ପଞ୍ଚାୟତରେ ବିକାଶ ବାଟବଣା ସରକାରୀ ନଳକୂପ ହାଇଜାକ୍
ଓଡ଼ିଶା ତାଜା ନ୍ୟୁଜ (୨୮ ଜୁନ ସୋମବାର ) ହିଞ୍ଜିଳିକାଟୁ :- ସାଧାରଣ ଜନତାଙ୍କ ବିକାଶ ଲକ୍ଷ୍ୟରେ କାର୍ଯ୍ୟକାରୀ ହେଉଛି ବହୁ ଜନ ହିତକାରୀ ସରକାରୀ ଯୋଜନା।ଯୋଜନାର ସଫଳ ରୂପାୟନ ନିମନ୍ତେ ଉଭୟ ରାଜ୍ୟ ଓ କେନ୍ଦ୍ର ସରକାର ପ୍ରତିଶୃତି ବଦ୍ଧ।ସରକାରୀ ଯୋଜନାରୁ ସାଧାରଣ ଜନତା ଉପକୃତ ହେଲେ ଯୋଜନାର ବାସ୍ତବତା ପ୍ରତିଫଳିତ ହୁଏ ବୋଲି କୁହାଯାଏ ।କିନ୍ତୁ ବିକାଶ ନାମରେ ସରକାରୀ ଅର୍ଥ ବିନିଯୋଗରେ ଉଦ୍ଧିଷ୍ଟ ଯୋଜନାକୁ ଯଦି ମୋଡ଼ି ମକଚି ବାଟବଣା କରାଯାଏ ତେବେ ସାଧାରଣ ଲୋକେ ସୁଫଳ ପାଇବା ତ ଦୂରର କଥା ବିକାଶ କେବଳ ସଂଜ୍ଞାରେ ହିଁ ସୀମିତ ରହିଯାଏ ।ପଞ୍ଚାୟତ ଓ ଜଳ ପରିମଳ ବିଭାଗ ପକ୍ଷରୁ ପଞ୍ଚାୟତ ଗୁଡିକର ସଶକ୍ତିକରଣ ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଜନ କଲ୍ୟାଣକାରୀ ଯୋଜନା ସବୁ ପ୍ରସ୍ତୁତ କରିଛନ୍ତି । ପଞ୍ଚାୟତ ସ୍ତରରେ ଏସବୁ ଯୋଜନାର ସଫଳ ରୂପାୟନ ପାଇଁ ପର୍ଯ୍ୟାପ୍ତ ପରିମାଣରେ ଅର୍ଥ ବ୍ୟୟ ବରାଦ ବି କରାଯାଉଛି । କିନ୍ତୁ କ୍ଷମତାର ଅପବ୍ୟବହାର କରି ଜଣେ ଜନ ପ୍ରତିନିଧିଙ୍କ ସମେତ ବିଭାଗୀୟ ଅଧିକାରୀ ଏବଂ କର୍ମଚାରୀଙ୍କ ନିଷ୍କ୍ରିୟତା ଯୋଗୁଁ ସରକାରୀ ନଳକୂପ ପଞ୍ଚାୟତରେ ହାଇଜାକ୍ ହେବା ଚିତ୍ର ସାମ୍ନାକୁ ଆସି ଘଟଣାରେ ଦୁର୍ନୀତିର ଗନ୍ଧ ବାରି ହୋଇପଡିଛି । ପୂର୍ବରୁ ଚାନ୍ଦୁଲି ପଞ୍ଚାୟତରେ ଇନ୍ଦିରା ଆବାସ ଯୋଜନାରେ ୪୨ଟି ଆବଣ୍ଟିତ ଆବାସ ଗୃହର ଖୋଳତାଡ ବେଳେ ଦୁର୍ନୀତିର ଗନ୍ଧ ସ୍ପଷ୍ଟ ବାରି ହୋଇ ଚହଳ ସୃଷ୍ଟି କରିଥିଲା । ସେତେବେଳେ ଉକ୍ତ ପ୍ରସଙ୍ଗ ହିଞ୍ଜିଳିବ୍ଳକରେ ହଇଚଇ ସୃଷ୍ଟି କରି ପ୍ରଶାସନିକ କଳ ସହ ପଞ୍ଚାୟତ ପାଇଁ ଏକ ଆଡୁଆ ପରିସ୍ଥିତି ସୃଷ୍ଟି ହୋଇଥିଲା ।
ସମ୍ପ୍ରତି ମାମଲାଟି ଓଡ଼ିଶା ଉଚ୍ଚ ନ୍ୟାୟାଳୟରେ ବିଚାରାଧୀନ ରହିଛି । ଉକ୍ତ ଦୁର୍ନୀତିର ଗନ୍ଧ ଥମି ନ ଥିଲା ବେଳେ ପୁଣି ଆଉ ଏକ ଗୁରୁତର ପ୍ରସଙ୍ଗ ଏବେ ପଞ୍ଚାୟତରେ ମୁଣ୍ଡ ଟେକିଛି । ଘଟଣାରୁ ଦୁର୍ନୀତିର ବାସ୍ନା ବେଶ ବାରି ହୋଇ ପୁଣି ଥରେ ଚର୍ଚ୍ଚାସୃଷ୍ଟି କରିଛି । ସରକାରୀ ଜାଗା ଓ ସରକାରୀ ଅନୁଦାନରେ ନିର୍ମିତ ତଥା ସର୍ଵ ସାଧାରଣଙ୍କ ବ୍ୟବହାର ଲାଗି ଉଦ୍ଧିଷ୍ଟ ଏକ ନଳକୂପକୁ ଜାଣିଶୁଣି ପଞ୍ଚାୟତରେ ହାଇଜାକ୍ କରାଯାଇଥିବା ଜଣାପଡିଛି। ସୂଚନା ମୁତାବକ ସ୍ଥାନୀୟ ହିଞ୍ଜିଳିବ୍ଳକ ଗ୍ରାମ୍ୟ ଜଳ ଓ ପରିମଳ ବିଭାଗ ପକ୍ଷରୁ ଲକ୍ଷାଧିକ ଟଙ୍କା ବ୍ୟୟ ବରାଦ କରାଯାଇ ସମ୍ପୃକ୍ତ ପଞ୍ଚାୟତର ସରକାରୀ ଜାଗାରେ ଏକ ନୂତନ ନଳକୂପ ସ୍ଥାପନ ହୋଇଥିଲା।ଏଥିପାଇଁ ବର୍ତ୍ତମାନର କ୍ଷମତାସୀନ ଜନ ପ୍ରତିନିଧିଙ୍କ ଆଦେଶ ପ୍ରକାରେ ଖଣ୍ଡରା ଗ୍ରାମ ନିକଟରେ ସର୍ଵ ସାଧାରଣଙ୍କ ବ୍ୟବହାର ପାଇଁ ନଳକୂପ ସ୍ଥାପନ ନିମନ୍ତେ ଲକ୍ଷାଧିକ ଟଙ୍କା ଖର୍ଚ୍ଚ କରା ଯାଇଥିଲା।କିନ୍ତୁ ସମ୍ପୃକ୍ତ ଜନ ପ୍ରତିନିଧିଙ୍କ ଜଣେ ଘନିଷ୍ଠ ସହଯୋଗୀ ଚଞ୍ଚକତା କରି ସ୍ଥାପନର କିଛି ଦିନ ପରେ ନଳକୂପ ସହ କିଛି ସରକାରୀ ଜାଗାକୁ ବେଆଇନ ଭାବେ ନିଜ ଦଖଲକୁ ନେଇଥିବା ଜଣାପଡିଛି।ପରିସ୍ଥିତି ଏପରି ହୋଇଛି ଯେ ତୃଷାର୍ତ୍ତଟିଏ ପାଣି ମୁନ୍ଦିଏ ପିଇବାକୁ କଷ୍ଟସାଧ୍ୟ ହେବା ସହ ସରକାରୀ ଜାଗା ବି ଜବର ଦଖଲ କରାଯାଇଛି ।
ସେମାନଙ୍କ ତଣ୍ଟିରେ କଣ୍ଟା ଲାଗିଛି କହିଲେ ବି ଅତ୍ୟୁକ୍ତି ହେବନାହିଁ । ଏଭଳି ଭାବେ ଗତ ପ୍ରାୟ ୧ ବର୍ଷ ଧରି ଉକ୍ତ ସରକାରୀ ନଳକୂପ ସହ ସରକାରୀ ଜାଗା ଅକ୍ତିଆର ହୋଇଥିଲା ବେଳେ ଦାୟିତ୍ୱରେ ଥିବା ସ୍ଥାନୀୟ ଜଳ ଓ ପରିମଳ ବିଭାଗୀୟର ସହକାରୀ ନିର୍ବାହୀ ଯନ୍ତ୍ରୀ,କନିଷ୍ଠ ଯନ୍ତ୍ରୀ,ପିଇଓ ଓ ସରପଞ୍ଚଙ୍କ ଦୃଷ୍ଟି ଗୋଚର ହୋଇଥିଲେ ମଧ୍ୟ ଏ ସମ୍ପର୍କରେ ମୁହଁ ଖୋଲୁ ନ ଥିବା ପ୍ରସଙ୍ଗ ଏବେ ହାଟରେ ପଡି ଦାଣ୍ଡରେ ଗଡୁଛି।ଫଳରେ ସରକାରୀ ଯୋଜନା ବାଟବଣା ହୋଇ ସାଧାରଣ ଲୋକଙ୍କ ସ୍ୱାର୍ଥ ସାଧନ ହୋଇ ପାରୁନାହିଁ। କେଉଁ ଉଦ୍ଦେଶ୍ୟରେ ଏବଂ କାହା ଆଦେଶରେ ସରକାରୀ ତହବିଲରୁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ନଳକୂପଟି ନିର୍ମିତ ହୋଇଥିଲା ଏବେ ପ୍ରଶ୍ନ ଉଠି ଅନେକଙ୍କୁ ଏହା ଆଶ୍ଚର୍ଯ୍ୟାନ୍ବିତ କରିଛି।ଏଣୁ ଜିଲ୍ଲା ପ୍ରଶାସନ ଓ ସ୍ଥାନୀୟ ପ୍ରଶାସନ ଅଞ୍ଚଳର ବୃହତ୍ତର ସ୍ୱାର୍ଥ ପ୍ରତି ଦୃଷ୍ଟି ଦେଇ ଜବରଦଖଲ କାରୀର କବଳରୁ ସରକାରୀ ଜାଗା ଓ ସରକାରୀ ନଳକୂପ ଟିକୁ ଦଖଲମୁକ୍ତ କରିବା ସହ ଦୋଷୀଙ୍କ ପ୍ରତି ପ୍ରଶାସନିକ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଜନମତ ପ୍ରକାଶ ପାଇଛି।
( ରିପୋର୍ଟ ଶୁସାନ୍ତ ପ୍ରଧାନ )