ରାୟଗଡ଼ ବ୍ଲକର ସଦର ମହକୂମା ରାୟଗଡ଼ ଠାରେ ତୁରନ୍ତ ଇଣ୍ଡୋର ଷ୍ଟାଡିୟମ ଆରମ୍ଭ ନକଲେ ଆନ୍ଦୋଳନ ପାଇଁ ଯୁବକ ସଂଘର ଚେତାବନୀ

ଓଡ଼ିଶା ତାଜା ନ୍ୟୁଜ (୨୭ ଜୁନ୍‌ ରବିବାର ) ପାରଳାଖେମୁଣ୍ଡି :- ଗ୍ରାମାଞ୍ଚଳରେ କ୍ରୀଡା ଭତ୍ତିଭୂମିର ବିକାଶ ପାଇଁ ରାଜ୍ୟ ସରକାରଙ୍କ ପରିକଳ୍ପନା ଗଜପତି ଜିଲ୍ଲାରେ ସଠିକ କାର୍ଯ୍ୟକାରୀ ହୋଇପାରୁ ନାହିଁ । ଏହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଗଜପତିଜିଲ୍ଲାର ରାୟଗଡ ବ୍ଲକରେ । ଇନଡୋର ଷ୍ଟାଡିୟମ ନିର୍ମାଣ ପାଇଁ ଦୀର୍ଘ ଦିନ ଧରି ଦାବି ହୋଇ ଆସିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନଥିବାରୁ ସାଧାରଣରେ ଅସନ୍ତୋଷର ଦାନା ବାନ୍ଧୁଛି । ପିଡି ଡିଆର୍‌ଡିଏ ଅନାମ ଚରଣ ପାତ୍ର ରାୟଗଡ ବ୍ଲକ ପରିଦର୍ଶନରେ ଆସିଥିବା ବେଳେ ଏନେଇ ସ୍ଥାନୀୟ ଯୁବକ ମାନେ ଭେଟି ଦାବି ଜଣାଇ ଅତିଶୀଘ୍ର ଇନଡୋର ଷ୍ଟାଡିୟମ ନିର୍ମାଣ କରିବାକୁ ଦାବି କରିଛନ୍ତି । ତେବେ ଅତି ଶୀଘ୍ର କାର୍ଯ୍ୟ ଆରମ୍ଭ ନହେଲେ ଆଗାମୀ ଦିନରେ ଆନ୍ଦୋଳନର ରୂପ ନେବ ବୋଲି ସ୍ଥାନୀୟ ଯୁବକ ମାନେ ଚେତାବନୀ ଦେଇଛନ୍ତି ।

ପ୍ରକାଶ ଯେ, ଗଜପତି ଜିଲ୍ଲାରେ ଅନେକ ପ୍ରତିଭା ରହିଥିଲେ ମଧ୍ୟ ଭିତିଭୂମି ଅଭାବ ଯୋଗୁଁ ସେମାନଙ୍କ କ୍ରୀଡାର ବିକାଶରେ ବାଧା ସୃଷ୍ଟି ହେଉଛି । ଏହାକୁ ଦୃଷ୍ଟିରେ ରଖି ରାଜ୍ୟର ପ୍ରତି ବ୍ଲକରେ ଇନଡୋର ଷ୍ଟାଡିୟମ ନିର୍ମାଣ ପାଇଁ ରାଜ୍ୟ ସରକାର ପରିକଳ୍ପନା କରିଛନ୍ତି । ଏହି କ୍ରମରେ ରାୟଗଡ ବ୍ଲକରେ ମଧ୍ୟ ଇନଡୋର ଷ୍ଟାଡିୟମ ନିର୍ମାଣ କରିବା ପାଇଁ ଆଜି ଯାଏ ସ୍ଥାନ ଚିହ୍ନଟ ହେଉ ନଥିବାରୁ ସମସ୍ତ କ୍ରୀଡା ପ୍ରେମୀଙ୍କୁ ନିରାଶ କରିଛି । ଏହାକୁ ନେଇ ସ୍ଥାନୀୟ ଲୋକେ ପ୍ରଶାସନିକ ଅବହେଳାଏବଂ ରାଜନୈତିକ ଇଛା ଶକ୍ତିର ଅଭାବକୁ ଦାୟୀ କରିଛନ୍ତି । ଏନେଇ ପିଡି ଡିଆର୍‌ଡିଏ ଶ୍ରୀ ପାତ୍ରଙ୍କୁ ଯୁବକ ମାନେ ଭେଟି ଦାବି ଜଣାଇଥିବା ପରେ ସେ ସ୍ଥାନୀୟ ବିଡିଓଙ୍କୁ ଜାଗା ଚିହ୍ନଟ କରିବା ପାଇଁ ନିର୍ଦ୍ଦେଶ ଦେଇଛନ୍ତି । ଅତିଶୀଘ୍ର ଏହି ମିନି ଷ୍ଟାଡିୟମ ପାଇଁ ଜାଗା ଚିହ୍ନଟ ହୋଇ କାମ ଆରମ୍ଭ ନହେଲେ ଆଗାମୀ ଦିନରେ ନିଶ୍ଚିତ ଭାବେ ଆନ୍ଦୋଳନକୁ ଓହ୍ଲାଇବା ପାଇଁ ବାଧ୍ୟ ହେବୁ ବୋଲି ସ୍ଥାନୀୟ କ୍ରୀଡାବିତ ରାଜା ଦୋରା, ଅଶୋକ ପାଇକ, ପ୍ରଦୀପ ସାହୁ, କାଳିଆ ପାଇକ, ଚନ୍ଦନ ପାଇକଙ୍କ ସମେତ ଯୁବକସଂଘ ର ସଦସ୍ୟ ମାନେ ଚେତାବନୀ ଦେଇଛନ୍ତି l ( ରିପୋର୍ଟ – ଗରୁଡ଼ ଧ୍ଵଜ ଚୌଧୁରୀ )