ଗୋଟିଏ ମିନିଟରେ ୩୪୮ଥର ମୁଥମାରି ସତ୍ୟପୀରଙ୍କ ଗିନିଜ ରେକର୍ଡ

ଓଡ଼ିଶା ତାଜା ନ୍ୟୁଜ (୨୫ ଜୁଲାଇ ରବିବାର) କଳାହାଣ୍ଡି :- କଳାହାଣ୍ଡି ଜିଲ୍ଲାର ଯୁବକ ସତ୍ୟପୀର ପଧାନ ଏଥର ୩୪୮ ଥର ମୁଷ୍ଟି ପ୍ରଘାତ କରି ଗିନିଜ ବୁକ୍ ବିଶ୍ଵ ରେକର୍ଡ ସ୍ଥାପନ କରିଛନ୍ତି । ସ୍ଲୋଭାକିଆ ଦେଶର ପ୍ରସିଦ୍ଧ ମୁଷ୍ଟି ଯୋଦ୍ଧା ପାଭେଲ ରୁଷୋଭଙ୍କର ଗିନିଜ ବିଶ୍ୱ ରେକର୍ଡ ଭାଙ୍ଗି ଭାରତର ନାଁରେ ପ୍ରସିଦ୍ଧି ଆଣିଥିବା ଶ୍ରୀ ପଧାନ ପୂର୍ବର ଗିନିଜ ରେକର୍ଡ ଭାଙ୍ଗିବା ପାଇଁ ଆବେଦନ କରିଥିଲେ । ଏହା ପରେ ତାଙ୍କୁ ଭୁବନେଶ୍ବର ସ୍ଥିତ ବୁଦ୍ଧ ମନ୍ଦିର ପରିସରରେ ଆୟୋଜିତ କାର୍ଯ୍ୟକ୍ରମରେ ଗୋଟିଏ ମିନିଟ ମଧ୍ୟରେ ଦୁଇ ହାତରେ ସର୍ବାଧିକ ୩୪୮ ଥର ମୁଥମାରି ନୂତନ ରେକର୍ଡର ଅଧିକାରୀ ହୋଇପାରିଥିଲେ ।

କଳାହାଣ୍ଡି ଜିଲ୍ଲା ଦେପୁର ଗ୍ରାମର ଅନିରୁଦ୍ଧ ପଧାନ ଓ ମାତା ଶକୁନ୍ତଳା ପଧାନଙ୍କ ସୁପୁତ୍ର ସତ୍ୟପୀର ଭାରତର ପଞ୍ଚମ୍ୟାନ ଭାବରେ ସୁପରିଚିତ ଥିବା ବେଳେ ଭୈ।ତିକ ଚିକିତ୍ସା ବିଜ୍ଞାନରେ ଉତ୍କଳ ବିଶ୍ୱବିଦ୍ୟାଳୟରୁ ସ୍ନାତକୋତ୍ତର ଉପାଧି ମଧ୍ୟ ହାସଲ କରିଥିବା ଜଣାଯାଏ । ପୂର୍ବରୁ ୨୦୧୭ ଓ ୨୦୧୮ ମସିହାରେ ଦୁଇଟି ଗିନିଜ ବିଶ୍ୱ ରେକର୍ଡ ସ୍ଥାପନ କରିଥିବା ସତ୍ୟପୀରଙ୍କ ଏହା ତୃତୀୟ ରେକର୍ଡ ଅଟେ। ଏହି ସଫଳତା ହାସଲ ପରେ ତାଙ୍କୁ ସାରା ଦେଶରୁ ଶୁଭେଚ୍ଛାର ସୁଅ ଛୁଟିଛି। (ରିପୋର୍ଟ ପ୍ରଦୀପ କୁମାର ଗଉଡ କଳାହାଣ୍ଡି ବ୍ୟୁରୋ ଚିଫ)