ଓଡ଼ିଶା ତାଜା ନ୍ୟୁଜ (୨୨ ଅକ୍ଟୋବର ଗୁରୁବାର) ହିଞ୍ଜିଳିକାଟୁ :- ରାଜ୍ୟ ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ଗଞ୍ଜାମ ଜିଲ୍ଲାର ହିଞ୍ଜିଳିକାଟୁ ସହରକୁ ଏକମାତ୍ର ପୋୖରାଞ୍ଚଳ ଭାବେ ମାନ୍ୟତା ପ୍ରଦାନ କରାଯାଇଛି । ଜିଲ୍ଲାର ଦ୍ଵିତୀୟ ବୃହତ୍ତମ ଜନସଂଖ୍ୟା ବିଶିଷ୍ଟ ଏହି ସହର ଯାହାକି ବିଭିନ୍ନ କ୍ଷେତ୍ରରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛି । ରାଜ୍ୟ ମୁଖ୍ୟମନ୍ତ୍ରୀ ନିଜ ପ୍ରିୟ ହିଞ୍ଜିଳି ବାସୀଙ୍କ ଆଶା ଆକାଂକ୍ଷାକୁ ପ୍ରାଥମିକତା ଦେଇ ବିକାଶ କାର୍ଯ୍ୟକ୍ରମକୁ ଜାରୀ ରଖିଛନ୍ତି । ଏଥିପାଇଁ ସହରରେ ବହୁ ଉନ୍ନୟନ ଯୋଜନା କାର୍ଯ୍ୟକାରୀ ହେବା ସହିତ ସରକାରୀ ଦପ୍ତରର ସୌନ୍ଦର୍ଯ୍ୟ କରଣ ପାଇଁ ପ୍ରଶାସନ ପକ୍ଷରୁ ପର୍ଯ୍ୟାପ୍ତ ଅର୍ଥ ବ୍ୟୟ କରାଯାଇଛି । ସାଧାରଣ ଲୋକଙ୍କ ଜରୁରୀ ଆବଶ୍ୟକତାକୁ ପ୍ରାଧାନ୍ୟ ଦେଇ ସ୍ଥାନୀୟ ମ୍ୟୁନିସିପାଲିଟି ପକ୍ଷରୁ ସହରର ବିଭିନ୍ନ ସ୍ଥାନରେ ଶୌଚାଳୟ ଏବଂ ପରିସ୍ରାଗାର ସ୍ଥାପିତ ହୋଇଛି ।
ଏତଦ ବ୍ୟତୀତ କିଛି ସରକାରୀ କାର୍ଯ୍ୟାଳୟରେ ମଧ୍ୟ ସାଧାରଣ ଲୋକଙ୍କ ଆବଶ୍ୟକତା ପୂରଣ ପାଇଁ ଏସବୁ ସୁବିଧା ଉପଲବ୍ଧ କରାଯାଇଛି । ଏଭଳି ପର୍ଯ୍ୟାପ୍ତ ସୁବିଧା ସୁଯୋଗ ଉପଲବ୍ଧ ହୋଇଥିଲେ ମଧ୍ୟ ସ୍ଥାନୀୟ ସହରରେ ଅବସ୍ଥାପିତ ଥିବା ଗ୍ରାମ୍ୟ ଉନ୍ନୟନ ବିଭାଗ ଉପଖଣ୍ଡ କାର୍ଯ୍ୟାଳୟ ଏବେ ସାଧାରଣ ଲୋକଙ୍କ ପରିସ୍ରାସ୍ଥଳୀ ପାଲଟିଥିବା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ସବୁଠାରୁ ଆଲୋଚ୍ୟ ପ୍ରସଙ୍ଗଟି ହେଲା ଉପଖଣ୍ଡ ଚିକିତ୍ସାଳୟରେ ରୋଗୀ ଓ ସମ୍ପର୍କୀୟଙ୍କ ପାଇଁ ଏସବୁ ସୁବିଧା ଉପଲବ୍ଧ ଥିଲେ ମଧ୍ୟ ଏହାର ପାର୍ଶ୍ଵରେ ଥିବା ସମ୍ପୃକ୍ତ ବିଭାଗର ହତା ଏବେ ସର୍ବ ସାଧାରଣଙ୍କ ପରିସ୍ରାସ୍ଥଳୀ ପାଲଟିଥିବା ସାଧାରଣରେ ଉଦବେଗର କାରଣ ହୋଇଛି । ପରିସ୍ରାସ୍ଥଳୀର ଉତ୍କଟ ଦୁର୍ଗନ୍ଧରେ ଲୋକଙ୍କ ନାକ ଫାଟି ପଡୁଥିଲା ବେଳେ ଅଞ୍ଚଳରେ ଏକ ଅସ୍ବାସ୍ଥ୍ୟ କର ପରିବେଶ ସୃଷ୍ଟି ହେବା ଚିନ୍ତାଜନକ ହୋଇଛି । ଦୈନନ୍ଦିନ ଏଭଳି ଅଶୋଭନୀୟ ଘଟଣା ରୋଗୀଙ୍କ ଦୃଷ୍ଟି ଗୋଚର ହେଉଥିଲେ ମଧ୍ୟ ଭୟ ଓ ଲଜ୍ଜାରେ ନୀରବ ରହିବା ଜରୁରୀ ହୋଇଛି ।
ସ୍ୱଚ୍ଛ ଭାରତ ମିଶନର ସଫଳତା ପାଇଁ ପ୍ରଶାସନ ଯେଭଳି ତତ୍ପରତା ଦେଖାଉଛି ଗ୍ରାମ୍ୟ ଉନ୍ନୟନ ବିଭାଗ ହତାରେ ଚାଲିଥିବା ଏଭଳି କାର୍ଯ୍ୟକଳାପରୁ ସ୍ପଷ୍ଟ ସଂକେତ ମିଳିଛି । ସବୁଠାରୁ ଉଲ୍ଲେଖନୀୟ ପ୍ରସଙ୍ଗ ହେଲା ଏଭଳି କୁସ୍ଚିତ ଘଟଣାପ୍ରତି ପ୍ରଶାସନ ପକ୍ଷରୁ କୌଣସି ଠୋସ ପଦକ୍ଷେପ ଗ୍ରହଣ କରିବା ପରିବର୍ତ୍ତେ ନୀରବତା ପ୍ରକାଶ କରିବା ସାଧାରଣରେ ଅସନ୍ତୋଷ ପ୍ରକାଶ ପାଇଛି । ଏନେଇ ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ ଇଂ ପ୍ରଦୀପ କୁମାର ପାଢୀଙ୍କ ପ୍ରତିକ୍ରିୟା ପାଇଁ ଯୋଗାଯୋଗ ସମ୍ଭବ ହୋଇପାରିନାହିଁ । ହିଞ୍ଜିଳିକାଟୁ,(ଶୁସାନ୍ତ ପ୍ରଧାନ)
