ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ) (ନିପ୍ର) :- VISWASS ସ୍କୁଲ୍ ଆଣ୍ଡ କଲେଜ୍ ଅଫ୍ ନର୍ସିଂ ଏବଂ VISWASS ପାରାମେଡିକାଲ୍ କଲେଜ୍ ପକ୍ଷରୁ ନୂତନ ଶିକ୍ଷାବର୍ଷ ୨୦୨୬–୨୭ର ଶୁଭାରମ୍ଭ ଅବସରରେ ୨୦୨୬ ନଭେମ୍ବର ୧ ତାରିଖ ଦିନ ମହାବିଦ୍ୟାଳୟର ବହୁମୁଖୀ ସଭାଗୃହରେ ଅଭିଭାବକ ଓ ନବାଗତ ଛାତ୍ରଛାତ୍ରୀଙ୍କ ନିମନ୍ତେ ଏକ ଭବ୍ୟ ସ୍ୱାଗତ ସମାରୋହ ଆୟୋଜନ କରାଯାଇଥିଲା । କାର୍ଯ୍ୟକ୍ରମର ଆରମ୍ଭରେ ଛାତ୍ରଛାତ୍ରୀ, ଅଭିଭାବକ ଓ କର୍ମଚାରୀବୃନ୍ଦଙ୍କ ସମାଗମ ପରେ ମାନ୍ୟବର ଅତିଥିବୃନ୍ଦଙ୍କ ଉପସ୍ଥିତିରେ ପ୍ରଦୀପ ପ୍ରଜ୍ୱଳନ କରାଯାଇଥିଲା ।
ଏହି ଅବସରରେ ଅନୁଷ୍ଠାନର ମାନ୍ୟବର ଅଧ୍ୟକ୍ଷ ଡ. ପି. ଆର୍. ଘରାଇ, ସମ୍ପାଦିକା ଡ. ନନ୍ଦିନୀ ଘରାଇ, ନିର୍ଦ୍ଦେଶକ ଡ. ଏଲ୍. ଏନ୍. ପଣ୍ଡା, VISWASS ସ୍କୁଲ୍ ଆଣ୍ଡ କଲେଜ୍ ଅଫ୍ ନର୍ସିଂର ଅଧ୍ୟକ୍ଷା ପ୍ରଫେସର ଡ. ସତ୍ୟଭାମା ମିଶ୍ର ଏବଂ VISWASS ପାରାମେଡିକାଲ୍ କଲେଜର ଅଧ୍ୟକ୍ଷ ଡାଃ. ଏ. କେ. ବାହିନୀପତି ଯୋଗଦାନ କରିଥିଲେ। ଛାତ୍ରଛାତ୍ରୀମାନଙ୍କ ଦ୍ୱାରା ପରିବେଷିତ ଏକ ମନୋରମ ସ୍ୱାଗତ ନୃତ୍ୟ ସହିତ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଏହାପରେ ପ୍ରଫେସର ଡ. ସତ୍ୟଭାମା ମିଶ୍ର ସ୍ୱାଗତ ଅଭିଭାଷଣ ପ୍ରଦାନ କରିଥିଲେ।
ଏହି ଅବସରରେ ସହଯୋଗୀ ପ୍ରଫେସର ସୁଶ୍ରୀ ଚିନ୍ମୟୀ ପ୍ରଧାନ “ଶିକ୍ଷା ଓ ସେବାର ଏକ ଗୌରବମୟ ପରମ୍ପରା: ଡ. ପ୍ରଜ୍ଞା ରଞ୍ଜନ ଘରାଇଙ୍କ ଦୂରଦର୍ଶୀ ଯାତ୍ରା” ଶୀର୍ଷକରେ ଏକ ଉପସ୍ଥାପନା ଦେଇ ଶିକ୍ଷା ଓ ସମାଜସେବା କ୍ଷେତ୍ରରେ ତାଙ୍କର ଅସାଧାରଣ ଅବଦାନ ଓ ଦୂରଦର୍ଶୀ ଚିନ୍ତାଧାରା ଉପରେ ଆଲୋକପାତ କରିଥିଲେ । ଏହାପରେ ମାନ୍ୟବର ଅଧ୍ୟକ୍ଷ ଓ ସମ୍ପାଦିକାଙ୍କ ସହ ଏକ ଆଲୋଚନାତ୍ମକ ଅଧିବେଶନ ଆୟୋଜିତ ହୋଇଥିଲା । ଏଥିରେ ଛାତ୍ରଛାତ୍ରୀ ଓ ଅଭିଭାବକମାନେ ନିଜ ନିଜର ମତାମତ ରଖିବା ସହ ମୂଲ୍ୟବାନ ମାର୍ଗଦର୍ଶନ ଲାଭ କରିଥିଲେ ।
ଏହାପରେ ନିର୍ଦ୍ଦେଶକ ଡ. ଏଲ୍. ଏନ୍. ପଣ୍ଡା ଏବଂ VISWASS ପାରାମେଡିକାଲ୍ କଲେଜର ଅଧ୍ୟକ୍ଷ ଡାଃ. ଏ. କେ. ବାହିନୀପତି ନିଜ ନିଜର ଅଭିଭାଷଣ ପ୍ରଦାନ କରିଥିଲେ । ଶେଷରେ କ୍ୟାମ୍ପସ୍ ମ୍ୟାନେଜର ଇଞ୍ଜିନିୟର ରଜନୀଶ କୁମାର ସିଂହ ଧନ୍ୟବାଦ ଅର୍ପଣ କରିଥିଲେ। ଏହାପରେ ମଧ୍ୟାହ୍ନ ଭୋଜନର ବ୍ୟବସ୍ଥା କରାଯାଇଥିଲା । ଏହି ସ୍ୱାଗତ ସମାରୋହ ନୂତନ ଶିକ୍ଷାବର୍ଷର ଏକ ଉଷ୍ମ, ଆନନ୍ଦମୟ ଓ ସ୍ମରଣୀୟ ଶୁଭାରମ୍ଭ ହେବା ସହ ଅନୁଷ୍ଠାନ, ଅଭିଭାବକ ଓ ଛାତ୍ରଛାତ୍ରୀଙ୍କ ମଧ୍ୟରେ ସୁଦୃଢ଼ ସମ୍ପର୍କ ଓ ସମନ୍ୱୟ ସ୍ଥାପନ କରିବାରେ ସହାୟକ ହୋଇଥିଲା।
