ରୁପ୍ରା ଅଞ୍ଚଳରେ ଘୁର୍ଣ୍ଣିଝଡ, ବ୍ୟାପକ କ୍ଷୟକ୍ଷତି

ଓଡ଼ିଶା ତାଜା ନ୍ୟୁଜ ( ୮ ସେପ୍ଟେମ୍ବର ବୁଧବାର ) କଳାହାଣ୍ଡି :- କଳାହାଣ୍ଡି ଜିଲ୍ଲା ନର୍ଲାବ୍ଲକ ଅଧିନ ରୁପ୍ରା ଓ କର୍ମେଗାଁ ପଞ୍ଚାୟତ ଅଧିନ ଖମ୍ୱପଡା ଅଞ୍ଚଳରେ ହଠାତ୍ କଳାହାଣ୍ଡିଆ ମେଘ ଘୋଟି ଆସିବା ସହ ଶୁଁ ଶୁଁ ଗର୍ଜନ କରି ପ୍ରବଳ ବର୍ଷା ସାଙ୍ଗକୁ କାଳବୈଶାଖିର ତାଣ୍ଡବ ଦେଖିବାକୁ ମିଳିଛି । ସୂଚନାମତେ ସାଲିଙ୍ଗ ଯୋରର ଉପର ମୁଣ୍ଡରେ ଥିବା ରୁପ୍ରା ଗ୍ରାମର ଶ୍ୟାମ ସୁନ୍ଦର ସେନାପତିଙ୍କ ଧାନଜମି ଓ ଭାଲୁକଟାର ଅନି ସାହୁଙ୍କ ଜମିରୁ ଏହି କାଳବୈଶାଖି ର କେନ୍ଦ୍ରସ୍ଥଳ ହୋଇଥିବା ଜଣାପଡିଛି । ଫଳରେ ଏହି କାଳବୈଶାଖିର ପ୍ରଭାବ ଯୋଗୁଁ ଭାଲୁକଟାର ଅନି ସାହୁ ଓ ଦିତିକୃଷ୍ଣ ସାହୁଙ୍କ ଧାନଚାଷ ହୋଇଥିବା ଜମିରେ ବଡ ବଡ ଗଛ ଭାଙ୍ଗି ପଡିଥିବାରୁ ଧାନଚାଷ କ୍ଷତି ହେବା ସାଙ୍ଗକୁ ଦିତିକୃଷ୍ଣଙ୍କ ଜମିରେ ଥିବା ଏଲ୍ଆଇ ପଏଣ୍ଟରେ ଟ୍ରାନ୍ସଫରମ ମଧ୍ୟ ପଡିରହିଛି । ସେହିପରି ରୁପ୍ରା ଶ୍ରୀ ଅରବିନ୍ଦ ପୁର୍ଣ୍ଣାଙ୍ଗ ଶିକ୍ଷାକେନ୍ଦ୍ର ପଛପଟେ ଥିବା ବିନୋଦ ବିହାରୀ ସାହୁଙ୍କ ଜମିରେ ମଧ୍ୟ ଟ୍ରାନ୍ସଫରମର ପଡ଼ିଥିବା ଦେଖିବାକୁ ମିଳିଛି। ଏହି କାଳବୈଶାଖି ସମୟରେ ରୁପ୍ରା ପଟୁ ବାଇକରେ ଯାଉଥିବା ବେଳେ ଦୁଇଜଣ ବ୍ୟକ୍ତିଙ୍କ ଉପରେ ଏକ ଶାଗୁଆନ ଗଛ ମୂଳରୁ ଉପୁଡି ବାଇକ୍ ସବାରୀଙ୍କ ଉପରେ ପଡିଯିବାରୁ ସେମାନେ ବାଇକ୍ ସହ ଚାପିହୋଇ ଯାଇଥିଲେ ।

ସଙ୍ଗେ ସଙ୍ଗେ ସେଠାରେ ଉପସ୍ଥିତ ଥିବା ଲୋକେ ଦୌଡିଆସି ଟାଙ୍ଗିଆ ସାହାଯ୍ୟରେ ଗଛକାଟି ସେମାନଙ୍କୁ ଉଦ୍ଧାର କରିଥିବାରୁ ଅଳ୍ପକେ ବର୍ତ୍ତି ଯାଇଥିଲେ । ଏହି କାଳବୈଶାଖିର ତାଣ୍ଡବ ସବୁଆଡେ ହୋଇ ନ ଥିଲେ ହେଁ ୫୦ ମିଟର ପରିଧି ମଧ୍ୟରେ ଉତ୍ପତି ସ୍ଥଳ ଠାରୁ ଭାଲୁକଟା, ରୁପ୍ରା ହାଇସ୍କୁଲ୍ ପଡା, ଶ୍ରୀଅରବିନ୍ଦ ସ୍କୁଲ୍ ଓ ଶିବ ମନ୍ଦିର ପଡା ଦେଇ ଟାଙ୍ଗିରି ପାହାଡ ପର୍ଯ୍ୟନ୍ତ ଯାଇଥିବା ଜଣାପଡିଛି । ଫଳରେ ରୁପ୍ରା ଓ ରୁପ୍ରାରୋଡ୍ ମଧ୍ୟରେ ଅନେକ ଗଛ ଭାଙ୍ଗି ପଡି ରାସ୍ତା ଉପରେ ପଡିଥିବାରୁ ରାସ୍ତା ଜାମ୍ ରହି ଉଭୟ ପାର୍ଶ୍ୱରେ ଅନେକ ଯାନ ବାହାନ ଅଟକି ରହିଥିଲା । ସ୍ଥାନୀୟ ଲୋକଙ୍କ ସହଯୋଗ ଫଳରେ ଗଛକାଟି ରାସ୍ତା ସଫା କରିଥିବାରୁ ଗମନା ଗମନ ସ୍ୱାଭାବିକ ହୋଇଥିଲା । ଖମ୍ୱପଡାର ଜଗବନ୍ଧୁ ପୁଟେଲ ଓ ସଞ୍ଜୟ ମାଝୀଙ୍କ ଘରର ଆଜବେଷ୍ଟସ୍ ଉଡି ଯାଇଛି । ରୁପ୍ରାର ଦୁଇଜଣ ଆହତ ହୋଇଥିବା ବେଳେ ଖମ୍ୱପଡାର ରୁଦ୍ର ପୁଝାରୀ, ମଧୁ ପୁଝାରୀ, ରାଧାକାନ୍ତ ପୁଝାରୀ, ଅକୃର ମାଝୀ, କାନ୍ତ ପୁଝାରୀ, ଗୋପାଲ ପୁଝାରୀ, ରମେଶ ପୁଝାରୀ, ଗୋଲେଖ ଦୀପ, ଗୋଲାପ୍ ଦୀପ ଓ ରୁପ୍ରା ଗ୍ରାମର ନରେନ୍ଦ୍ର ଗୌଡ, ସୁରେଶ ସାହୁଙ୍କ କପା ଫସଲ ନଷ୍ଟ ହୋଇଥିବା ଦେଖିବାକୁ ମିଳିଛି । ଏବାବଦରେ ନର୍ଲା ତହସିଲଦାର ମାନସ ରଞ୍ଜନ ତ୍ରିପାଠୀଙ୍କ ମତାମତ ନେବାରୁ ବିଭାଗୀୟ ଅଧିକାରୀଙ୍କ କ୍ଷେତ୍ର ପରିଦର୍ଶନ କରିବା ପରେ ସରକାରୀ ନିୟମାନୁଯାୟୀ କ୍ଷତି ପୁରଣ ଦିଆଯିବ ବୋଲି କହିଥିଲେ । ( ରିପୋର୍ଟ ପ୍ରଦୀପ କୁମାର ଗଉଡ କଳାହାଣ୍ଡି ବ୍ୟୁରୋ ଚିଫ )