ଓଡ଼ିଶା ତାଜା ନ୍ୟୁଜ (୨୭ ମଇ ଗୁରୁବାର ) କୋରାଇ :- ବାତ୍ୟା ‘ୟସ’ର ପ୍ରଭାବରେ ବୈତରଣୀ ନଦୀରେ ଉପରମୁଣ୍ଡ କେନ୍ଦୁଝର ଜିଲାର ଠାକୁରମୁଣ୍ଡା, ସୋମପାଟଣା ଆଦି ସ୍ଥାନରେ ପ୍ରବଳ ଅତିପ୍ରବଳ ଭାବେ ବର୍ଷା ହୋଇଥିବାର ବୈତରଣୀ ନଦୀରେ ବନ୍ୟାଜଳ ପ୍ରବେଶ କରିଛି । ଆନନ୍ଦପୁର ଠାରେ ବିପଦ ସଂକେତ ୩୮.୩୬ ରହିଥିବା ବେଳେ ଏହାର ଉପରେ ୩୮.୭୦ମିଟର ବନ୍ୟାଜଳ ପ୍ରବାହିତ ହେଉଛି ।
ସେହିପରି ଆଖୁଆପଦା ଠାରେ ବିପଦ ସଙ୍କେତ ୧୭.୮୩ ମିଟର ଥିବା ବେଳେ ଅପରାହ୍ନ ସୁଦ୍ଧା ୧୮.୦୦ମିଟରେ ଜଳ ପ୍ରବାହିତ ହେଉଥିବା ଜଳସେଚନ ବିଭାଗ ପକ୍ଷରୁ ସୂଚନା ମିଳିଛି । ବାତ୍ୟା ପ୍ରଭାବରୁ ବୈତରଣୀ ନଦୀରେ ଆଗୁଆ ବନ୍ୟାଜଳ ପ୍ରଭାହିତ ହୋଇଥିବାରୁ କୋରାଇ ବ୍ଲକର ରଣପୁର, ଗୌରପୁର, ମକୁନ୍ଦପୁର, ବନ୍ଦାଳୋ, ମୂଳାପାଳ ଆଦି ଗ୍ରାମରେ ବନ୍ୟାଜଳ ପ୍ରବେଶ କରିଛି ।
ବୈତରଣୀ ନଦୀର ମଥୁରାପୁର ନିକଟରେ ନଦୀବନ୍ଧ ଅସଂପୂଣ୍ଣ ର୍ ରହିଥିବାରୁ ନଦୀରୁ ପାଣି ବହାରି ମକୁନ୍ଦପୁର, ନିଶଙ୍ଖପୁର, ନାୟାହାଟପାଟଣା, ମଙ୍ଗଳପୁର , ସାଆଁଳା ଆଦି ଗ୍ରାମରେ ବନ୍ୟାଜଳ ପ୍ରବେଶ କରିବା ସହ ଖରିଫ ଚାଷ ପାଇଁ ପ୍ରସ୍ତୁତ ବହୁ ଚାଷ ଜମି ଜଳମଗ୍ନ ହୋଇଛି । ନଦୀର ପଠାରେ ଅବସ୍ଥିତ ବନ୍ଦାଳୋ ପଂଚାୟତର ଦୁଲାଖାପାଟଣା, ଗମ୍ଭାରିଆ, ଶାଳବା ଆଦି ଗ୍ରାମରେ ବନ୍ୟା ଜଳ ପ୍ରବେଶ କରି ଜଳବନ୍ଦୀରେ ରଖିଛି ।
