କରୋନା ଛଡ଼ାଇ ନେଇଛି ଜୀବିକା ଲକଡ଼ାଉନରେ ଠେଲାଗାଡ଼ିରେ ବ୍ୟବସାୟୀଙ୍କ ଅବସ୍ଥା ଶୋଚନୀୟ

ଓଡ଼ିଶା ତାଜା ନ୍ୟୁଜ (୦୧ ଜୁନ ମଙ୍ଗଳବାର ) ହିଞ୍ଜିଳିକାଟୁ :-  ମହାମାରୀ କରୋନା ଭୁତାଣୁ ସଂକ୍ରମଣର ଦ୍ୱିତୀୟ ଲହର ସମସ୍ତଙ୍କ ପାଇଁ ଘାତକ ସାଜିଛି । ଦିନକୁ ଦିନ ସଂକ୍ରମିତ ଓ ମୃତ୍ୟୁ ସଂଖ୍ୟା ଆଶାତୀତ ଭାବେ ବୃଦ୍ଧି ପାଇବାରେ ଲାଗିଛି । ବୃଦ୍ଧି ପାଉଥିବାରୁ ସଂକ୍ରମଣ ଓ ମୃତ୍ୟୁ ସଂଖ୍ୟାକୁ ରୋକ ଦେବା ପାଇଁ ରାଜ୍ୟ ସରକାର ନାଇଟକର୍ଫ୍ୟୁ, ସପ୍ତାହନ୍ତ ସଟଡ଼ାଉନ ସମେତ ଆସନ୍ତା ୧୭ ତାରିଖ ପର୍ଯ୍ୟନ୍ତ ଲକଡ଼ାଉନ ଜାରି କରିଛନ୍ତି । ଏଭଳି ପରିସ୍ଥିତିରେ ଗରିବ ଓ ମଧ୍ୟବିତ ପରିବାରର ଲୋକମାନେ ନାନା ଅସୁବିଧାରେ କାଳାତିପାତ କରୁଥିବାର ଦେଖିବାକୁ ମିଳିଛି । ସଂକ୍ରମଣ ଭୟ ସାଙ୍ଗକୁ କଟକଣା ରୋଗାରର ପନ୍ଥାରେ କଂଟା ସାଜିଛି । ଯାହା ଗରିବ ଓ ମଧ୍ୟବିତ ପରିବାରକୁ ଆର୍ଥୀକ ଓ ମାନସିକ କ୍ଷେତ୍ରରେ ବେଶ ଦୁର୍ବଳ କରିଦେଇଛି । ଏପରିକି କରୋନା ସଂକ୍ରମଣର ଦ୍ୱିତୀୟ ଲହର ବହୁ ଗରିବ, ମଧ୍ୟବିତ ପରିବାର ସମେତ କ୍ଷୁଦ୍ର ବ୍ୟବସାୟୀଙ୍କ ଜୀବନ ଜୀବିକା ଛଡ଼ାଇ ନେଇଛି । କରୋନାକୁ ମାତ ଦେବା ପାଇଁ ରାଜ୍ୟ ସରକାର ଏପ୍ରିଲ ଶେଷ ସପ୍ତାହରୁ ୨ ଦିନିଆ ସପ୍ତାହନ୍ତ ସଟଡ଼ାଉନ (ଶନି ଓ ରବିବାର) ଜାରି କରିଥିବା ବେଳେ ଉବ ୫ ତାରିଖ ଠାରୁ ଆସନ୍ତା ୧୭ ତାରିଖ ପର୍ଯ୍ୟନ୍ତ ଲକଡ଼ାଉନ ଘୋଷଣା କରିଛନ୍ତି । ସପ୍ତାହନ୍ତ ସଟଡ଼ାଉନରେ ଔଷଧ ଦେକାନକୁ ବାଦ ଦେଲେ ଅନ୍ୟ ସମସ୍ତ ଦୋକାନ ବଜାର ବନ୍ଦ ରହୁଛି । ହେଲେ ଲକଡ଼ାଉନ ସମୟରେ କେବଳ ଅତ୍ୟାବଶ୍ୟକ ସାମଗ୍ରୀର ବ୍ୟବସାୟିକ ପ୍ରତିଷ୍ଠାନ ସକାଳ ୭ଟାରୁ ୧୧ଟା ପର୍ଯ୍ୟନ୍ତ ଖୋଲା ରହୁଥିବା ବେଳେ ଅବଶିଷ୍ଟ ସମୟ ବନ୍ଦ ରହୁଛି । ଏଭଳି ପରିସ୍ଥିତିରେ ଅତ୍ୟାବଶ୍ୟକ ସାମଗ୍ରୀକୁ ବାଦ ଦେଲେ ଅନ୍ୟ ସାମଗ୍ରୀର ବ୍ୟବସାୟ ସମ୍ପୁର୍ଣ୍ଣ ବନ୍ଦ ହେଇପଡ଼ିଛି ।

ହିଞ୍ଜିଳିକାଟୁ ପୌରାଂଚଳ ସମେତ ନିକଟବର୍ତି ଗ୍ରାମାଂଚଳର ବିଭିନ୍ନ ଛକ ସ୍ଥାନରେ ଠେଲା ଗାଡ଼ି ସହାୟତାରେ ଗୁପଚୁପ, ଚାଟ, ଦହିବରା, ଫାଷ୍ଟଫୁଡ଼ ଭଳି କ୍ଷୁଦ୍ର ବ୍ୟବସାୟ କରି ପରିବାର ପ୍ରତିପୋଷଣ କରୁଥିବା କ୍ଷୁଦ୍ର ବ୍ୟବସାୟୀଙ୍କ ଜୀବିକା ସମ୍ପୁର୍ଣ୍ଣ ଠପ୍‌ ହୋଇଯାଇଛି । କରୋନା କଟକଣା ପାଇଁ ପ୍ରାୟ ମାସଟିଏ ଧରି ବ୍ୟବସାୟ ବନ୍ଦ ରହିଥିବା ବେଳେ ଯାହା କିଛି ସଂଚିତ କରି ରଖିଥିଲେ, ସବୁକିଛି ସରିଗଲାଣି । ମହାମାରୀ କରୋନା ଭୁତାଣୁ ସଂକ୍ରମଣର ପ୍ରଥମ ଲହରରେ ଦୀର୍ଘ ୬ମାସ ଧରି ବ୍ୟବସାୟ ବନ୍ଦ ରହିଥିବା ବେଳେ ଧାର ଉଧାର କରି ବଂଚିଥିଲେ । ଅନଲକ ଆରମ୍ଭ ହେବା ପରେ କଟକଣା କୋହଳ କରାଯାଇଥିଲା । ଠେଲାଗାଡ଼ିରେ ବ୍ୟବସାୟ ଆରମ୍ଭ କରାଯାଇଥିଲେ ମଧ୍ୟ ବ୍ୟବସାୟ ଆଶାତୀତ ହୋଇନଥିଲା । ବ୍ୟବସାୟ ଜୋର ଧରିବା ବେଳେକୁ ପୁଣିଥରେ କରୋନାର ଦ୍ୱିତୀୟ ଲହର ଆତଙ୍କ ସୃଷ୍ଟି କରିଛି । ଯଦ୍ୱାରା କରୋନାକୁ ମାତ ଦେବା ପାଇଁ ରାଜ୍ୟ ସରକାର ବିଭିନ୍ନ କଟକଣା ଲାଗୁ କରିଛନ୍ତି । ଠେଲାଗାଡ଼ିରେ ଇଡ଼ିଲି, ଗୁପଚୁପ, ଚାଟ, ଦହିବରା, ପିଆଜି, ପକୁଡ଼ି, ଘୁୂଗୁନି, ଫାଷ୍ଟଫୁଡ଼ ଭଳି ବ୍ୟବସାୟ କରୁଥିବା ଠେଲାଗାଡ଼ିରେ ବ୍ୟବସାୟ କରୁଥିବା କ୍ଷୁଦ୍ର ବ୍ୟବସାୟୀଙ୍କ ଆର୍ଥୀକ ଅବସ୍ଥା ସମ୍ପୁର୍ଣ୍ଣ ଭାବେ ଠପ୍ ହୋଇଯାଇଛି । ଦିନକୁ ଦିନ ଲକଡ଼ାଉନ ଅବଧି ବୃଦ୍ଧି ପାଉଥିବା ବେଳେ କ୍ଷୁଦ୍ର ବ୍ୟବସାୟୀଙ୍କ ଚିନ୍ତା ବଢିବାରେ ଲାଗିଛି । ସ୍ଥାନୀୟ ଅଂଚଳର କ୍ଷୁଦ୍ର ବ୍ୟବସାୟୀ ମାନଙ୍କୁ ଚିହ୍ନଟ କରାଯାଇ ସରକାରୀ ସହାୟତା ପ୍ରଦାନ କରିବାକୁ ଯଥାନୀୟ ଅଂଚଳର କ୍ଷୁଦ୍ର ବ୍ୟବସାୟୀ ମାନେ ନିବେଦନ କରିଛନ୍ତି ।    ( ରିପୋର୍ଟ ଶୁସାନ୍ତ ପ୍ରଧାନ )