ଶ୍ରୀକ୍ଷେତ୍ରରେ ପଞ୍ଚୁକ ପାଇଁ ବ୍ଯାପକ ପ୍ରସ୍ତୁତି ସିଂହଦ୍ବାରରେ ପ୍ରବେଶ ଅନ୍ଯ ତିନିଦ୍ବାରରେ ପ୍ରସ୍ଥାନ


ପୁରୀ (ଓଡିଶା ତାଜା ନ୍ୟୁଜ ) ନି.ପ୍ର :- ଚଳିତ ମାସ ୨୧ ତାରିଖରୁ ୨୪ ତାରିଖ ପର୍ଯ୍ୟନ୍ତ ପଞ୍ଚୁକ ବ୍ରତ ପାଇଁ ଶ୍ରୀମନ୍ଦିରରେ ପ୍ରବଳ ଭକ୍ତଙ୍କ ଭିଡ ଲାଗି ରହିବ । ଏଥିପାଇଁ ଜିଲ୍ଲା ପୋଲିସ ପ୍ରଶାସନ ,ଜିଲ୍ଲା ପ୍ରଶାସନ ଓ ଶ୍ରୀମନ୍ଦିର ପ୍ରଶାସନ ପକ୍ଷରୁ ବ୍ଯାପକ ସୁରକ୍ଷା ଓ ଭିଡ ନିୟନ୍ତ୍ରଣ ବ୍ୟବସ୍ଥା କରାଯାଇଛି । କେନ୍ଦ୍ରାଞ୍ଚଳ ଆଇଜି ଡା ସତ୍ଯଜିତ ନାୟକ, ପୁରୀ ଏସପି ପ୍ରତୀକ ସିଂଙ୍କ ଶ୍ରୀମନ୍ଦିର ଭିତର ଓ ବାହାର ସୁରକ୍ଷା ବ୍ଯବସ୍ଥାକୁ ପରିଦର୍ଶନ କରିଛନ୍ତି । ଶ୍ରଦ୍ଧାଳୁଙ୍କ ସୁରକ୍ଷା, ଶୃଙ୍ଖଳିତ ଦର୍ଶନ, ଭିଡ ନିୟନ୍ତ୍ରଣ ଓ ବ୍ଯାରିକେଡ ସର୍ମ୍ପକରେ ଆଲୋଚନା କରାଯାଇଛି ।

ଶ୍ରଦ୍ଧାଳୁ ମାନେ ବଡଦାଣ୍ଡ ବ୍ଯାରିକେଡ ଦେଇ ସିଂହଦ୍ବାରରେ ପ୍ରବେଶ କରିବେ । ବାଇଶି ପାହାଚ ଓ ସାତ ପାହଚ ଦେଇ ଶ୍ରୀବିଗ୍ରହଙ୍କୁ ଦର୍ଶନ କରିବେ । ଦର୍ଶନ ପରେ ଶ୍ରଦ୍ଧାଳୁ ମାନେ ଉତ୍ତର, ପଶ୍ଚିମ ଓ ଦକ୍ଷିଣ ଦ୍ବାର ଦେଇ ପ୍ରସ୍ଥାନ କରିବେ । ଟ୍ରାଫିକ ଓ ପାର୍କିଙ୍ଗ ବ୍ଯବସ୍ଥାକୁ ସୁ ନିୟନ୍ତ୍ରଣ କରାଯିବ । ମାର୍କେଟ ଛକ ଠାରୁ ସିଂହଦ୍ବାର ପର୍ଯ୍ୟନ୍ତ ଅଟୋ ଓ ରିକ୍ସା ପ୍ରବେଶ କରିପାରିବ ନାହିଁ । ଭୁବନେଶ୍ବର ପଟୁ ଆସୁଥିବା ଟୁରିଷ୍ଟ ଓ ଯାତ୍ରୀବାହୀ ବସ ଗୁଡିକ ମାଳତୀପାଟପୁର ବସଷ୍ଟାଣ୍ଡରେ ପାର୍କିଙ୍ଗ କରିବ । ଭୁବନେଶ୍ବର ଓ ବ୍ରହ୍ମଗିରିରୁ ଆସୁଥିବା ଚାରିଚକିଆ ଯାନ ଗୁଡିକ ଜଗନ୍ନାଥ ବଲ୍ଲଭ ପାର୍କିଙ୍ଗ ଓ ଜେଲ ରୋଡ ପାର୍କିଙ୍ଗରେ ରହିବେ ।

ଦୁଇ ଚକିଆ ଯାନ ଗୁଡିକ ମାର୍କେଟ ଛକ ପୂର୍ବରୁ ପାର୍କିଙ୍ଗ କରିବେ । ଶ୍ରଦ୍ଧାଳୁଙ୍କ ସୁରକ୍ଷା ଓ ସହାୟତା ପାଇଁ ୫୦ ପ୍ଲାଟୁନ ପୋଲିସ ଫୋର୍ସ ମୁତୟନ ହେବେ । ବଡଦାଣ୍ଡ ଓ ଟ୍ରାଫିକ ଛକ ଗୁଡିକରେ ୨୪ ଘଣ୍ଟିଆ ସିସି କ୍ଯାମେରା ଜଗି ରହିବ । କୌଣସି ଠାରେ ପ୍ରବଳ ଭିଡ ହେଲେ ଏକ ସ୍ବତନ୍ତ୍ର କ୍ଲିଅରାନ୍ସ ଟିମ ସେଠାରେ ପହଞ୍ଚି ଶ୍ରଦ୍ଧାଳୁଙ୍କୁ ଶୃଙ୍ଖଳିତ ଯାତାୟାତରେ ସହାୟତା କରିବେ । ପଞ୍ଚୁକ ପାଇଁ ତିନି ହଜାର ସରକାରୀ ହବିଷାଳୀ,ଚାରି ହଜାର ଘରୋଇ ହବିଷାଳୀ ଓ ପଞ୍ଚୁକ ପାଇଁ ତିନି ହଜାର ପଞ୍ଚୁକ ହବିଷାଳୀ ଶ୍ରୀମନ୍ଦିରରେ ଶ୍ରୀଜୀଉଙ୍କୁ ଦର୍ଶନ କରି ମାସକ ପୂଣ୍ୟ ଅର୍ଜନ କରିବେ ।

Exit mobile version