ବିଜୁ ଜନତା ଦଳର ୨୪ତମ ପ୍ରତିଷ୍ଠା ଦିବସ ପାଳିତ

ଓଡ଼ିଶା ତାଜା ନ୍ୟୁଜ (୨୬ ଡିସେମ୍ବର ଶନିବାର ) କଳାହାଣ୍ଡି :-  ନର୍ଲା ନିର୍ବାଚନ ମଣ୍ଡଳୀରେ ବିଜୁ ଜନତା ଦଳ ତାର ୨୪ତମ ପ୍ରତିଷ୍ଠା ଦିବସ ବାଲିପଡା ବଜାର ପ୍ରାଣଙ୍ଗରେ ପାଳନ କରିଛି। ଏହି ଅବସରରେ ମୁଖ୍ୟ ଅତିଥି ଭାବେ ନର୍ଲା ବିଧାୟକ ଭୁପିନ୍ଦର ସିଂ ଯୋଗ ଦେଇ ସ୍ୱର୍ଗତ ବିଜୁ ପଟ୍ଟନାୟକଙ୍କ ଫଟୋ ଚିତ୍ରରେ ପୁଷ୍ପମାଳ୍ୟ ଓ ଦୀପ ପ୍ରଜ୍ଜଳନ କରିଥିଲେ । ଏଥିରେ ଦଳ ସହ ଜଡିତ ଦିବଂଗତ ମାନଙ୍କ ପ୍ରତି ୧ମିନିଟ ନୀରବ ପ୍ରାର୍ଥନା କରିବା ପରେ ସଭା କାର୍ଯ୍ୟ ଆରମ୍ଭ କରିଥିଲେ । ସଭାରେ ୪ଟି ବ୍ଲକ ନର୍ଲା, କେସିଙ୍ଗା, ମ.ରାମପୁର, କର୍ଲାମୁଣ୍ଡା ବ୍ଲକର ସଭାପତି, ଉପ ସଭାପତି ତଥା କର୍ମକର୍ତ୍ତାମାନେ ଯୋଗ ଦେଇଥିବା ବେଳେ ନର୍ଲା ବ୍ଲକ ସଭାପତି ପରେଶ ପଧାନ ସ୍ୱାଗତ ଭାଷଣ ଦେଇଥିଲେ । ଏହି କାର୍ଯ୍ୟକ୍ରମରେ ଦୀର୍ଘ ଦୁଇ ଦଶନ୍ଧି ଧରି ଓଡିଶା କ୍ଷମତାରେ ଥିବା ଏହି ଆଞ୍ଚଳିକ ଦଳ ବିଜୁ ବାବୁଙ୍କ ନୀତି ଓ ଆଦର୍ଶକୁ ଅନୁକରଣ କରି ଗ୍ରାମାଞ୍ଚଳ ରେ ସେବା ମନୋବୃତ୍ତି ନେଇ କାର୍ଯ୍ୟ କରିବାକୁ ବିଧାୟକ ଶ୍ରୀ ସିଂ ସମସ୍ତ କର୍ମୀମାନଙ୍କୁ ପରାମର୍ଶ ଦେଇଥିଲେ ।

ଚାଷୀ ମାନଙ୍କୁ ରେତ ପ୍ରକଳ୍ପ ମାଧ୍ୟମ ରେ ଜଳସେଚନ କରାଯାଉଥିବା ବେଳେ ଆଗାମୀ ଦିନରେ ନର୍ଲା ଅଞ୍ଚଳ ପାଇଁ ସାନ୍ଦୁଲ, ଉତେଇ, ରାଉତ ନଦୀରେ ସେଚପ୍ରକଳ୍ପ ନିର୍ମାଣ କରାଯିବ ବୋଲି ନର୍ଲା ବିଧାୟକ ଗଣମାଧ୍ୟମକୁ ସୂଚନା ଦେଇଥିଲେ । କରୋନା କଟକଣା ଭିତରେ ବିଜେଡି ପ୍ରତିଷ୍ଠା ଦିବସ ପାଳିତ ହୋଇଯାଇଛି । ଏଥିରେ ପଶ୍ଚିମ ଓଡିଶା ବିକାଶ ପରିଷଦ ସଦସ୍ୟ ତଥା ଉପ-ସଭାପତି ପୁଷ୍ପେନ୍ଦ୍ର ସିଂ ଦେଓ, ମ.ରାମପୁର ସଭାପତି ଗୋବିନ୍ଦ ଶତପଥି, ନର୍ଲା ବ୍ଲକ ସରପଞ୍ଚ ସଂଘର ସଭାପତି ଚିରଞ୍ଜିବି ଗୌଡିଆ, ଉପ-ସଭାପତି କିର୍ତ୍ତନ ସାହୁ, ସର୍ଗିଗୁଡା ପୂର୍ବତନ ସରପଞ୍ଚ ହମେଶ ଜୈନ, ନର୍ଲା ସଂପାଦକ ମନମୋହନ ନାଏକ, କର୍ଲାମୁଣ୍ଡା ବ୍ଲକ ସଭାପତି ସୁରେନ୍ଦ୍ର ସାହୁ, କେସିଙ୍ଗା ବ୍ଲକର ପ୍ରମିଳା ଶଡଙ୍ଗୀ, ସତ୍ୟଭାମା ସାହୁ, ନର୍ଲା ପଞ୍ଚାୟତ ସଭାପତି କିଶୋର ମାଝୀ, କିନ୍ନର ସଂଘର ସଭାପତି କାମିନୀ କିନ୍ନର, ନାରୀ ସଂଘ, ଯୁବନେତା ଚକ୍ରଧର ଗଉଡ ସମେତ ନର୍ଲା ନିର୍ବାଚନ ମଣ୍ଡଳୀର ବହୁ ମହିଳା ତଥା ବିଜୁ ପ୍ରେମୀ ଯୋଗ ଦେଇଥିଲେ । ( କଳାହାଣ୍ଡି ବ୍ୟୁରୋ ପ୍ରଦୀପ କୁମାର ଗଉଡ )