ଗଜପତି ଜିଲ୍ଲାରେ ଦଶମ ଶ୍ରେଣୀ ଛାତ୍ରଛାତ୍ରୀ ଆଶାନୁରୂପ କୃତିତ୍ୱ ରଖିବା ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ

ଓଡିଶା ତାଜା ନ୍ୟୁଜ୍  (୨୩ ଜାନୁଆରୀ ,ଶନିବାର )ପାରଳାଖେମୁଣ୍ଡି :-ଗଜପତି ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରେ୨୦୨୦ – ୨୦୨୧ ଶିକ୍ଷା ବର୍ଷ ପାଇଁ ନିର୍ଦ୍ଧାରିତ ୧୦୦ ଦିନ ମଧ୍ୟରେ ଦଶମ ଶ୍ରେଣୀର ଶିକ୍ଷାଦାନ ବିଦ୍ୟାଳୟ ଗୁଡିକରେ ଶିକ୍ଷା ବିଭାଗର ଏସ ଓ ପି ଗାଇଡ ଲାଇନ ଅନୁସାରେ ସମାପନ କରିବା ପାଇଁ ଓ କମାଇ ଦିଆଯାଇ ଥିବା ପାଠ୍ୟକ୍ରମକୁ ଆଖି ଆଗରେ ରଖି ଅଧିକରୁ ଅଧିକ ଛାତ୍ର ଛାତ୍ରୀ ଭଲ ନମ୍ବର ରଖି ଦଶମ ବାର୍ଷିକ ପରୀକ୍ଷାରେ କିଭଳି କୃତକାର୍ଯ୍ୟ ହୋଇ ପାରିବେ ସେଥିପାଇଁ ଜିଲ୍ଲା ଶିକ୍ଷା ଅଧିକାରୀ ପ୍ରଦୀପ କୁମାର ନାଗଙ୍କ ଅଧ୍ୟକ୍ଷତାରେ ଜିଲ୍ଲାର ବିଭିନ୍ନ ଉଚ୍ଚ ବିଦ୍ୟାଳୟର ଅନୁଭୂତି ସଂପର୍ଣ୍ଣ ପ୍ରଧାନ ଶିକ୍ଷକ ଓ ସହକାରୀ ଶିକ୍ଷକ ଶିକ୍ଷୟିତ୍ରୀ ମାନଙ୍କୁ ନେଇ ଗଠିତ ଜିଲ୍ଲା ସ୍ତରୀୟ ପ୍ରଶ୍ନ ପ୍ରସ୍ତୁତି ବୋର୍ଡର ସଭ୍ୟମାନଙ୍କର ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ସମସ୍ତ ବିଦ୍ୟାଳୟରେ ଅତି ବେଶୀରେ ୧୦ ଜଣ ଲେଖାଏଁ ଛାତ୍ରଛାତ୍ରୀଙ୍କ ପାଠପଢା ଦାୟିତ୍ୱ ଜଣେ ଲେଖାଏଁ ଶିକ୍ଷକ ଶିକ୍ଷୟିତ୍ରୀ ତଦାରଖ କରିବା ପାଇଁ ନିଷ୍ପତ୍ତି ନିଆଯାଇଛି ।

ଜିଲ୍ଲା ଶିକ୍ଷା ଅଧିକାରୀ 6 ଟି ବିଷୟରେ ପରୀକ୍ଷା ହେବାକୁ ଥିବା ପାଠ୍ୟ କ୍ରମକୁ ଆଧାର କରି ପ୍ରତି ବିଦ୍ୟାଳୟକୁ ଦଶମ ଶ୍ରେଣୀର ଛାତ୍ରଛାତ୍ରୀ ମାନଙ୍କ ପାଇଁ ଅଭ୍ୟାସ ପୁସ୍ତିକା ଜିଲ୍ଲା ସ୍ତରୀୟ ପ୍ରଶ୍ନ ପ୍ରସ୍ତୁତି ବୋର୍ଡ ମାଧ୍ୟମ ରେ ପ୍ରସ୍ତୁତ କରି ଯୋଗାଇ ଦେବେ ବୋଲି କହିଛନ୍ତି । ତତ ସଙ୍ଗେ ସଙ୍ଗେ ଜାନୁଆରୀ ଓ ଫେବୃୟାରୀ ମାସ ମଧ୍ୟରେ ସମାପନ ହେବାକୁ ଥିବା ପାଠ୍ୟକ୍ରମ ଉପରେ ଆଧାରିତ ପ୍ରାକ ବୋର୍ଡ-୧ପରୀକ୍ଷା ଆସନ୍ତା ଫେବୃୟାରୀ ଶେଷ ସପ୍ତାହ/ ମାର୍ଚ୍ଚ ପ୍ରଥମ ସପ୍ତାହ ମଧ୍ୟରେ ପ୍ରତି ବିଦ୍ୟାଳୟ ରେ ଅନୁଷ୍ଠିତ କରିବା ପାଇଁ ପ୍ରଶ୍ନପତ୍ର ଯୋଗାଇ ଦେବାର ବ୍ୟବସ୍ଥା ପାଇଁ ନିଷ୍ପତ୍ତି ନିଆଯାଇଛି । ଏଥିପାଇଁ ଜିଲ୍ଲା ସ୍ତରୀୟ ପ୍ରଶ୍ନ ପ୍ରସ୍ତୁତି ବୋର୍ଡର ସଭ୍ୟମାନେ ଫେବୃୟାରୀ ୧୫,୨୦୨୧ମଧ୍ୟରେ ୬ ଟି ବିଷୟରେ ପ୍ରଶ୍ନ ଓ ଉତ୍ତର key ପ୍ରସ୍ତୁତି କରି ଜିଲ୍ଲା ଶିକ୍ଷାଅଧିକାରୀଙ୍କୁ ପ୍ରଦାନ କରିବେ ବୋଲି କହିଛନ୍ତି । ଏହା ଦ୍ୱାରା ଛାତ୍ରଛାତ୍ରୀମାନେ ନିଶ୍ଚିତ ଭାବେ ଓ ଏମ୍ ଆର୍ ସିଟ ରେ ଉତ୍ତର ଦେବା ଓ ଦୀର୍ଘ ଉତ୍ତରମୂଳକ ପ୍ରଶ୍ନର ଅଭ୍ୟାସ ସଠିକ ଭାବେ କରିପାରିବେ ବୋଲି ଆଶାପୋଷଣ କରାଯାଉଛି । ନୀଳମଣି ଉଚ୍ଚବିଦ୍ୟାଳୟ ପ୍ରଧାନ ଶିକ୍ଷକ ପ୍ରଫୁଲ୍ଲ ମହାନ୍ତି ଧନ୍ୟବାଦ ଅର୍ପଣ କରି ଥିବା ବେଳେ ଜିଲ୍ଲା ବିଜ୍ଞାନ ନିରୀକ୍ଷକ ସାତ୍ଵିକ କୁମାର ପଟ୍ଟନାୟକ ପରିଚାଳନା କରିଥିଲେ ।