ମୋ କଲେଜ ଅଭିଯାନ ରେ ସାମିଲ ହୋଇ GM University କୁ ୩୦ ଲକ୍ଷ ଟଙ୍କା ପ୍ରଦାନ କରିଛନ୍ତି : ଉଚ୍ଚ ଶିକ୍ଷା ମନ୍ତ୍ରୀ ଅରୁଣ ସାହୁଙ୍କ ନାରାୟଣୀ ପଣ୍ଡାଙ୍କ ସାକ୍ଷାତତ୍କାର

ଓଡ଼ିଶା ତାଜା ନ୍ୟୁଜ ( ୧୮ ଜୁଲାଇ ରବିବାର ) ସମ୍ବଲପୁର  :- ବୟସ ୮୪ ବର୍ଷ। ତାଙ୍କ ଇଚ୍ଛା ଶକ୍ତି ଆଗରେ ହାର ମାନିଛି ବୟସ । କିଛି କରିବାର ନିଶା ପାଇଁ ମୋ କଲେଜ ଅଭିଯାନ ରେ ସାମିଲ ହୋଇ GM University କୁ ୩୦ ଲକ୍ଷ ଟଙ୍କା ପ୍ରଦାନ କରିଛନ୍ତି ସମ୍ବଲପୁର ର ଡାକ୍ତର ନାରାୟଣୀ ପଣ୍ଡା । ସମ୍ବଲପୁର ଗସ୍ତ ସମୟରେ ଉଚ୍ଚ ଶିକ୍ଷା ମନ୍ତ୍ରୀ ଅରୁଣ ସାହୁ ସେହି ହୃଦୟବାନ ମହିଳାଙ୍କ ସହିତ କିଛି ସମୟ ଅତିବାହିତ କରିଥିଲେ । ମନ୍ତ୍ରୀ ତାଙ୍କ ସହ ମୋ କଲେଜ ଅଭିଯାନ ପ୍ରତି ଥିବା ତାଙ୍କର ଶ୍ରଦ୍ଧା ଓ ଆନ୍ତରିକତା ବିଷୟରେ ପଚାରି ବୁଝିଥିଲେ ।

ମନ୍ତ୍ରୀ ତାଙ୍କୁ ପଚାରିଥିବା କିଛି ପ୍ରଶ୍ନର ଉତ୍ତର

୧- GM Collegeରେ ଆପଣ କେଉଁ ମସିହାରେ ପଢୁଥିଲେ ?

ଉ. ୧୯୫୩ ରୁ ୧୯୫୫ ମସିହା ପ୍ରଯ୍ୟନ୍ତ ଦୁଇବର୍ଷ ମୁଁ ସେହି କଲେଜ ରେ ଆଇ. ଏ. ସି ପଢ଼ୁଥିଲି। ପର ମୁହୂର୍ତ୍ତରେ ୧୯୫୭ ମସିହାରେ SCB college ରେ ମେଡିକାଲ ପଢିଲି। ସେହି ସମୟରେ ମେଡିକାଲ ପଢିବା ପାଇଁ GM College Trust ତରଫରୁ ପ୍ରତି ମାସରେ ୨୫ ଟଙ୍କା ଆକାରରେ ଛାତ୍ରବୃତ୍ତି ପ୍ରଦାନ କରାଯାଉ ଥିଲା ।

୨- ମୋ କଲେଜ ଅଭିଯାନ ପ୍ରତି ଆନ୍ତରିକତା କେବେଠାରୁ ଆପଣଙ୍କ ଭିତରେ ଜାଗ୍ରତ ହେଲା ?

ଉ. ଯେଉଁ କଲେଜ ପାଇଁ ମୁଁ ଆଜି ଡାକ୍ତରାଣୀ ହୋଇପାରିଛି, ତା ପାଇଁ ମୁଁ କିଛି କରିପାରୁନଥିବାରୁ ମନରେ ଅନେକ ଅବଶୋଷ ରହିଯାଇଥିଲା। ହେଲେ ଯେତେବେଳେ ମୁଖ୍ୟମନ୍ତ୍ରୀ ଙ୍କ କରକମଳରେ ମାର୍ଚ୍ଚ ୨୧, ୨୦୨୧ ତାରିଖରେ ମୋ କଲେଜ ଅଭିଯାନ ର ପୋର୍ଟାଲ ପୁରାତନ ଛାତ୍ର ଛାତ୍ରୀଙ୍କ ପାଇଁ ଉନ୍ମୋଚନ କରାଗଲା, ସେବେଠାରୁ ଏହା ପ୍ରତି ମୋର ଆଗ୍ରହ ସୃଷ୍ଟି ହେଲା। ମୋ ପ୍ରତି କଲେଜ ର ଯେଉଁ ଅବଦାନ ରହିଥିଲା ତାର ଋଣ ସୁଝିବା ଏହାହିଁ ପ୍ରକୃତ ମାଧ୍ୟମ ବୋଲି ମତେ ହୃଦବୋଧ ହେଲା ।

୩- ମୋ କଲେଜ ଅଭିଯାନ କୁ ନେଇ ଆପଣଙ୍କ ମତ କଣ ?

ଉ.- ମୋ କଲେଜ ଅଭିଯାନ ମାଧ୍ୟମରେ ଜଣେ ପୁରାତନ ଛାତ୍ର ଯେତିକି ଅର୍ଥ କଲେଜ କୁ ପ୍ରଦାନ କରିଥାଏ ତାର ଦୁଇ ଗୁଣ ଅର୍ଥ ରାଜ୍ୟ ସରକାର ସେହି କଲେଜକୁ ପ୍ରଦାନ କରିଥାନ୍ତି । ଏହା ନିଶ୍ଚିତଭାବେ ପ୍ରଶଂସା ଯୋଗ୍ୟ ।

୪- ଆପଣ ମୋ କଲେଜ ଅଭିଯାନ ରେ ସାମିଲ ହେଲା ପରେ ଅନ୍ୟକୁ କଣ ପ୍ରେରଣା ଦେବେ ?

ଉ.ମୁଁ ଡାକ୍ତର ଚାକିରୀ କରି ନିଜେ ପ୍ରତିଷ୍ଠିତ ହେବା ସହ କିଛି ଅର୍ଥ ରାଶି ଜମା କରି ରଖିଥିଲି, ସେହି ଜମା ପୁଞ୍ଜିକୁ ଭାଙ୍ଗି ମୁଁ କଲେଜ କୁ ଦାନ କରିଛି । ସମସ୍ତ ପୁରାତନ ଛାତ୍ର ଛାତ୍ରୀ ଙ୍କ ସହଯୋଗରେ ଶିକ୍ଷାନୁଷ୍ଠାନ ର ଗୁଣାତ୍ମକ ଓ ଶୈକ୍ଷିକ ବାତାବରଣ କୁ ପରିବର୍ଦ୍ଧିତ କରିବା ଲାଗି ଆରମ୍ଭ ହୋଇଛି ମୋ କଲେଜ ଅଭିଯାନ । ମୋ ଭଳି ସମସ୍ତ ପୁରାତନ ଛାତ୍ର ଛାତ୍ରୀମାନେ ସହଯୋଗ ର ହାତ ବଢ଼େଇ ନିଜ ନିଜ କଲେଜ କୁ ବିକାଶ କରିବାରେ ସହାୟକ ହୁଅନ୍ତୁ ।