କଟକଣା କୋହଳ ପରେ ସମସ୍ତେ ଢିଲା ; ସାମାଜିକ ଦୂରତ୍ୱ ରକ୍ଷା ଓ ମାସ୍କ ପରିଧାନକୁ ଭୂଲିଗଲେଣି ହିଞ୍ଜିଳିବାସୀ

ଓଡ଼ିଶା ତାଜା ନ୍ୟୁଜ (୧୪ ଜୁଲାଇ , ବୁଧବାର ) ହିଞ୍ଜିଳିକାଟୁ :-  ସମଗ୍ର ଗଞ୍ଜାମ ଜିଲ୍ଲାରେ କରୋନା ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବହୁତ କମିବାରେ ଲାଗିଛି । ଜୁଲାଇ ପହିଲାରୁ ରାଜ୍ୟରେ ଅନଲକ-୨ କାର୍ଯ୍ୟକାରୀ କରାଯିବା ସହ କରୋନା କଟକଣାକୁ କୋହଳ କରାଯାଇଛି । ଏଭଳି ସ୍ଥିତିରେ ଦୀର୍ଘ ୩ ମାସରୁ ଉର୍ଦ୍ଧ୍ୱ ସମୟ ଧରି ବନ୍ଦ ରହିଥିବା ସମସ୍ତ ବ୍ୟବସାୟିକ ପ୍ରତିଷ୍ଠାନ ଖୋଲିବା ସହିତ ଯାତାୟତ ଓ ଯାତ୍ରୀ ପରିବହନ ଚାଲୁ ରହିଛି । ଘରୁ ବାହାରକୁ ବାହାରିବା ପାଇଁ ଥିବା ପ୍ରତିବନ୍ଧକ ହଟିଛି । କରୋନା ସଂକ୍ରମଣ ବିପଦ ସମ୍ପୁର୍ଣ୍ଣ ମାତ୍ରାରେ ଟଳିନଥିବା ବେଳେ ଲୋକେ ଏହାକୁ ପୂର୍ବଭଳି ଖାତିର କରୁନଥିବା ଜଣାପଡ଼ିଛି । ଗଞ୍ଜାମ ଜିଲ୍ଲାର ୨ୟ ବୃହତମ ସହର ଭାବେ ପରିଗଣିତ ହିଞ୍ଜିଳିକାଟୁ ସହରରେ ଲୋକଙ୍କୁ ଦେଖିଲେ କରୋନା ସମ୍ପୁର୍ଣ୍ଣ ଉଭେଇ ଯାଇଥିବା ପରି ମନେହେଉଛି । ଲୋକଙ୍କ ମୁହଁରେ ମାସ୍କ ନଥିବା ବେଳେ ଖୋଲା ବଜାରରେ ଲୋକେ ବିନା ଦ୍ୱିଧାରେ ବୁଲାବୁଲି କରୁଥିବାର ଦେଖିବାକୁ ମିଳୁଛି । ନିଜ ଓ ପରିବାରର ସୁରକ୍ଷାକୁ ପଛରେ ପକାଇ କିଏ ବିନା ମାସ୍କରେ ବୁଲୁଛି ତ ଆଉ କିଏ ମାସ୍କକୁ ଲୋକ ଦେଖାଣିଆ ଭାବେ ଥୋଡ଼ିରେ ଓହଳାଇ ରଖୁଥିବାର ଦେଖିବାକୁ ମିଳୁଛି । କରୋନା ପାଇଁ ଅସ୍ତ୍ର ସାଜିଥିବା ମାସ୍କର ଗୁରୁତ୍ୱକୁ ଲୋକେ ବେଖାତିର କରୁଥିବା ବେଳେ ପୁଣି ୁବିପଦ ଘନେଇବା ନେଇ ଆଶଙ୍କା ସୃଷ୍ଟି ହୋଇଛି ।

ମହାମାରୀ କରୋନା ଭୁତାଣୁ ସଂକ୍ରମଣର ୨ୟ ଲହର ବ୍ୟାପିବା ପରଠାରୁ ସରକାର ଓ ପ୍ରଶାସନ ପକ୍ଷରୁ ଜନସାଧାରଣଙ୍କୁ ବାରମ୍ବାର ବିଭିନ୍ନ ଉପାୟରେ ସଚେତନ କରାଯାଉଛି । ସାମାଜିକ ଦୂରତ୍ୱ ରକ୍ଷା, ମାସ୍କ ବ୍ୟବହାର ଓ ହାତକୁ ବାରମ୍ବାର ସାବୁନ କିମ୍ବା ହ୍ୟାଣ୍ଡୱାସରେ ଧୋଇବା ପାଇଁ ପରାମର୍ଶ ଦିଆଯାଇଛି । ପ୍ରଥମେ ପ୍ରଥମେ ଏହା ଲୋକଙ୍କ ଅଭ୍ୟାସରେ ପରିଣତ ହୋଇଥିବା ବେଳେ ବର୍ତମାନ ଏହାକୁ ଲୋକ ସମ୍ପୁର୍ଣ୍ଣ ଭୂଲି ଯାଇଥିବା ପରି ମନେହେଉଛି । ହିଞ୍ଜିଳିକାଟୁ ପୌରାଂଚଳ ସମେତ ବ୍ଳକର ବିଭିନ୍ନ ଗ୍ରାମାଂଚଳର ବଜାର ଓ ଛକ ସ୍ଥାନ ମାନଙ୍କରେ ଲୋକେ ବିନା ମାସ୍କରେ ବୁଲୁଥିବା ସହ ଅକାରଣରେ ଖଟି କରୁଥିବାର ଦେଖିବାକୁ ମିଳୁଛି । ବ୍ୟବସାୟିକ ପ୍ରତିଷ୍ଠାନ ଗୁଡ଼ିକୁ ପଂଚସୂତ୍ରୀ ନିୟମ ପାଳନ କରିବା ସକାଶେ ପୌର ପ୍ରଶାସନ ପକ୍ଷରୁ କଡ଼ା ନିର୍ଦ୍ଦେଶ ରହିଥିଲେ ମଧ୍ୟ ସ୍ଥାନୀୟ ପୌରାଂଚଳର ବ୍ୟବସାୟିକ ପ୍ରତିଷ୍ଠାନ ଗୁଡ଼ିକ ଏହାର ଖୋଲା ଖୋଲି ଉଲଂଘନ କରୁଥିବାର ଦେଖିବାକୁ ମିଳୁଛି । ପୁଲିସ ଓ ପୌର ପ୍ରଶାସନ ପକ୍ଷରୁ ଚଢାଉ କରାଯାଇ ଜୋରିମାନା ଆଦାୟ କରାଯାଉଥିବା ବେଳେ କିଛି ଲୋକେ ବାହାରକୁ ଆସିଲେ ମାସ୍କ ପରିଧାନ କରୁଥିବା ବେଳେ ଆଉ କିଛି ପୁଲିସ କିମ୍ବା ପୌର କର୍ମଚାରୀଙ୍କୁ ଦେଖିଲେ ହିଁ ମାସ୍କ ପରିଧାନ କରୁଥିବାର ଦେଖିବାକୁ ମିଳିଛି । ସହରରୁ ଏଯାଏଁ କରୋନା ସଂକ୍ରମଣ ସମ୍ପୁର୍ଣ୍ଣ ହଟିନଥିବା ବେଳେ ସହରବାସୀ ଏହାକୁ ଖାତିର ନକଲେ ପୁଣି ଥରେ କରୋନା ସଂକ୍ରମଣ ଲେଉଟିବା ସମ୍ଭାବନାକୁ ଏଡ଼ାଇ ଦେଇ ହେବ ନାହିଁ ବୋଲି ସ୍ଥାନୀୟ ଅଂଚଳର ବୁଦ୍ଧିଜୀବି ମହଲରେ ମତ ପ୍ରକାଶ ପାଇଛି । ( ରିପୋର୍ଟ ଶୁସାନ୍ତ ପ୍ରଧାନ )