ଅନୁଗୋଳ ସହରକୁ ସ୍ବଚ୍ଛ, ସୁନ୍ଦର ସହ ପ୍ରଦୂଷଣମୁକ୍ତ କରିବାକୁ ପୌର ପ୍ରଶାସନ ପକ୍ଷରୁ ‘ମୋ ଓ୍ବାର୍ଡ’ ବ୍ୟବସ୍ଥା କାର୍ଯ୍ୟକାରୀ

ଓଡ଼ିଶା ତାଜା ନ୍ୟୁଜ୍ (୫ ଏପ୍ରିଲ ସୋମଵାର ) ଅନୁଗୋଳ :- ଅନୁଗୋଳ ସହରକୁ ସ୍ବଚ୍ଛ, ସୁନ୍ଦର ସହ ପ୍ରଦୂଷଣମୁକ୍ତ କରିବାକୁ ପୌର ପ୍ରଶାସନ ପକ୍ଷରୁ ବିଭିନ୍ନ ଯୋଜନା ହାତକୁ ନିଆଯାଇଛି । ନୂଆକରି ‘ମୋ ଓ୍ବାର୍ଡ’ ବ୍ୟବସ୍ଥା କାର୍ଯ୍ୟକାରୀ କରାଯାଇଛି । ଘର ଘର ବୁଲି ଆବର୍ଜନା ସଂଗ୍ରହ କରାଯାଇ ସେଥିରୁ ଖତ ପ୍ରସ୍ତୁତ କରି ବିକ୍ରି କରାଯାଉଛି। ପଲିଥିନ, ସୋଲ ଜାତୀୟ ଆବର୍ଜନା ନ ଜାଳିବାକୁ ବ୍ୟବସାୟୀମାନଙ୍କୁ ତାଗିଦ୍‌ କରାଯିବା ସହ ଅମାନିଆଙ୍କଠାରୁ ଜରିମାନା ଆଦାୟ କରାଯାଉଛି। ହେଲେ ସହରର କେତେଜଣ ବ୍ୟବସାୟୀ ନିୟମିତ ଭାବେ ଆବର୍ଜନାରେ ନିଅଁା ଲଗାଉଥିବା ଅନୁଗୋଳ ସ୍ଥିତ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଫିସ ପକ୍ଷରୁ ପୌର ପ୍ରଶାସନର ଦଷ୍ଟି ଆକର୍ଷଣ କରାଯାଇଛି। ଫଳରେ ଆବର୍ଜନା କଟକଣାକୁ ପୌର ପ୍ରଶାସନ କଡ଼ାକଡ଼ି କରିବା ସହ ଅମାନିଆ ବ୍ୟବସାୟୀଙ୍କ ବିରୋଧରେ ଥାନାରେ ଏତଲା ଦିଆଯିବାକୁ ଯୋଜନା କରାଯାଇଛି । ଅନୁଗୋଳ ସହରର ବଜାର ଛକ, ଅମଲାପଡ଼ା, ହରିମହୁରୀ ଛକ, ହୁଲୁରିସିଂହା ଛକ, ଗାନ୍ଧୀମାର୍ଗ, ହନୁମାନ ବଜାର ଛକ, ବସ୍‌ଷ୍ଟାଣ୍ଡ, ଶିମିଳିପଡ଼ା ଆଦିରେ ଥିବା ବ୍ୟବସାୟୀଙ୍କ ମଧ୍ୟରୁ

କେତେ ଜଣ ବ୍ୟବସାୟୀ ରାତିରେ ଓ ସକାଳେ ଆବର୍ଜନାରେ ନିଅଁା ଲଗାଉଛନ୍ତି। ପୌରପାଳିକା ନଜରରେ ଯେଉଁମାନେ ପଡ଼ୁଛନ୍ତି , ସେମାନଙ୍କୁ ନୋଟିସ ଦିଆଯାଇ ଜରିମାନା ଆଦାୟ କରାଯାଉଛି। ଇତିମଧ୍ୟରେ ୫୦ ହଜାରରୁ ଅଧିକ ଟଙ୍କା ଜରିମାନା ଆଦାୟ କରାଯାଇ ସାରିଲାଣି। କିନ୍ତୁ ସମ୍ପୃକ୍ତ ବ୍ୟବସାୟୀମାନେ ଏଥିରେ ଚେତୁନାହାନ୍ତି। ପୂର୍ବପରି ଆବର୍ଜନା ପୋଡ଼ୁଥିବାରୁ ସହର ପରିବେଶ ପ୍ରଦୂଷିତ ହେଉଛି। ବିଶେଷକରି ପଲିଥିନ ଓ ସୋଲ ଆବର୍ଜନା ପୋଡ଼ିବାବେଳେ ନିର୍ଗତ ହେଉଥିବା ବିଷାକ୍ତ ଧୂଅଁା ବାୟୁମଣ୍ଡଳକୁ ବିଷାକ୍ତ କରିବାରେ ଲାଗିଛି। ଏହି ପ୍ରକ୍ରିୟା ଜାରି ରହିଲେ ଆଗାମୀ ଦିନରେ ସହରବାସୀ ନାନା ରୋଗରେ ପଡ଼ିବେ। ମୁଣ୍ଡବିନ୍ଧା, ଆଖି ପୋଡ଼ିବା, ଚର୍ମ ଓ ଶ୍ୱାସ ଜନିତ ରୋଗ ଅଧିକରୁ ଅଧିକ ଲୋକଙ୍କଠାରେ ଦେଖାଦେବ ବୋଲି ପ୍ରଦୂଷଣ ନିୟନ୍ତ୍ରଣ ବୋର୍ଡ ଅନୁଗୋଳ ଅଫିସ ପକ୍ଷରୁ ପୌରପାଳିକାକୁ ସତର୍କ କରାଇ ଦିଆଯାଇଛି । ତଦନୁଯାୟୀ ଆବର୍ଜନା କଟକଣାକୁ ଅଧିକ କଡ଼ାକଡ଼ି କରିବାକୁ ନିଷ୍ପତ୍ତି ନିଆଯାଇଛି। ଏଣିକି ଆବର୍ଜନା ପୋଡ଼ୁଥିବା ବ୍ୟବସାୟୀମାନଙ୍କଠାରୁ ମୋଟା ଅଙ୍କର ଜରିମାନା ଆଦାୟ କରାଯିବା । ଯଦି ଏଥିରେ ନ ଚେତିଲେ ସେମାନଙ୍କ ନାମରେ ଥାନାରେ ଅଭିଯୋଗ କରାଯିବ ବୋଲି ସୂଚନା ମିଳିଛି । (ରିପୋର୍ଟ ଭଞ୍ଜ ବିହାରୀ ମହାନ୍ତି )