କଳାହାଣ୍ଡି : ନର୍ଲା ବନାଞ୍ଚଳରେ ହାତୀ ଉପଦ୍ରବ ; ଚାଷୀ ମହଳରେ ଛନକା

ଓଡ଼ିଶା ତାଜା ନ୍ୟୁଜ (୧୮ ଡିସେମ୍ବର , ଶୁକ୍ରବାର ) କଳାହାଣ୍ଡି :- କଳାହାଣ୍ଡି ଜିଲ୍ଲା ନର୍ଲା ବନାଞ୍ଚଳରେ ହାତୀ ଉପଦ୍ରବ ଯୋଗୁଁ ଚାଷୀ ମହଳରେ ଏବେ ଛନକା ପଶିଯାଇଛି। ନର୍ଲା ବ୍ଳକ କୁରମେଲ ପଞ୍ଚାୟତର ପାଙ୍ଗା ଗ୍ରାମର ବେଲଧରବାଗରେ ୩୦ରୁ ଉର୍ଦ୍ଧ୍ବ ଏକର ଜମି ଫସଲ ନଷ୍ଟ କରିଥିବା ଚାଷୀମାନେ ଅଭିଯୋଗ ଆଣିଛନ୍ତି। ନର୍ଲା ବନାଞ୍ଚଳରେ ହାତୀପଲ ଦୀର୍ଘ ୧୦ ବର୍ଷ ଧରି ରହି ଆସିଥିବା ବେଳେ ଏହି ହାତୀପଲ ଯୋଗୁଁ ଚାଷୀ ମାନଙ୍କର ନିଦ ହଜିଯାଇଥିବାର ଦେଖିବାକୁ ମିଳିଛି। ଏପରିକି ଶୀତ କାକରରେ ବିଲ ମୁଣ୍ଡରେ ଜୀବନକୁ ବାଜି ଲଗାଇ ଚାଷୀମାନେ ହାତୀ ଉପଦ୍ରବରୁ ନିଜ ଫସଲକୁ ରକ୍ଷା କରିବା ପାଇଁ ଉଜାଗର ରହୁଥିବାର ଅଭିଯୋଗ ମଧ୍ୟ ହୁଏ ।

୫୦ରୁ ଉର୍ଦ୍ଧ୍ବ ହାତୀ ବିଭିନ୍ନ ଦଳରେ ବିଭକ୍ତ ହୋଇ ତିନିରୁ ଚାରି ଥର ଫସଲ ନଷ୍ଟ କରିଥିବା ସ୍ଥାନୀୟ ରାଜସ୍ଵ ବିଭାଗ ପାଖରେ ରିପୋର୍ଟ ହୋଇଛି। ନର୍ଲା ବନ ବିଭାଗରେ ଦରଖାସ୍ତ କରିଥିବା ଚାଷୀ ରାମ ପାତ୍ର, କାର୍ତ୍ତିକ ପାତ୍ର, କୁଳମଣି ପାତ୍ର,ବନସିଂ ପାତ୍ର,ବିଦ୍ୟା ପାତ୍ର, ବିରଞ୍ଚି ପାତ୍ର,ବୁଡୁ ପାତ୍ର,ନବ ପାତ୍ର, ପରମାନନ୍ଦ ପାତ୍ର,ତ୍ରିନାଥ ପାତ୍ର,ଜଗ ମୋହନ ସମେତ ଏହି କ୍ଷତିଗ୍ରସ୍ତ ଚାଷୀ ୩ମାସ ହେଲା କ୍ଷତି ପୂରଣ ପାଇଁ ଆବେଦନ କରିଥିବା ଜଣାଇଛନ୍ତି। ନର୍ଲା ଫରେଷ୍ଟରଙ୍କୁ ପଚାରିବାରୁ ୪୦୦ରୁ ଉର୍ଦ୍ଧ୍ବ ଦରଖାସ୍ତ ଆସିଛି ଏବଂ ସବୁ ହେଡ ଅଫିସକୁ ପଠାଇ ଦିଆଯାଇଛି। ଖୁବଶୀଘ୍ର କ୍ଷତି ପୂରଣ ମିଳିବ ବୋଲି କହିଛନ୍ତି ।

ବନବିଭାଗ ଏହି ହାତୀପଲଙ୍କ ଉପରେ ସ୍ଵତନ୍ତ୍ର ଦୃଷ୍ଟି ଦେବା ପାଇଁ ନର୍ଲା ସେକ୍ସନରେ ୧୨ ଜଣଙ୍କୁ ହାତୀ ଘଉଡ଼ାଇବା କାର୍ଯ୍ୟରେ ନିୟୋଜିତ କରିଥିବା ଜଣାଇଛନ୍ତି। କିଛି ଦିନ ପୂର୍ବେ ନର୍ଲା ଫରେଷ୍ଟ ଅଫିସ ପଛପଟେ ୩ ଗୋଟି ହାତୀ ଆସି ଥିବା ବେଳେ ହାତୀପଲ ଗାଁ ଓ ସହର ମୁହାଁ ହେଉଥିବା ଦେଖିବାକୁ ମିଳୁଛି। ନର୍ଲା ଡଙ୍ଗର ତଳପଡା ନିକଟ ଲମଟିଡଙ୍ଗରରେ ହାତୀଙ୍କ ଆଡ୍ଡା ଜମିବାରେ ଲାଗିଛି। (ରିପୋର୍ଟ ପ୍ରଦୀପ କୁମାର ଗଉଡ)