(ସଚେତନତାର ଅଭାବ,୨ ଗୋଟି କୁଟିଆ କନ୍ଧ ପରିବାରଙ୍କୁ ମିଳିପାରିଲା ନାହିଁ ସରକାରୀ ସହାୟତା ରାଶି)
ଓଡ଼ିଶା ତାଜା ନ୍ୟୁଜ୍ (୨୫ ଅକ୍ଟୋବର ସୋମବାର) କଳାହାଣ୍ଡି :- ଲାଞ୍ଜିଗଡ଼ ବ୍ଳକ ଅନ୍ତର୍ଗତ କାନକୁଟରୁ ପଞ୍ଚାୟତର କନ୍ଧବୋରି ଗାଁରେ ଘଟିଛି ଏକ ଅଭାବନୀୟ ଘଟଣା । ସୂଚନା ଅନୁସାରେ କନ୍ଧ ବୋରି ଗାଁର ଆଦୁନୁ ମାଝୀ (୩୦) ମହୁ ସଂଗ୍ରହ କରିବା ପାଇଁ ଗାଁ ନିକଟରେ ଥିବା ଜଙ୍ଗଲକୁ ଯାଇଥିଲେ । ହେଲେ ମହୁ ଫେଣାରୁ ବହୁତ ମହୁମାଛିଙ୍କୁ ଘଉଡାଇବା ପରେ ପୁଣି ମହୁମାଛିମାନେ ମିଶି ଆଦୁନୁକୁ ଆକ୍ରମଣ କରିଥିଲେ । ମହୁମାଛିର ବିଷ କ୍ରିୟା ଯୋଗୁଁ ଯୁବକ ଅତ୍ୟନ୍ତ ଗୁରୁତର ଅବସ୍ଥାରେ ବହୁ କଷ୍ଟରେ ଗାଁ ଶେଷ ମୁଣ୍ଡରେ ଥିବା ଏକ ପୋଲ ନିକଟକୁ ପହଞ୍ଚି ପାରିଥିଲେ ଓ ପୋଲ ଉପରେ ଶୋଇ ପଡ଼ିଥିଲେ । ଆଦୁନୁର ଗୁରୁତର ଅବସ୍ଥା ଦେଖି ରାସ୍ତାରେ ଯାଉଥିବା ଲୋକେ ତାକୁ ନେଇ ଘରେ ଛାଡିଥିଲେ ।
ଘର ଲୋକେ ଡାକ୍ତରଖାନା ନେବା ପୂର୍ବରୁ ଆଦୁନୁର ମୃତ୍ୟୁ ହୋଇଥିଲା । କିନ୍ତୁ ସଚେତନତାର ଅଭାଵ ଯୋଗୁଁ ଆଦୁନୁ ଶବ ବ୍ୟବଚ୍ଛେଦ ହୋଇ ପାରି ନ ଥିଲା । ମୃତ୍ୟୁ ପରେ ଗାଁରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ଏହା ପରେ ଆଦୁନୁର ପରିବାର ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି । ତାର ସ୍ତ୍ରୀ ରୁଖେ ମାଝୀ ଓ ଚାରି ଛୁଆ ବେସାହାରା ହୋଇ ପଡିଛନ୍ତି । ପରିବାରର ଏକ ମାତ୍ର ରୋଜଗାରିଆ ପୁଅ କୁ ହରାଇ ମା ମଧ୍ୟ ଭାଙ୍ଗି ପଡିଛି । ବର୍ତ୍ତମାନ ପରିବାରର ପ୍ରତିପୋଷଣ କିପରି ହେବ ସମସ୍ତେ ଚିନ୍ତା ପ୍ରକଟ କରିଛନ୍ତି ।
ସେହିପରି ଗତ ସେପ୍ଟେମ୍ବର ୧୯ ତାରିଖରେ ନିୟମଗିରି ପାହାଡ଼ର ପାଦ ଦେଶରେ ଥିବା ତ୍ରିଲୋଚନପୁର ପଞ୍ଚାୟତର ଫୁଲଡୁମେର ଗାଁର ବେରେଙ୍ଗ ମାଝୀ (୪୫) ଘରେ ଶୋଇଥିବା ସମୟରେ ତାଙ୍କୁ ବିଷାକ୍ତ ସାପ କାମୁଡି ଥିଲା । ଗାଁ ଲୋକେ ତାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାକୁ ନେବା ସମୟରେ ଅଧା ରାସ୍ତାରେ ତାଙ୍କର ମୃତ୍ୟୁ ଘଟିଥିଲା । ସ୍ତ୍ରୀ ପାଲାଡି ମାଝୀ ସ୍ୱାମୀ ବେରେଙ୍ଗଙ୍କ ଶବ ବ୍ୟବଚ୍ଛେଦ କରିବା ପାଇଁ ପ୍ରଶାସନ ସହିତ ଯୋଗାଯୋଗ କରିଥିଲେ ମଧ୍ୟ ସମ୍ଭବ ହୋଇ ନ ଥିଲା । ଗାଁ ନିକଟସ୍ଥ ଏକ ଗାଡ଼ିକୁ ଭଡା ଆକାରରେ ଶବ ବ୍ୟବଚ୍ଛେଦ ପାଇଁ ଲାଞ୍ଜିଗଡ଼କୁ ନେବା ପାଇଁ ୬ ରୁ ୭ ହଜାର ଟଙ୍କା ଦାବି କରିଥିବା ଯୋଗୁଁ ସ୍ତ୍ରୀ ପାଲାଡିଙ୍କ ପକ୍ଷରୁ ଅସମ୍ଭବ ହୋଇଥିଲା ।
ପରିବାରର ରୋଜଗାରିଆ ସ୍ୱାମୀ ଚାଲିଯିବା ପରେ ପାଲାଡି ନିଜ ୩ ଗୋଟି ସନ୍ତାନକୁ କିପରି ପ୍ରତିପୋଷଣ କରିବେ ସେହି ଚିନ୍ତାରେ ଭାଙ୍ଗି ପଡ଼ିଛନ୍ତି । ଲାଞ୍ଜିଗଡ଼ ବ୍ଳକରେ ଦାୟିତ୍ୱରେ ଥିବା ମେଡ଼ିକାଲ କର୍ମଚାରୀ ମାନେ ମାସ ମାସ ଧରି ଅଞ୍ଚଳକୁ ଯାଉନଥିବା ଓ ବିଭିନ୍ନ ସ୍ବେଚ୍ଛାସେବୀ ସଂଗଠନ କାର୍ଯ୍ୟ କରୁଥିବା ବେଳେ ଶତକଡ଼ା ୮୦ ପ୍ରତିଶତ କାର୍ଯ୍ୟ କାଗଜ ପତ୍ରରେ ଚାଲୁଥିବା ବେଳେ ଯୋଗାଯୋଗ ଅଭାବ ଯୋଗୁଁ ଏହି ଗରିବ ଆଦିମ ଜନଜାତି ବର୍ଗର ୨ ଗୋଟି ପରିବାର ଏବେ ସରକାରୀ ସହାୟତା ରାଶି ପାଇବାରୁ ବଞ୍ଚିତ ହୋଇଛନ୍ତି ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି ।
