ଓଡ଼ିଶା ତାଜା ନ୍ୟୁଜ (୧୪ ଅକ୍ଟୋବର ବୁଧବାର ) କଳାହାଣ୍ଡି :- ଚର୍ଚ୍ଚାର କେନ୍ଦ୍ରବିନ୍ଦୁକୁ ଆସି ଯାଇଥିବା କଳାହାଣ୍ଡି ଜିଲ୍ଲା ନର୍ଲା ବ୍ଲକର କାର୍ଯ୍ୟରତ ସିଡିପିଙ୍କ ବଦଳି ପାଇଁ ଶିବ ଶକ୍ତି ମହାସଂଘର ମହିଳା ମାନେ ବ୍ଲକ ସମ୍ମୁଖରେ ଅନଶନ ଆରମ୍ଭ କରିଛନ୍ତି । ମହାସଂଘ ର ସଭାନେତ୍ରୀ ଡାଳିମ୍ବ ବିହାରୀ, ସମ୍ପାଦିକା ରୀନାରାଣୀ ପଟ୍ଟନାୟକ, ସବିତା ଭୋଇ, ବାସନ୍ତି ରଣା,ପଙ୍କଜିନୀ ନାଏକ,ନଳିନୀ ଦୀପ ଓ ସେବାକାରୀ କିନ୍ନର ସଂଘ ନର୍ଲା ସହ ବିଭିନ୍ନ ପଞ୍ଚାୟତରୁ ଆସିଥିବା ମହିଳା ମାନେ ଏଥିରେ ସାମିଲ ହୋଇ ନର୍ଲା ସିଡିପିଓଙ୍କ ଦୁର୍ନୀତିଖୋର ଓ ଭ୍ରଷ୍ଟାଚାର ଚରମ ସୀମାରେ ପହଞ୍ଚି ଥିବାର ଅଭିଯୋଗ ଆଣି ନର୍ଲା ବ୍ଳକ ସମ୍ମୁଖରେ ଅନଶନରେ ବସିଛନ୍ତି । ନର୍ଲା ସିଡିପିଓ ଗୋଟିଏ ବ୍ଳକରେ ୮ବର୍ଷ ଧରି ରହି ଆସିବା, ଅର୍ଥ ଲାଳସା ଓ ଦୁର୍ନୀତିଖୋର ଅଭିଳାଷ ଯୋଗୁଁ ଅତି ନିମ୍ନମାନର ଛତୁଆ ପ୍ରସ୍ତୁତିରେ ପ୍ରୋତ୍ସାହନ ଦେବା,ଶିବ ଶକ୍ତି ମହାସଂଘ ନାମରେ ବେନିୟମ ଭାବେ ଶକ୍ତି ବାର୍ତ୍ତାର ମହିଳା ମାନଙ୍କୁ ନେଇ ସମାନ୍ତରାଳ ଭାବେ ସିଡିପିଓ ଅନ୍ୟ ଏକ ମହାସଂଘ ଗଠନ କରିବା ଦ୍ଵାରା ରାଜ୍ୟ ସରକାରଙ୍କ ମିଶନ ଶକ୍ତିକୁ ପ୍ରହସନ କରିଥିବା ଅଭିଯୋଗ ଆଣି ମହିଳା ମାନେ ଅନଶନ ଆରମ୍ଭ କରିଛନ୍ତି ।
ଏଠାରେ ସୂଚନାଯୋଗ୍ୟ କିଛି ଦିନ ପୂର୍ବରୁ ସ୍ଥାନୀୟ ସିଡିପିଓଙ୍କ ନାମରେ ତୁଲାଗାଁସ୍ଥିତ ମାଣିକେଶ୍ଵରୀ ଛତୁଆ ପ୍ରସ୍ତୁତକାରୀ ମହିଳାଙ୍କ ଅନେକ ସଙ୍ଗୀନ ଅଭିଯୋଗ ସହ ବିଭିନ୍ନ କେନ୍ଦ୍ରରେ ନିମ୍ନମାନର ଛତୁଆ ବଣ୍ଟନ ଆଦି ଖବର ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲା । ଗତ ୨୦୧୫ ମସିହାରେ ନର୍ଲା ବ୍ଳକରେ ଛତୁଆ ପ୍ରସ୍ତୁତିରେ ଦୁର୍ନୀତି ଅଭିଯୋଗ ନେଇ ବାରମ୍ବାର ଗଣମାଧ୍ୟମରେ ପ୍ରକାଶ ପାଇବା ପରେ ସେହି ସମୟରେ ମା ଦୁର୍ଗା ଏସ୍ଏଚଜିର ନର୍ଲା ଗୋଦାମରେ ଖାଦ୍ୟ ନିରିକ୍ଷକଙ୍କ ଉପସ୍ଥିତରେ ଚଢ଼ାଉ କରାଯାଇଥିଲା । ଉକ୍ତ ସମୟରେ ନର୍ଲା ଆଇସିଡିଏସ ରେ ଛତୁଆ ଦୁର୍ନୀତି ଓ ଭିଜିଲାନ୍ସ ଚଢ଼ାଉର ଖବର ମଧ୍ୟ ଚର୍ଚ୍ଚାର ବିଷୟ ପାଲଟିଥିଲା । ପୁଣି ସେହି ସମୟରେ ନର୍ଲା ସିଡିପିଓ ଦିପ୍ତି ମାର୍ଗାରେଟ ଖଣ୍ଡପାଣି ମା ଦୁର୍ଗା ଏସ୍ଏଚଜିକୁ ଶିଶୁ ଖାଦ୍ୟ ବଣ୍ଟନ ବନ୍ଦ କରିବାକୁ ବାଧ୍ୟ ହୋଇ ଜିଲ୍ଲା ପ୍ରଶାସନ ପକ୍ଷକୁ ଜଣାଇଥିଲେ । ମା ଦୁର୍ଗା ଏସ୍ଏଚଜିର ପ୍ରସ୍ତୁତିମାନ ଠିକ ନ ଥିବା ଦର୍ଶାଇ ବଣ୍ଟନ ଦାୟିତ୍ଵ ବନ୍ଦ କରି ଦିଆଯାଇଥିଲା । (ରିପୋର୍ଟ ପ୍ରଦୀପ କୁମାର ଗଉଡ)
