ହିଞ୍ଜିଳି ତହସିଲ ପକ୍ଷରୁ “ରାଜସ୍ବ ରଥ”ର ଶୁଭାରମ୍ଭ ; ପ୍ରଥମ ଦିବସରେ ୩୦ ହିତାଧିକାରୀ ପାଇଲେ ଜମିପଟ୍ଟା

ଓଡ଼ିଶା ତାଜା ନ୍ୟୁଜ (୧୪ ମେ ଶୁକ୍ରବାର )ହିଞ୍ଜିଳିକାଟୁ :- ମହାମାରୀ କରୋନା ସମୟରେ ହିତାଧିକାରୀଙ୍କ ହାତ ପାହାନ୍ତାରେ ରାଜସ୍ୱ ସେବା ଯୋଗାଇ ଦେବା ଉଦ୍ଦେଶ୍ୟରେ ରାଜ୍ୟ ସରକାର ଆରମ୍ଭ କରିଛନ୍ତି “ରାଜସ୍ୱ ରଥ”।ଗାଁ ଗାଁ ରେ ବୁଲୁଛି ରଥ ଏବଂ ସାଧାରଣ ଲୋକେ ଆଉ ରାଜସ୍ବ ନିରୀକ୍ଷକଙ୍କ କିମ୍ବା ତହସିଲ କାର୍ଯ୍ୟାଳୟକୁ ଆଉ ଦୌଡ଼ିବାକୁ ପଡିବ ନାହିଁ । ଗତ ବର୍ଷ ଗଞ୍ଜାମ ଜିଲ୍ଲାରେ ଆରମ୍ଭ ହୋଇଥିଲା” ମୋ ଗାଁ ରେ ତହସିଲ” କାର୍ଯ୍ୟକ୍ରମ । ରାଜ୍ୟର ପ୍ରଥମ ଜିଲ୍ଲା ଗଞ୍ଜାମ ପରୀକ୍ଷା ମୂଳକ ଭାବେ ଏହାକୁ ଆରମ୍ଭ କରି ବେଶ ସଫଳତା ହାସଲ କରିଥିଲା । ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେଙ୍କ ଏହି ସୁଦୂର ପ୍ରସାରୀ ପଦକ୍ଷେପ ବିଭାଗୀୟ ଅଧିକାରୀ ଏବଂ କର୍ମଚାରୀଙ୍କ ନିଷ୍ଠା ଓ କର୍ତ୍ତବ୍ୟ ବୋଧ ଯୋଗୁଁ ବେଶ ଲୋକପ୍ରିୟ ହୋଇ ପାରିଛି।ରାଜ୍ୟ ସରକାରଙ୍କ ୫ ଟି ଓ “ମୋ ସରକାର” କାର୍ଯ୍ୟ ଯୋଜନାରେ ସାମିଲ ହୋଇଛି ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ । ବିଭାଗୀୟ ପ୍ରମୁଖ ସଚିବ ବିଷ୍ଣୁପଦ ସେଠୀ ୨ଟି ଜିଲ୍ଲାରେ ସଫଳତା ମିଳିବା ପରେ ଅବଶିଷ୍ଟ ୨୭ ଟି ଜିଲ୍ଲାର ଜିଲ୍ଲାପାଳଙ୍କୁ ରାଜସ୍ୱ ରଥ ଚଳାଇବାକୁ ଚିଠି ଲେଖି ନିର୍ଦ୍ଦେଶ ଦେଇଛନ୍ତି ।

ସମ୍ପ୍ରତି ରାଜ୍ୟରେ ଦେଖାଦେଇଛି ମହାମାରୀ କରୋନାର ଭୟାବହତା।ରାଜ୍ୟରେ କରୋନା ସଂକ୍ରମଣ ଯୋଗୁଁ ତଥା ସରକାରୀ କର୍ମଚାରୀଙ୍କ ସୁରକ୍ଷା ପାଇଁ ଓଡ଼ିଶା ସରକାରଙ୍କ ଦ୍ୱାରା ଜାରୀ ହୋଇଥିବା ମାର୍ଗଦର୍ଶିକା ଅନୁଯାୟୀ ରାଜସ୍ୱ କାର୍ଯ୍ୟାଳୟରେ ଜନ ସାଧାରଣଙ୍କ ପ୍ରବେଶକୁ ବନ୍ଦ କରାଯାଇଛି।ଘରେ କୌଣସି ଇଣ୍ଟରନେଟ ସୁବିଧା ନ ଥିବା କିମ୍ବା ଡିଜିଟାଲ ସାକ୍ଷରତା ଅଭାବ ଥିବା ବ୍ୟକ୍ତିମାନେ ସହାୟତା ପାଇଁ ରାଜସ୍ୱ କାର୍ଯ୍ୟାଳୟ କିମ୍ବା ମୋ ସେବା କେନ୍ଦ୍ର ସହ ପ୍ରତ୍ୟକ୍ଷ ଭାବେ ଜଡ଼ିତ ଥାନ୍ତି। ବର୍ତ୍ତମାନ ରାଜ୍ୟରେ କରୋନା ର ଦ୍ଵିତୀୟ ଲହର ଘାତକ ସାବ୍ୟସ୍ତ ହେବା ଫଳରେ ହିଞ୍ଜିଳି ତହସିଲ ଅଞ୍ଚଳରେ ଶୁକ୍ରବାର ଗଡ଼ିଛି “ରାଜସ୍ବ ରଥ”।ଏହି ପରିପ୍ରେକ୍ଷୀରେ ହିଞ୍ଜିଳିକାଟୁ ତହସିଲଦାର ପ୍ରଭାତ କୁମାର ପରିଡା ଙ୍କ ସୌଜନ୍ୟରେ ରଥର ଶୁଭାରମ୍ଭ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।ସମ୍ମାନିତ ଅତିଥି ଭାବେ ବ୍ଳକ ଅଧ୍ୟକ୍ଷ ଏନ ରଘୁନାଥ,ବିଡ଼ିଓ ସୁବ୍ରତ କୁମାର ଜେନା,ପୌର କାର୍ଯ୍ୟ ନିର୍ବାହୀ ଅଧିକାରୀ ଡଃ ମନୋରଞ୍ଜନ ସାହୁ ଓ ଭାରପ୍ରାପ୍ତ ଥାନା ଅଧିକାରୀ ଅଭିମନ୍ୟୁ ଦାସ ପ୍ରମୁଖ ଯୋଗ ଦେଇଥିଲେ।ବ୍ଳକ ଅଧ୍ୟକ୍ଷ ଏନ ରଘୁନାଥ ଓ ବିଡ଼ିଓ ଶ୍ରୀ ଜେନା ଆନୁଷ୍ଠାନିକ ଭାବେ ପୂଜାର୍ଚ୍ଚନା କରିଥିଲେ । ବିଡ଼ିଓ ଶ୍ରୀ ଜେନାଙ୍କୁ ତହସିଲଦାର ଶ୍ରୀ ପରିଡା ପ୍ରଥମେ ଘରପଟ୍ଟା ପ୍ରଦାନ କରିଥିଲେ।ପରେ ଅତିଥିମାନେ ସବୁଜ ରଙ୍ଗର ପତାକା ଦେଖାଇ ସୁସଜ୍ଜିତ ରାଜସ୍ୱ ରଥ ଗଡାଇ ଥିଲେ।

ପରେ ରଥ ବୁରୁପଡା ରାଜସ୍ୱ ଗ୍ରାମରେ ପହଞ୍ଚି ଅବଶିଷ୍ଟ ୨୯ ହିତାଧିକାରୀଙ୍କୁ ଘରପଟ୍ଟା ଓ ଅନ୍ୟାନ୍ୟ ରାଜସ୍ୱ ସେବା ପ୍ରଦାନ କରିଛି।କୋଭିଡ ମହାମାରୀ ପ୍ରଭାବ ଥିବା ଯାଏଁ ଜାତିଗତ ପ୍ରମାଣ ପତ୍ର, ମ୍ୟୁଟେସନ କାଗଜପତ୍ର ଆଦି ରାଜସ୍ୱସେବା ଅବ୍ୟାହତ ରହିବା ସହିତ ଆଗାମୀ ଦିନରେ ହିଞ୍ଜିଳି ତହସିଲର ସମସ୍ତ ରାଜସ୍ୱ ଗ୍ରାମରେ ଏଭଳି କାର୍ଯ୍ୟକ୍ରମ ମାଧ୍ୟମରେ ଜନସାଧାରଣଙ୍କୁ ହାତ ପାହାନ୍ତାର ସେବା ଯୋଗାଇ ଦିଆଯିବ ବୋଲି ତହସିଲଦାର ଶ୍ରୀ ପରିଡା ସୂଚନା ଦେଇଛନ୍ତି।ଅନ୍ୟ ମାନଙ୍କ ମଧ୍ୟରେ ଅତିରିକ୍ତ ତହସିଲଦାର ସୁନିଲ କୁମାର ପ୍ରଧାନ,ମୁଖ୍ୟ କିରାଣୀ କାଳୁ ସାହୁ, ବୁରୁପୋଡା ରାଜସ୍ୱ ନିରୀକ୍ଷକ ସୁଧାଂଶୁ ଶେଖର ପାଣିଗ୍ରାହୀ, ହିଞ୍ଜିଳି ଆରଆଇ ଅରବିନ୍ଦ ଦାସ, ନନ୍ଦିକ ଆରଆଇ କୃଷ୍ଣଚନ୍ଦ୍ର ଯାନୀ,ହେମା ଯାନୀ, ଲଳିତ ବେହେରା,ସୁଶାନ୍ତ କୁମାର ପାତ୍ର,ନିରଞ୍ଜନ ବେହେରା,ଗୋବିନ୍ଦ ଚନ୍ଦ୍ର ବ୍ରହ୍ମା,ଏନ କୃଷ୍ଣ ମୂର୍ତ୍ତି,ରବୀନ୍ଦ୍ର ମହାନ୍ତି, ଭିକାରୀ ପ୍ରଧାନ, ଚନ୍ଦ୍ର ବେହେରା ଓ ପି.ଜୟ ପ୍ରମୁଖ ଉପସ୍ଥିତ ଥିଲେ । କାର୍ଯ୍ୟକ୍ରମକୁ ହିଞ୍ଜିଳିକାଟୁ ତହସିଲ କର୍ମଚାରୀ ମାନେ ସହଯୋଗ କରିଥିଲେ । ( ରିପୋର୍ଟ : ଶୁସାନ୍ତ ପ୍ରଧାନ )