ପୁରୀ, ତିନିରଥ ନିର୍ମାଣ – ମଙ୍ଗଳବାର ର ଅଗ୍ରଗତି – ତିନିରଥର ୩୭ ଗୋଟି ଚକର ନିର୍ମାଣ ଶେଷ

ମଙ୍ଗଳବାର ରଥ ଖଳାରୁ  :-  

ଓଡ଼ିଶା ତାଜା ନ୍ୟୁଜ୍ (୦୮ ଜୁନ୍,ମଙ୍ଗଳବାର ) ପୁରୀ  :- ଗତକାଲି ସୁଧା ତିନିରଥର ୩୭ ଗୋଟି ଚକର ନିର୍ମାଣ ଶେଷ ହୋଇଥିଲା, ଆଜି ତାଳଧ୍ଵଜ ରଥର ଗୋଟିଏ ଚକ ନିର୍ମାଣ ଶେଷ ହୋଇ ତିନିରଥର ମୋଟ-୩୮ ଚକ ସମ୍ପୂର୍ଣ୍ଣ ହୋଇଅଛି । ଏଥିସହ ତିନିରଥର ଚାରୋଟି ଲେଖାଁଏ ଚାରିନାହାକା ର ନିର୍ମାଣ କାର୍ଯ୍ୟ ଶେଷ ହୋଇ, ତିନି ରଥ ପାଇଁ ଦୁଇଟି ଲେଖାଁଏ ‘ଗରଗରା’ ଚଉପଟ କାମ ଚାଲୁଅଛି । ଏହାଛଡା ଗତ କାଲିଠାରୁ ଅନୁକୂଳ ପୂଜା ସରି ୯ ଗୋଟି ଦଣ୍ଡା ର ଚଉପଟ କାମ ଆରମ୍ଭ ହୋଇ ଆଜି ତିନୋଟି ଲେଖାଁଏ ଦଣ୍ଡାର ଚଉପଟ କାମ ଶେଷ ହୋଇଛି,ଏତତ୍ ବ୍ୟତୀତ ଦଣ୍ଡାରେ ସଂଯୋଗ ପାଇଁ ଦୁଇଟି ଲେଖାଁଏ ‘ମୁଁହାଟ’ ରେ ପାଂଚ ବିନ୍ଧ ଖୋଦେଇ କାମ ଶେଷ ହୋଇଅଛି । ଏହାଛଡା ଦୋଳବେଦୀ ଠାରେ ତାଳଧ୍ଵଜ ରଥର ‘ପୋଲ ଗୟଳ’ ଚିରଟ କାମ ଶେଷ ହୋଇ ଆଜି ନନ୍ଦିଘୋଷ ରଥର ‘ପୋଲ ଗୟଳ’ ଚିରଟ ପାଇଁ ଗୟଳ କାଠର ଉଭୟ ପାର୍ଶ୍ୱ ବାରିସୀରେ ସମତଳ କାମ ଚାଲୁଅଛି । ରୂପକାର ସେବକ ମାନେ ତିନି ରଥର ‘କୋଣ ଗୁଜ’ ରେ ସିଂହ- ବିରାଳ ରୂପ ଖୋଦେଇ କାମ ଜାରୀ ରଖି ଛନ୍ତି, ରୂପ ଖୋଦେଇ ପରେ ପଲିସ ସରି ଥିବା ମୂର୍ତି ଗୁଡିକରେ ଅଳଙ୍କାର ପକାଯାଉ ଅଛି ।

ରଥ ନିର୍ମାଣ ଅଗ୍ରଗତି :-

ମୋଟ ରଥ ନିର୍ମାଣକାରୀଙ୍କ ଉପସ୍ଥାନ ୧୯୪ ତିନିରଥର ମୋଟ ମହାରଣା ୭୭ ତିନି ରଥର ଭୋଇ ସେବକ ୭୩ ତିନିରଥର କରତି ସେବକ ୪ ପାହି ମହାରଣା ୧ ଓଝା ବା କମାର ସେବକ ୧୭ ତୁମ୍ବ ବିନ୍ଧ କାରୀଗର  ୨ ତିନିରଥର ରୂପକାର ସେବକ ୧୯ ରଥ ଖଳା ସହାୟକ ୧ ମୋଟ ୧୯୪

ତାଳଧ୍ଵଜ ଚାଳି :-

ଗତ କାଲି ସୁଧା ତାଳଧ୍ଵଜ ରଥର ୧୨ ଟି ଚକ ନିର୍ମାଣ ସମ୍ପୂର୍ଣ୍ଣ ହୋଇଥିଲା, ଆଜି ତାଳଧ୍ଵଜ ରଥର ୧୩ ନମ୍ବର ଚକର ନିର୍ମାଣ ଶେଷ ହୋଇ ଶେଷ ଚକ ୧୪ ନମ୍ବରଟିର କାମ ଆରମ୍ଭ ହୋଇଅଛି । ଏହାଛଡା ଗତ କାଲି ଠାରୁ ଦଣ୍ଡା ନିର୍ମାନପାଇଁ ଅନୁକୂଳ ପୂଜା ପରେ ଚଉପଟ କାମ ଆରମ୍ଭ ହୋଇ ଆଜି ତିନୋଟି ଦଣ୍ଡାର ଚଉପଟ କାମ ଶେଷ ହୋଇ ଛି । ଏଥିସହ ଦୁଇଟି ଲେଖାଁଏ ମୁଁହାଟ ର ବିନ୍ଧ ଖୋଦେଇ କାମ ଶେଷ ହୋଇଛି, ଦୁଇଟି ଗରଗରା ର ଚଉପଟ କାର୍ଯ୍ୟ ଚାଲୁ ରହିଛି। କାଲି ଠାରୁ ଶେଷ ହୋଇଥିବା ଚାରି ନାହାକାର ଚଉପଟ କାମ ଶେଷ ହୋଇଛି

ଦେବଦଳନ ଚାଳି :-

ଦେବଦଳନ ରଥର ୧୨ ଟି ଚକରୁ ୧୧ ଗୋଟି ଚକ ନିର୍ମାଣ ଶେଷ ହୋଇଥିଲା , ଶେଷ ୧୨ ନମ୍ବର ଚକ ନିର୍ମାଣ କାର୍ଯ୍ୟ ଆରମ୍ଭ ହୋଇଅଛି, କାଲିଠାରୁ ଦେବଦଳନ ରଥର ୯ ଗୋଟି ଦଣ୍ଡା ର ପୂଜା ଅନୁକୂଳ ହୋଇ ଚଉପଟ କାମ ଆରମ୍ଭ ହୋଇଥିଲା, ଆଜି ତିନୋଟି ଦଣ୍ଡାର ଚଉପଟ କାମ ଶେଷ ହୋଇଅଛି । ଦଣ୍ଡା ପାଇଁ ୧୦ ହାତ ୧୦ ଆଂଗୁଳି ମାପର ଦୁଇ ଗୋଟି ମୁହାଁଟ ର ପଞ୍ଚ ବିନ୍ଧ ଖୋଦେଇ କାର୍ଯ୍ୟ ଶେଷ ହୋଇଅଛି । ଏଥି ସହ ଦୁଇଗୋଟି ଗରଗରା ର ଚଉପଟ କାମ ଜାରୀରହିଛି । 

ନନ୍ଦିଘୋଷ ଚାଳି :-

ନନ୍ଦିଘୋଷ ରଥର ୧୬ ଟି ଚକରୁ ୧୪ ଗୋଟି ଚକର ନିର୍ମାଣ ଗତକାଲିଠାରୁ ଶେଷ ହୋଇଅଛି, ୧୫ ନମ୍ବର ଚକର ତୁମ୍ଵରେ ଅର ସଂଯୋଗ ହୋଇ ସିଙ୍ଗଡ଼ା କଣ୍ଟା ଵାଡ଼ିଆ କାମ ଶେଷ ହୋଇ ପଂଦାରୀ ଗାଡ଼ ଖୋଦେଇ ଚାଲୁଅଛି । ଗତ କାଲି ଠାରୁ ନନ୍ଦିଘୋଷ ରଥ ଚାରିନାହାକା କାମ ଶେଷ ହୋଇଥିଲା ଆଜି ସେହି ଚାରିନାହାକା ର ଦୁଇ ପାର୍ଶ୍ୱ ର ସାଲ କାମ ସମ୍ପୂର୍ଣ୍ଣ ହୋଇଅଛି । ଏହାଛଡା ଦୁଇଟି ଗରଗରା ର ଚଉପଟ କାମ ଜାରୀ ରହିଛି,କାଲିଠାରୁ ଅନୁକୂଳ ପୂଜା ହୋଇ ୯ଗୋଟି ଦଣ୍ଡାର ଚଉପଟ କାମ ଆରମ୍ଭ ହୋଇ ଆଜି ତିନି ଗୋଟି ଦଣ୍ଡାର ଚଉପଟ କାମ ସରିବା ସହ ଦଣ୍ଡାରେ ଖଞ୍ଜା ହେବାପାଇଁ ୨ଟି ମୁହାଁଟ ର ପଂଚବିନ୍ଧ ଖୋଦେଇ ଶେଷ ହୋଇଛି । ଆଜି ନନ୍ଦିଘୋଷ ରଥର ପୋଲ ଗୟଳ ଚିରଟ ପାଇଁ ଗୟଳ କାଠର ଦୁଇ ପାର୍ଶ୍ୱ ବାରିସୀ ରେ ସମତଳ କାର୍ଯ୍ୟ ଚାଲୁଅଛି ।

କମାର ଶାଳ :- 

ଦୋଳ ବେଦିସ୍ଥ ଅସ୍ଥାଇ କମାର ଶାଳ ରେ ତିନି ରଥର ଓଝା ସେବକ ମାନେ ଗରଗରା କଣ୍ଟା, ଦଣ୍ଡା ବିଡ଼ିଆ କଣ୍ଟା ନିର୍ମାଣ ସହ ପୋଡା ସରି ଥିବା ଅଗ ପାତେଲି କଣ୍ଟାର ମଠା କାମ ଆରମ୍ଭ ହୋଇଅଛି ।