ଆକ୍ସନ ମୁଡ଼ରେ ହିଞ୍ଜିଳି ପୁଲିସ ପ୍ରଶାସନ , ବିନା ମାସ୍କ ଓ ହେଲମେଟଧାରୀଙ୍କ ଠାରୁ ୭୦ ହଜାର ଟଙ୍କା ଜରିମାନା ଆଦାୟ

ଓଡ଼ିଶା ତାଜା ନ୍ୟୁଜ୍ (୧୨ ଏପ୍ରିଲ ସୋମବାର ) ହିଞ୍ଜିଳିକାଟୁ :- ସାରା ଦେଶରେ କରେନାର ଦ୍ୱିତୀୟ ଲହରୀର ଆତଙ୍କ ଦେଖିବାକୁ ମିଳିଛି । ମହାମାରୀ କରୋନାକୁ ପ୍ରତିହିତ କରିବା ପାଇଁ ରାଜ୍ୟ ସରକାରଙ୍କ ସମେତ ପ୍ରଶାସନ ପକ୍ଷରୁ କୋଭିଡ଼ କଟକଣାକୁ କଡ଼ାକଡ଼ି ଭାବେ ପାଳନ କରିବାକୁ ପରାମର୍ଶ ଦିଆଯାଇଛି । ହେଲେ ପ୍ରଶାସନର କଟକଣାକୁ କିଛି ଅମାନିଆ ଖାତିର କରୁନଥିବା ଦେଖିବାକୁ ମିଳିଛି । ଏପରିକି କିଛି ଅମାନିଅଙ୍କ ଯୋଗୁଁ ଦିନକୁ ଦିନ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ପ୍ରଶାସନର କଟକଣାକୁ ପାଳନ ନକରିବା ଯୋଗୁଁ ପରିଶେଷରେ ହିଞ୍ଜିଳି ପୁଲିସ ପ୍ରଶାସନ ଆକ୍ସନ ମୁଡ଼ରେ ପଂହଚିଛି । ଗଞ୍ଜାମ ଆରକ୍ଷୀ ଅଧିକ୍ଷକ ବ୍ରିଜେଶ କୁମାର ରାୟଙ୍କ ନିର୍ଦ୍ଦେଶ ପ୍ରକାରେ ହିଞ୍ଜିଳି ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସଙ୍କ ନେତୃତ୍ୱରେ ଏକ ସ୍ୱତନ୍ତ୍ର ପୁଲିସ ଟିମ୍ ଗଠନ କରାଯାଇ ପ୍ରତ୍ୟହ ସକାଳ ଓ ସନ୍ଧ୍ୟାରେ ଡ଼ାକବାଜି ଯନ୍ତ୍ର ସହାୟତାରେ ସ୍ଥାନୀୟ ଜନସାଧାରଣଙ୍କୁ ସଚେତନ କରାଯିବା କରାଯାଉଛି । ପ୍ରତ୍ୟହ ସକାଳ ୯ଟାରୁ ୧୨ଟା ଏବଂ ସନ୍ଧ୍ୟା ୭ଟାରୁ ୧୦ଟା ପର୍ଯ୍ୟନ୍ତ ସହରର ବିଭିନ୍ନ ସ୍ଥାନରେ ଯାଂଚ କରାଯାଉଛି । ବିନା ହେଲେମେଟରେ ମୋଟର ସାଇକେଲ ଚାଳନା କରୁଥିବା ଓ ବିନା ମାସ୍କରେ ଘରୁ ବାହାରକୁ ଆସୁଥିବା ଅମାନିଆ ମାନଙ୍କ ଠାରୁ ଜରିମାନା ଆଦାୟ କରାଯାଉଛି ।

ରବିବାର ହିଞ୍ଜିଳି ପୁଲିସ ପକ୍ଷରୁ ସ୍ଥାନୀୟ ପୌରାଂଚଳ ବିଜୁ ପଟ୍ଟନାୟକ ଛକରେ ଯାଂଚ କରାଯାଇ ବିନା ହେଲମେଟରେ ବାଇକ ଚଳାଉଥିବା ଆରୋହୀଙ୍କ ଠାରୁ ୨୫ ହଜାର ଏବଂ ବିନା ମାସ୍କରେ ବାହାରେ ବୁଲୁଥିବା ଅମାନିଆଙ୍କ ଠାରୁ ୪୫ ହଜାର ସମୁଦାୟ ୭୦ ହଜାର ଟଙ୍କା ଜରିମାନା ଆଦାୟ କରାଯାଇଛି । ଆଗାମୀ ଦିନରେ କୋଭିଡ଼ କଟକଣାକୁ ଅବମାନାନ କରୁଥିବା ଅମାନିଆଙ୍କ ଠାରୁ ଜେରିମାନା ଆଦାୟ ସହ ସାମାଜିକ ଦୂରତ୍ୱ ରକ୍ଷା ପାଳନ କରୁୁନଥିବା ବ୍ୟବସାୟିକ ପ୍ରତିଷ୍ଠାନ ମାଲିକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ଆବଶ୍ୟକ ହେଲେ ସଂପୃକ୍ତ ବ୍ୟବସାୟ ପ୍ରତିଷ୍ଠାନ ମାଲିକଙ୍କ ବିରୋଧରେ ମାମଲା ରୁଜୁ କରାଯିବା ସହ ସଂପୃକ୍ତ ଦୋକାନକୁ ସିଲ୍ କରାଯିବ ବୋଲି ପୌର କାର୍ଯ୍ୟ ନିର୍ବାହୀ ଅଧିକାରୀ ଡ଼ଃ. ମନୋରଞ୍ଜନ ସାହୁ କହିଛନ୍ତି । ଅନ୍ୟ ପକ୍ଷରେ ସ୍ଥାନୀୟ ତହସିଲଦାର ପ୍ରଭାତ କୁମାର ପରିଡ଼ା ସ୍ଥାନୀୟ ଅଂଚଳର ବିଭିନ୍ନ ସ୍ଥାନରେ ଚଢାଉ କରି ବିନା ମାସ୍କରେ ଯାତାୟତ କରୁଥିବା ଜନସାଧାରଣଙ୍କ ଠାରୁ ଜରିମାନା ଆଦାୟ କରୁଥିବାର ଦେଖିବାକୁ ମିଳିଛି ।  (ରିପୋର୍ଟ-ଶୁସାନ୍ତ ପ୍ରଧାନ )