ଓଡ଼ିଶା ତାଜା ନ୍ୟୁଜ (୧୩ ଡିସେମ୍ବର ରବିବାର) କଳାହାଣ୍ଡି :- କଳାହାଣ୍ଡି ଜିଲ୍ଲା ନର୍ଲା ବ୍ଲକ ଦେବଗିରି-ବୁଢିପଦର ଠାରେ ମାଉଲୀ ଚୋରୋ ସଂପନ୍ନ ହୋଇଛି। ପ୍ରାଚୀନ ମହାକାନ୍ତାର ସଭ୍ୟତାର ରାଜଧାନୀ ଅସୁରଗଡର ପ୍ରତିରକ୍ଷା ଘାଟି ତଥା ଧାର୍ମିକ ପିଠସ୍ଥଳୀ ଭାବେ ଦେବଗିରି-ବୁଢିପଦର ଖ୍ୟାତ। ଏଠାରେ ବର୍ତ୍ତମାନ ସୁଦ୍ଧା ପ୍ରାଚୀନ ଧର୍ମଧାରା ଦେଖା ଯାଇଥାଏ। ସେହି କ୍ରମରେ ଅଭିଚାର ତନ୍ତ୍ର ଧାରାର ଏକ ପ୍ରତ୍ୟକ୍ଷ ଦେବୀ ମାଉଲୀ ବୁଢିପଦରରେ ପୋଡ଼ଛାପରେନ ନାମରେ ପୂଜା ପାଇଥାନ୍ତି । ପରମ୍ପରା ଅନୁକ୍ରମେ ଧଙ୍ଗଡାମାଝୀ ପରିବାର ପକ୍ଷରୁ ଦେବୀଙ୍କ ପାଖରେ ଚୋରୋ ପ୍ରଦାନ କରାଯାଇଥାଏ ।
ଶସ୍ୟ ଅମଳ ପରେ ଦେବାଦେବୀଙ୍କ ଶାନ୍ତି ବିଧାନ ପାଇଁ କେଉଁ ଏକ ଆବାହମାନ କାଳରୁ ଏହି ପରମ୍ପରା ଅନୁସୃତ ହୋଇଆସୁଛି। ଦେବାଦେବୀଙ୍କ ଆସ୍ଥାନରେ ଦିଆରି ପଞ୍ଚ ମୁରୁଜର ଯନ୍ତ୍ର ମଣ୍ଡଳ କାଟି ମନ୍ଦାର ଫୁଲ ଓ ଧୁପ ଦୀପ ଦେଇ ଦେବି ଦେବତାଙ୍କୁ ଆବାହନ କରିଥାନ୍ତି। ଏହାପରେ ମାଏଲିଙ୍କୁ ଲାଲଗଞ୍ଜା ଓ ବତକ, ମିରଚୁ ଏବଂ ଠେଙ୍ଗା ଦେବତାଙ୍କୁ ପେଣ୍ଠୀ, ଡଙ୍ଗର ବୁଡାଙ୍କୁ ଧୁବଲା ଝଲିଆ ଗଞ୍ଜା ଓ ବାମନେନବୁଢୀଙ୍କୁ ନାରିକେଳ ସମର୍ପଣ କରାଯାଇଥାଏ ।
