ଓଡ଼ିଶା ତାଜା ନ୍ୟୁଜ (୧୪ ଡିସେମ୍ବର ସୋମବାର ) କଟକ :- କେନ୍ଦ୍ରରେ କ୍ଷମତାସୀନ ବିଜେପି ସରକାରଙ୍କ ସମସ୍ତ ଦମନ, ଧମକ, କୁତ୍ସା ଓ ଅପପ୍ରଚାରକୁ ମୁକାବିଲା କରି ଦିଲ୍ଲୀ ସୀମାରେ ଐତିହାସିକ ଚାଷୀ ଆନ୍ଦୋଳନ ୧୯ ଦିନରେ ପହଞ୍ଚିଛି । ଇତି ମଧ୍ୟରେ ୧୫ ଜଣ ଚାଷୀ ପ୍ରାଣ ହରାଇଛନ୍ତି । ତଥାପି ଆମ୍ବାନୀ-ଆଦାନୀଙ୍କ ପରି କର୍ପୋରେଟମାନଙ୍କର ସ୍ୱାର୍ଥ ପାଇଁ ସମର୍ପିତ ମୋଦି ସରକାର ଚାଷୀ ବିରୋଧୀ ଅନ୍ୟାୟ କାନୁନ ବାତିଲ ନ କରି ଲୋକଙ୍କୁ ବିଭ୍ରାନ୍ତ କରି ଚାଲିଛନ୍ତି । ଏହା ବିରୁଦ୍ଧରେ ସାରା ଦେଶବ୍ୟାପୀ ଜିଲ୍ଲା ପ୍ରଶାସନିକ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ଓ ବିଭିନ୍ନ ଗଣ ଅନଶନ ହୋଇଛି । ଏହି ଉପଲକ୍ଷେ ଅଲ ଇଣ୍ଡିଆ କୃଷକ ସଂଘର୍ଷ ସମନ୍ୱୟ ସମିତି ଓ ସଂଯୁକ୍ତ କୃଷକ ମୋର୍ଚା ପକ୍ଷରୁ ଆହୂତ ପ୍ରତିବାଦ ଆନ୍ଦୋଳନ ଉପଲକ୍ଷେ କଟକ ଜିଲ୍ଲାପାଳ ଅଫିସ ସମ୍ମୁଖରେ ବିଭିନ୍ନ କୃଷକ, ଶ୍ରମିକ, ମହିଳା, ଛାତ୍ର, ଯୁବକ ଓ ବାମପନ୍ଥୀ ଦଳ ପକ୍ଷରୁ ଦିନବ୍ୟାପୀ ଧାରଣା ଅନୁଷ୍ଠିତ ହୋଇଥିଲା ।
