ଚିତା ମୁରୁଜ ରଥରେ ରଥାରୂଢ଼ ହେଲେ ପାବନ ଶ୍ରୀକ୍ଷେତ୍ରାଧିପତି ପାବନ ଶ୍ରୀକ୍ଷେତ୍ରରେ ରଥଯାତ୍ରା ରୀତିନୀତିରେ ସମ୍ପନ୍ନ

ଓଡ଼ିଶା ତାଜା ନ୍ୟୁଜ୍ (୧୨ ଜୁଲାଇ ସୋମବାର ) ହିଞ୍ଜିଳିକାଟୁ :- ହିଞ୍ଜିଳିକାଟୁ ପୈାରାଞ୍ଚଳ ବଇଞ୍ଚବଣିଆ ପାବନ ଶ୍ରୀକ୍ଷେତ୍ରର ଷୋଡଶତମ ରଥଯାତ୍ରା କୋଭିଡ କଟକଣା ଯୋଗୁଁ ମନ୍ଦିର ପରିସରରେ ସୁସମ୍ପନ୍ନ ହୋଇଛି । ସୋମବାର ଭୋରରୁ ଠାକୁର ମାନଙ୍କ ମଙ୍ଗଳ ଆଳତି, ବଲ୍ଲଭପୂଜା, ଦ୍ଵାରପାଳ ପୂଜା, ସୂର୍ଯ୍ୟପୂଜା ଆଦି ସମ୍ପଣ୍ଣ ପରେ ମଙ୍ଗଳାର୍ପଣ କରାଯାଇଥିଲା । ମନ୍ଦିରର ପାଟ ପୁରୋହିତ ପଣ୍ଡିତ ଗତିକୃଷ୍ଣ ମିଶ୍ର ଶର୍ମା ପୈରହିତ୍ୟ କରିଥିଲେ ।ପରେ ପରେ ମଇଲମ ଓ ପହଣ୍ଡି ପାଇଁ ସ୍ବତନ୍ତ୍ର ବେଶ କରାଯାଇ ଠାକୁର ମାନଙ୍କୁ ସେନାପଟ ଓ ଟାହ୍ୟା ଲାଗି କରାଯାଇଥିଲା । ଖେଚୁଡ଼ି ଓ ଅନ୍ନ ବ୍ୟଞ୍ଜନ ଭୋଗ ଅର୍ପଣ ପରେ ପହଣ୍ଡି ବିଜେ ଆରମ୍ଭ ହୋଇଥିଲା । ଅପରାହ୍ନ ଗୋଟାଏ ବେଳେ ପୂର୍ବ ଦ୍ଵାର ଦେଇ ଗୋଟି ପହଣ୍ଡିରେ ବଳଭଦ୍ର ମହାପ୍ରଭୁ, ଦେବୀ ସୁଭଦ୍ରା ଓ ପରିଶେଷରେ କଳାଠାକୁର ଶ୍ରୀ ଜଗନ୍ନାଥ ଦକ୍ଷିଣରୁ ପଶ୍ଚିମ, ଉତ୍ତର ଦିଗ ଦେଇ ସ୍ନାନ ମଣ୍ଡପକୁ ଅସ୍ଥାୟୀ ଗୁଣ୍ଡିଚା ମଣ୍ଡପ ରୂପେ ବ୍ୟବହାର କରାଯାଇଥିବା ଆଡପ ମଣ୍ଡପରେ ପଦାର୍ପଣ କରି ପ୍ରତିକାତ୍ମକ ମୁରୁଜ ରଥରେ ବିଜେ କରିଥିଲେ ।

ସେବାଧିପତି ଲିଙ୍ଗରାଜ ସାହୁ ଛେରାପହଁରା ନୀତି ସମ୍ପନ୍ନ କରିଥିଲେ ।ପରେ ଠାକୁରମାନଙ୍କୁ ଯାତ୍ରା ଵେଶରେ ସଜ୍ଜିତ କରାଯାଇଥିଲା । କର୍ପୁର ଆଳତି ପରେ ରଥ ଉପରେ ଭୋଗରାଗ ସମ୍ପନ୍ନ ହୋଇଥିଲା । ମନ୍ଦିର ପ୍ରଶାସନ ସେବକ ନିର୍ମଳ ମିଶ୍ରଙ୍କ ସମେତ ସଭାପତି ସେବକ ଜଗନ୍ନାଥ ସାହୁ, ସମ୍ପାଦକ ସେବକ ଲୋକନାଥ ସାହୁ, ନିଧି ସେବକ ହରିହର ପଣ୍ଡା, ଉପ ପ୍ରଶାସନିକ ସେବକ କୈଳାସ ସାବତ, ସେବାୟତ ସରୋଜ ନନ୍ଦ, ଉମାଶଙ୍କର ପଣ୍ଡା, ଶିଶିର ପଣ୍ଡା, ପଣ୍ଡିତ ହାଡୁ ମିଶ୍ର, ଦଇତାପତି ସେବକ ମନମୋହନ ଦାଶ, ଅଶୋକ ସାମନ୍ତରା, ମନୋଜ ସାହୁ, ଯୁଗଳ ପଣ୍ଡା, ଜଗନ୍ନାଥ ସାହୁଙ୍କ ସମେତ ପ୍ରଶାସନ ସେବାର ସେବକ ମାନେ ଉପସ୍ଥିତ ଥିଲେ । ରଥଯାତ୍ରାର ସମସ୍ତ ବିଧିବିଧାନ ସୁସଜ୍ଜିତ ଆଡପ ମଣ୍ଡପ ନିର୍ମାଣ ଠାରୁ ଆରମ୍ଭ କରି ଠାକୁର ମାନଙ୍କ ଵେଶ ବିନ୍ୟାସ, ପୂଜାର୍ଚ୍ଚନା ଆଦିର ସମସ୍ତ ଶ୍ରେୟ ମନ୍ଦିରରେ ମୁଖ୍ୟ ପୂଜକ ପଣ୍ଡିତ କୃଷ୍ଣଚନ୍ଦ୍ର ପଣ୍ଡାଙ୍କ ପ୍ରାପ୍ୟ । ସନ୍ଧ୍ୟାରେ ଠାକୁର ମାନଙ୍କ ଆଡପ ମଣ୍ଡପ ନୀତି ଅନୁଷ୍ଠିତ ହୋଇଥିଲା । ଅନୁରୂପ ଭାବେ ସ୍ଥାନୀୟ ପୈାରାଞ୍ଚଳ ବଡ ରଙ୍ଗଣି ସାହି ଓ ପାଟଣା ସାହି ଲକ୍ଷ୍ମୀ ନୃସିଂହ ଶ୍ରୀ ଜଗନ୍ନାଥ ମନ୍ଦିର ସମେତ ନିକଟବର୍ତ୍ତୀ ଗ୍ରାମାଞ୍ଚଳର ଜଗନ୍ନାଥ ମନ୍ଦିରରେ କୋଭିଡ କଟକଣା ସହ ନୀତିକାନ୍ତି ଅନୁଯାୟୀ ପ୍ରତିକାତ୍ମକ ରଥଯାତ୍ରା ଅନୁଷ୍ଠିତ ହୋଇଯାଇଛି ।