ଆଜିଠୁ ତରାପୁର ହିଙ୍ଗୁଳା ଯାତ୍ରା ଆରମ୍ଭ କରୋନା କଟକଣା ଅନୁଯାୟୀ ହେବ ମା’ଙ୍କ ପୂଜା ଓ ଯଜ୍ଞୋତ୍ସବ

ଓଡ଼ିଶା ତାଜା ନ୍ୟୁଜ (୨୫ ଅପ୍ରେଲ ରବିବାର )କୋରାଇ :- ଲକ୍ଷ୍ମୀନଗର ପଂଚାୟତ ଅନ୍ତର୍ଗତ ତରାପୁର ମା’ହିଙ୍ଗୁଳା ଦେବୀଙ୍କ ୮୫ତମ ମହାଯଜ୍ଞ ଓ ନାମଯଜ୍ଞ ୨୬ତାରିଖ ସୋମବାର ଠାରୁ ଆରମ୍ଭ ହୋଇ ମେ ମାସ ୪ତାରିଖର ପର୍ଯ୍ୟନ୍ତ ଅନୁଷ୍ଠିତ ହେବ । ଏହି ହିଙ୍ଗୁଳା ଯାତ୍ର ୯ଦିନ ଯାଏ ହେବାକୁ ଥିଲା ବେଳେ ପୂଜା ଓ ଯଜ୍ଞଉତ୍ସବ ସଂପୂର୍ଣ୍ଣ ଭାବେ କରୋନା କଟକଣା ଅନୁଯାୟୀ ଅନୁଷ୍ଠିତ ହେବ । ଏନେଇ ଏକ ପ୍ରସ୍ତୁତି ବୈଠକ ଆଂଚଳିକ ହିଙ୍ଗୁଳା କମିଟି ପକ୍ଷରୁ ସଭାପତି ପ୍ରଭାତକୁମାର ମଲ୍ଲିଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିଲା । କମିଟିର ସଂପାଦକ ନନ୍ଦକିଶୋର ସାହୁ ମେଳାର ପ୍ରସ୍ତୁତି ଖସଡା ଅନୁଯାଇ ଲଟେରି, ନିଲାମ ଡାକ, ଜୁଆଖେଳ, ଗଣନାଟ୍ୟ ପରିବେଷଣକୁ ନିଷିଧ କରାଯାଇଥିଲା ବେଳେ ଯଜ୍ଞ ସମୟରେ ଆମିଷ ଭୋଜନ ଓ ରାତ୍ରି ପାକକୁ ନିଷିଧ ନିମନ୍ତେ ସୂଚନା ଦେଇଥିଲେ । ମା’ଙ୍କ ପୂଜାର ଶୁଭାଧିବାସ ୨୬ତାରିଖ ସୋମବାର ରାତି ୯ଟାରେ ଧ୍ୱଜା ଶୋଭାଯାତ୍ରା ଅନୁଷ୍ଠିତ ହେବା ସହ ୨୭ତାରିଖ ମଙ୍ଗଳବାର ମହାଯଜ୍ଞ ଓ ନାମଯଜ୍ଞର ଶୁମାଧିବାସ ଓ ୨୮ତାରିଖ ବୁଧବାର ଯଜ୍ଞ ଓ ନାମସଂକୀର୍ତ୍ତନ ଓ ୩୦ତାରିଖ ଶୁକ୍ରବାର ରାତ୍ର ୪ଘଟିକାରେ ପୂର୍ଣ୍ଣାହୂତି ହେବ ।

ମେ ୧ତାରିଖ ଶନିବାର ପ୍ରଭାତରୁ ଚରୁବଂଟନ ହେବା ସହ ନାମଯଜ୍ଞର ନଗର ଭ୍ରମଣ ଓ ଦଧିଭାଣ୍ଡ ଭଞ୍ଜନ ଅନୁଷ୍ଠିତ ହେବ । ମେ ମାସ ୪ତାରିଖ ମଙ୍ଗଳବାର ଯଜ୍ଞଭସ୍ମ ଶୋଭାଯାତ୍ରାରେ ବାହାରି ପୂର୍ଣ୍ଣତୋୟା ବ୍ରାହ୍ମଣୀ ନଦୀର ପ୍ରବାହିତ ଶଖା ଶ୍ରୀବନ୍ତପୁର ସ୍ଥିତ ଯୋକଡିଆ ଘାଟରେ ବିସର୍ଜନ ହେବ । ଏହି ମେଳାରେ ଭକ୍ତବୃନ୍ଦ କରୋନ ନିୟମାନୁଯାୟୀ ସାମାଜିକ ଦୂରତା ରଖି ଓ ତୁଣ୍ଡି ପିନ୍ଧି ପୂଜାରେ ମା’ଙ୍କ ଦର୍ଶନ ପୂର୍ବକ ଆଶୀର୍ବାଦ ନେବାକୁ କମିଟି ପକ୍ଷରୁ ସୂଚିତ ହୋଇଛି । ଏହି ବୈଠକରେ ଅନ୍ୟମାନଙ୍କ ମଧ୍ୟରେ କମିଟିର ଉପସଭାପତି ଉମାକାନ୍ତ ରାଉତ ଓ ଚକ୍ରଧର ପାଢୀ, ସହସଂପାଦକ ଅକ୍ଷୟକୁମାର ସାହୁ, ଯୁଗ୍ମ ସଂପାଦକ ଟୁକୁନା ବଳ, କୋଷାଧ୍ୟକ୍ଷ ବାବନଚନ୍ଦ୍ର ମଲ୍ଲିକ, କାର୍ଯ୍ୟାଳୟ ସହକାରୀ ପ୍ରଶାନ୍ତକୁମାର ମହାନ୍ତି ପ୍ରମୁଖ କମିଟିର ସମସ୍ତ କର୍ମକର୍ତ୍ତା ଓ ସଦସ୍ୟ ମାନେ ଉପସ୍ଥିତ ଥିଲେ । ଶେଷରେ ସହସଂପାଦକ ଶ୍ରୀ ସାହୁ ଧନ୍ୟବାଦ ଦେଇଥିଲେ ।   ( ରିପୋର୍ଟ – ରଶ୍ମିରେଖା ମଲ୍ଲିକ )