ଛଡ଼ାଇନେଲା ଜୀବିକା, ୨ ମଇ, ଶନିବାର : – କରୋନା ଛଡ଼ାଇ ନେଇଥିଲା ଜୀବିକା । ଆଉ ଏବେ କାଳବୈଶାଖୀ ବୁଡ଼ାଇଦେଲା ଫସଲ । ଚାଷୀ ମୁଣ୍ଡରେ ଚଡ଼କ ପଡ଼ିଛି । ଏଭଳି ପରିସ୍ଥିତିରେ ଚାଷୀଙ୍କ ଦୁଃଖ ବୁଝିବ କିଏ ବୋଲି କୋକଭରା କଣ୍ଠରେ କହିଛନ୍ତି । ଏଭଳି ଘଟଣା ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ଅଂଚଳରେ ଦେଖିବାକୁ ମିଳିଛି । କରୋନା ଯୋଗୁଁ ଜୀବନ ଜୀବିକା ଠପ୍ ହୋଇ ଯାଇଥିବା ବେଳେ ଏବେ କାଳବୈଶାଖୀ ବର୍ଷା ଯୋଗୁଁ ଫସଲ ନଷ୍ଟ ସେମାନଙ୍କ ଦୁର୍ଦ୍ଦଶାକୁ ଆହୁରି ବଢାଇଦେଇଛି । ଗଞ୍ଜାମ ଜିଲ୍ଲାର ହିଞ୍ଜିଳିକାଟୁ ଅଂଚଳ ପନିପରିବା ଫସଲ ସକାଶେ ଖ୍ୟାତି ଅର୍ଜନ କରିଛି । ହିଞ୍ଜିଳିକାଟୁ ଅଂଚଳରୁ ବିଭିନ୍ନ ପ୍ରକାର ପନିପରିବା ଆମଦାନୀ ପରେ ଗଂଜାମ ଜିଲ୍ଲା ସମେତ ଫୁଲବାଣୀ, ଗଜପତି ଜିଲ୍ଲା ସମେତ ନିକଟସ୍ଥ ଅଂଚଳକୁ ରପ୍ତାନି କରାଯାଇଥାଏ । ହିଞ୍ଜିଳିକାଟୁ ବ୍ଳକ ବୁରୁପଡ଼ା, ଖଣ୍ଡରା, ଚାନ୍ଦୁଲ, ଖରିଡ଼ା, ସକିରି, ଆଲପୁର, ଶାସନ ଆମ୍ବଗାଁ, ରାଳବ, ନନ୍ଦିକ, ପୁଟିଆପଦର ପଂଚାୟତର ବହୁ ପରିବା ଚାଷୀ ପ୍ରାୟ ୧ ହଜାର ହେକ୍ଟର ଜମିରେ ବିଭିନ୍ନ ପ୍ରଜାତିର ପରିବା ଚାଷ କରିଥାନ୍ତି । କରୋନା ଭୁତାଣୂ ସଂକ୍ରମଣକୁ ରୋକିବା ପାଇଁ ଗତ ମାର୍ଚ୍ଚ ୨୨ ତାରିଖ ଠାରୁ ମେ ୩ ତାରିଖ ପର୍ଯ୍ୟନ୍ତ ସରକାର ଲକଡ଼ାଉନ ଘୋଷଣା କରିଥିଲେ ।
ପରେ ତୃତୀୟ ପର୍ଯ୍ୟାୟରେ ଆସନ୍ତା ମେ ୧୭ ତାରିଖ ପର୍ଯ୍ୟନ୍ତ ଲକଡ଼ାଉନ ଅବଧି ବୃଦ୍ଧି କରିଛନ୍ତି । ସଂପୃକ୍ତ ଅଂଚଳର ଚାଷୀ ମାନେ ଋଣ କରଜ କରି ଲଗାଇଥିବା ପରିବା ଚାଷରେ ଏକର ପିଛା ୪୦ ରୁ ୫୦ ହଜାର ଟଙ୍କା ପର୍ଯ୍ୟନ୍ତ ଖର୍ଚ୍ଚ କରି ବିଭିନ୍ନ ପ୍ରଜାତିର ପରିବା ଅମଳ କରିଥିବା ବେଳେ ବର୍ତମାନ ପରିବା ଚାହିଦା ବହୁ ନିମ୍ନସ୍ତରକୁ ଖସି ଆସିଛି । ବର୍ତମାନ ସଂପୃକ୍ତ ଅଂଚଳର ଚାଷୀକୂଳ ହଜାର ହଜାର ଟଙ୍କାର କୋବି, ଟମାଟ, ବାଇଗଣ. କଲରା ଫସଲ ଜମିରେ ପଡ଼ିରହିଛି । ଚାଷୀ ଏବେ ନିଜର ଅମଳ କରିଥିବା ପରିବାକୁ କାଟି ଜମିରେ ରଖିଛି । କୋବି ବିକ୍ରୟ କଲେ ଦର କିଲୋ ପିଛା ଖୁଚୁରା ଦରରେ ୫ ଟଙ୍କାରେ ବିକ୍ରି ହେଉଥିବା ବେଳେ ହୋଲସେଲ ଦର କିଲୋ ପିଛା ୩ ଟଙ୍କାରେ ବିକ୍ରି କରୁଛନ୍ତି ଚାଷୀ । ପରିବା ଚାଷୀ ମାନେ କରଜ କରି ହଜାର ହଜାର ଟଙ୍କାର ବିହନ ଲଗାଇ ଫସଲ ଆଦାୟର ମୂଲ୍ୟ ପାଇନାହାନ୍ତି ।
ଯାହା ଫଳରେ ହଜାର ହଜାର ଚାଷୀ ଜମିରେ ବିଭିନ୍ନ ପ୍ରଜାତିର ପରିବା ଅମଳ ପରେ ମୁଣ୍ଡରେ ହାତ ଦେଇ ବସିଛନ୍ତି । ତଥାପି କଷ୍ଟେମଷ୍ଟେ ଅମଳ ପରିବାକୁ ସୁଲଭ ମୂଲ୍ୟରେ ବିକ୍ରି କରି ପରିବାର ପ୍ରତିପୋଷଣ କରି ଆସୁଥିଲେ । ହେଲେ ଗତ କିଛି ଦିନ ଧରି ଦଇବ ଦାଉ ସାଧୁଛି । ଗତ କିଛି ସପ୍ତାହେ ଧରି ପ୍ରତ୍ୟେହ ଅପରାହ୍ନରେ କାଳବୈଶାଖୀ ପ୍ରଭାବରେ ଝଡ଼ବର୍ଷା ସାଙ୍ଗକୁ କୁଆପଥର ମାଡ଼ ଚାଷୀଙ୍କ ପାଇଁ ବୋଝ ଉପରେ ନଳିତା ବିଡ଼ା ସଦୃଶ ପାଲଟିଛି । ଶୁକ୍ରବାର ଅପରାହ୍ନରେ କାଳବୈଶାଖୀ ପ୍ରଭାବରେ ପ୍ରବଳ ବର୍ଷା ସାଙ୍ଗକୁ କ୍ଷୀପ୍ର ଗତିରେ ପବନ ବୋହିବାରୁ ଫସଲ ନଷ୍ଟ ହୋଇଛି । ବୁରୁପଡ଼ା ପଂଚାୟତର ପ୍ରାୟ ୫୦୦ରୁ ଉର୍ଦ୍ଧ୍ୱ ଚାଷୀ କୋବି, ଟମାଟ, ବାଇଗଣ. କଲରା ଚାଷ କରିଥିବା ଜଣାପଡ଼ିଛି । ଏଭଳି ପରିସ୍ଥିତିରେ ପରିବା ଯେତିକି ବିକ୍ରି ହେଉନି, ତାଠାରୁ ଅଧିକ ନଷ୍ଟ ହେଉଥିବା ନେଇ ପ୍ରତାପ ମଲ୍ଲିକ, ବାୟା ସେଠି, ଅଭି ସାମଲ, ବୁଦ୍ଧିଆ ସ୍ୱାଇଁ, ପ୍ରମୂଖ ଚାଷୀ ମାନେ କହିଛନ୍ତି । ଅନ୍ୟ ବର୍ଗର ଲୋକଙ୍କ ଭଳି ସରକାରୀ ସହାୟତା ପ୍ରଦାନ ଦିଗରେ ପ୍ରଶାସନ ପଦକ୍ଷେପ ଗ୍ରହଣ କରିବାକୁ ଚାଷୀକୂଳ ଅନୁରୋଧ କରିଛନ୍ତି ।