ଲକ୍ ଡାଉନ୍ ଅବଧିକୁ ମେ ୩ ଯାଏଁ ବୃଦ୍ଧି : ପ୍ରଧାନମନ୍ତ୍ରୀ ଘୋଷଣା

ଭୁବନେଶ୍ୱର, ରିପୋର୍ଟ ( ଓଡିଶା ତାଜା ନ୍ୟୁଜ୍‌ ) ମେ ୩ ଯାଏଁ ଲକ୍ ଡାଉନ୍ ,ମଙ୍ଗଳବାର, ଏପ୍ରିଲ 14.4.2020 :- ରାଜ୍ୟ ସରକାରମାନଙ୍କ ପଦକ୍ଷେପକୁ ମଧ୍ୟ ତାରିଫ୍ କରିଛନ୍ତି ପ୍ରଧାନମନ୍ତ୍ରୀ । ଉଚିତ ସମୟରେ ଉଚିତ ପଦକ୍ଷେପ ନେଇ ରାଜ୍ୟମାନେ କରୋନା ପରିସ୍ଥିତିକୁ ଭଲ ଭାବେ ସମ୍ଭାଳିଛନ୍ତି । ତେବେ ଆମକୁ ଆହୁରି ଅଧିକ ସତର୍କ ରହିବାକୁ ପଡ଼ିବ ବୋଲି ପ୍ରଧାନମନ୍ତ୍ରୀ କହିଛନ୍ତି । କରୋନା ସ୍ଥିତିର ମୁକାବିଲାରେ ଭାରତ ସରକାର ଯଥେଷ୍ଟ ଆଗୁଆ ପଦକ୍ଷେପ ନେଇଥିବାରୁ ଆଜି ସ୍ଥିତି ନିୟନ୍ତ୍ରଣରେ ଅଛି । ଭାରତ ତୁଳନାରେ ବଡ଼ ବଡ଼ ଦେଶଗୁଡ଼ିକରେ କରୋନା ସଂକ୍ରମଣ ୨୫/୩୦ ଗୁଣ ବଢ଼ିଛି । ଯଥେଷ୍ଟ ପୂର୍ବରୁ ଆମର ଆଗୁଆ ପଦକ୍ଷେପ ଏବଂ ଦେଶବାସୀଙ୍କ ତ୍ୟାଗ, ଅପୂର୍ବ ସହଯୋଗ ଯୋଗୁଁ ଏହା ସମ୍ଭବ ହୋଇପାରିଛି । ‘ସାମାଜିକ ଦୂରତ୍ୱ’ ରେ ଆମକୁ ବହୁତ ଲାଭ ମିଳିଛି । ଆର୍ଥିକ ଦୃଷ୍ଟିରୁ ଆମକୁ ବହୁତ ମୂଲ୍ୟ ଦେବାକୁ ପଡ଼ିଥିଲେ ମଧ୍ୟ ଜୀବନ ଆଗରେ ଏହାକୁ ତୁଳନା କରାଯାଇପାରିବ ନାହିଁ । ଯଦି ଆମେ ଯଥେଷ୍ଟ ପୂର୍ବରୁ ପଦକ୍ଷେପ ନେଇ ନ ଥାନ୍ତେ ତେବେ ଭାରତର ଅବସ୍ଥା କ’ଣ ହୋଇଥାଆନ୍ତା ତାହା ଭାବିଲେ ରୁମ ଟାଙ୍କୁରି ହୋଇଯାଉଛି ବୋଲି ପ୍ରଧାନମନ୍ତ୍ରୀ କହିଛନ୍ତି ମେ ୩ ଯାଏଁ ଲକ୍ ଡାଉନ୍ ଅବଧିକୁ ବୃଦ୍ଧି କରାଗଲା । ତେବେ କିଛି ଜରୁରୀ ଗତିବିଧି, ଚାଷୀମାନଙ୍କର ଜୀବନ ଜୀବିକା, ରବି ଫସଲ ଅମଳ ଆଦି କୁ ଧ୍ୟାନ ଦେଇଛନ୍ତି ପ୍ରଧାନମନ୍ତ୍ରୀ । କରୋନା ସ୍ଥିତିର ଜିଲ୍ଲା ଓ ଥାନାୱାରୀ ସମୀକ୍ଷା କରାଯିବ । ସ୍ଥିତିକୁ ଦେଖି ଏପ୍ରିଲ୍ ୨୦ ପରେ କିଛି କିଛି ଜାଗାରେ ଲକ ଡାଉନ୍ କଟକଣାକୁ ସର୍ତ୍ତମୂଳକ ଭାବେ ସାମାନ୍ୟ କୋହଳ କରାଯିବ । ଯଦି ସ୍ଥିତି ଠିକ୍ ନ ଥାଏ ତେବେ ଲକ୍ ଡାଉନ୍ କୁ ଆହୁରି କଡ଼ାକଡ଼ି କରାଯିବ । କରୋନା ସଂକ୍ରମଣକୁ ବଢ଼ିବାକୁ ଦିଆଯିବ ନାହିଁ ବୋଲି ପ୍ରଧାନମନ୍ତ୍ରୀ ସତର୍କ କରାଇଛନ୍ତି । ଆସନ୍ତାକାଲି ଏହାର ବିସ୍ତୃତ ଗାଇଡଲାଇନ୍ ଜାରି ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି । ଶେଷରେ ପ୍ରଧାନମନ୍ତ୍ରୀ ଭାରତର ବୈଜ୍ଞାନିକମାନଙ୍କୁ କରୋନା ଭୂତାଣୁ ପ୍ରତିଷେଧକ ଟୀକା ବାହାର କରିବା ଉଦ୍ୟମରେ ଗବେଷଣା ଜାରି ରଖି ସଫଳତା ପାଇବାକୁ ଆହ୍ୱାନ ଦେଇଥିଲେ । ଲୋକମାନେ ଲକ୍ ଡାଉନ୍ ରେ ସାମାଜିକ ଦୂରତ୍ୱ ବଜାୟ ରଖନ୍ତୁ ଏବଂ ନିୟମକୁ କଡ଼ାକଡ଼ି ପାଳନ କରନ୍ତୁ ବୋଲି ପ୍ରଧାନମନ୍ତ୍ରୀ ନିବେଦନ କରିଛନ୍ତି । ସୂଚନାଯୋଗ୍ୟ ଓଡ଼ିଶା ପ୍ରଥମ ରାଜ୍ୟ ଭାବେ ଲକ୍ ଡାଉନ୍ ଅବଧିକୁ ଏପ୍ରିଲ୍ ୩୦ ତାରିଖ ଯାଏଁ ପୂର୍ବରୁ ବଢ଼ାଇ ସାରିଛି । ଓଡ଼ିଶା ପରେ ଆହୁରି ୧୦ଟି ରାଜ୍ୟ ମଧ୍ୟ ଲକ୍ ଡାଉନ୍ ଅବଧିକୁ ବୃଦ୍ଧି କରିଛନ୍ତି ।