ଖୋରଧା-ଜଟଣୀ (ଓଡ଼ିଶା ତାଜା ନ୍ୟୁଜ) (ନିପ୍ର) :- ୟୁନିଟ୍ ଟୁ ସର୍ଭ ଫାଉଣ୍ଡେସନ ଆନୁକୂଲ୍ୟରେ ଜାତୀୟ ଏକତା ଦିବସ ତଥା ଲୌହମାନବ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜୟନ୍ତୀ ଅବସରରେ ଶନିବାର ଜଟଣୀ ଠାରେ ପ୍ରଥମ ସର୍ବ ଓଡ଼ିଶା ମିନି ମାରାଥନ-୨୦୨୬ ସଫଳତାର ସହ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଓଡ଼ିଶାର ବିଭିନ୍ନ ଅଞ୍ଚଳରୁ ଧାବକ, କ୍ରୀଡ଼ାପ୍ରେମୀ, ସ୍ୱେଚ୍ଛାସେବୀ ଓ ନାଗରିକମାନେ ଉତ୍ସାହର ସହ ଅଂଶଗ୍ରହଣ କରି ଏକତା, ସୁସ୍ଥତା,ଶୃଙ୍ଖଳା ଓ ଜାତୀୟ ସଂହତିର ବାର୍ତ୍ତା ପ୍ରଚାର କରିଥିଲେ ।
ମୁଖ୍ୟ ଅତିଥି ଭାବେ ଜଟଣୀ ବିଧାୟକ ବିଭୂତି ଭୂଷଣ ବଳବନ୍ତରାୟ ଯୋଗଦେଇ ସବୁଜ ପତାକା ଦେଖାଇ ମାରାଥନର ଶୁଭାରମ୍ଭ କରିଥିଲେ। ସମ୍ମାନିତ ଅତିଥି ଭାବେ ପାଣ୍ଡବ ଜେନା ଫାଉଣ୍ଡେସନର ପ୍ରତିଷ୍ଠାତା ଡ. ସନ୍ତୋଷ ଜେନା ଓ ବିଜେପି ମୁଖପାତ୍ର ଅନିଲ ବିଶ୍ୱାଳ ଯୋଗ ଦେଇଥିଲେ। ବିଶିଷ୍ଟ ଅତିଥି ଭାବେ ଜଟଣୀ ପୌର ପରିଷଦ ଉପାଧ୍ୟକ୍ଷା ଆରତୀ ରାଉତ ଓ ବିଜୁ ଯୁବ ଜନତା ଦଳ ଉପସଭାପତି ଅନନ୍ତ ଶତପଥୀ ଉପସ୍ଥିତ ଥିଲେ । ଓଲିଉଡ ଅଭିନେତା ଓଁକାର ଆଚାର୍ଯ୍ୟ ବ୍ରାଣ୍ଡ ଆମ୍ବାସଡର ଭାବେ ଯୋଗଦେଇ କାର୍ଯ୍ୟକ୍ରମର ଶୋଭା ବର୍ଦ୍ଧନ କରିଥିଲେ ।
ଫାଉଣ୍ଡେସନ୍ର ନିର୍ଦ୍ଦେଶକ ଡଃ. ନରେଶ ଚନ୍ଦ୍ର ଚୌଧୁରୀ ଏବଂ ଯୁଗ୍ମ ନିର୍ଦ୍ଦେଶକ ସିଦ୍ଧାର୍ଥ ସାହୁ ଙ୍କ ନେତୃତ୍ୱରେ କାର୍ଯ୍ୟକ୍ରମ ପରିଚାଳିତ ହୋଇଥିଲା । ପୁରସ୍କାର ବିତରଣ ଉତ୍ସବକୁ ଜଟଣୀ ସିଆର୍ସିସି ଡଃ. ରଶ୍ମିତା ନାୟକ ଅତି ସୁନ୍ଦର ଓ ପ୍ରାଣବନ୍ତ ଭାବେ ସଞ୍ଚାଳନ କରି ଦର୍ଶକଙ୍କ ମନ ମୋହିଥିଲେ । ମାରାଥନ ପୁରୁଷ ଓ ମହିଳା ଦୁଇ ବର୍ଗରେ ଅନୁଷ୍ଠିତ ହୋଇଥିଲା । ଉଭୟ ବର୍ଗର ଶ୍ରେଷ୍ଠ ତିନି ପ୍ରତିଯୋଗୀଙ୍କୁ ନଗଦ ପୁରସ୍କାର ପ୍ରଦାନ କରାଯାଇଥିଲା । ପୁରୁଷ ବର୍ଗ ପ୍ରଥମ- ଦୟାନିଧି ମୁଣ୍ଡା ୩, ହଜାର ଟଙ୍କା,ଦ୍ୱିତୀୟ – ରୁଦ୍ର ନାରାୟଣ ନାଏକ ୨ ହଜାର ଟଙ୍କା, ତୃତୀୟ – ମୁକେଶ କୁମାର ତିରିଆ ୧ ହଜାର ଟଙ୍କା ।
ମହିଳା ବର୍ଗ ପ୍ରଥମ- ସୁନୀତା ସାନ୍ତା ୩ ହଜାର ଟଙ୍କା,ଦ୍ୱିତୀୟ- ମଧୁ ଶାହ ୨ ହଜାର ଟଙ୍କା, ତୃତୀୟ – ଅନନ୍ୟା ସ୍ୱାଇଁ ୧ ହଜାର ଟଙ୍କା। ସ୍ୱେଚ୍ଛାସେବୀ ଅରବିନ୍ଦ ପଟ୍ଟନାୟକ,ଏ. ଚୈତନ୍ୟ କୁମାର, ଅବିନାଶ ପଟ୍ଟନାୟକ, ଉମାକାନ୍ତ ରାଜଗୁରୁ, ଦୀପଙ୍କର ବେହେରା, ଚନ୍ଦ୍ରକାନ୍ତ ମଲ୍ଲିକ, ସରୋଜ ସାମନ୍ତରାୟ ଓ ବିନୋଦ ସ୍ୱାଇଁଙ୍କ ନିଷ୍ଠାପର ସେବାକୁ ପ୍ରଶଂସା କରାଯାଇଥିଲା। ଫାଉଣ୍ଡେସନ ପକ୍ଷରୁ ସମସ୍ତ ଅତିଥି, ପ୍ରାୟୋଜକ, ପ୍ରତିଯୋଗୀ ଓ ଜିଲ୍ଲା ପ୍ରଶାସନଙ୍କୁ କୃତଜ୍ଞତା ଜ୍ଞାପନ କରାଯିବା ସହ ଏହି ମାରାଥନ ପ୍ରତିବର୍ଷ ଆୟୋଜନ କରାଯିବ ବୋଲି ଘୋଷଣା କରାଯାଇଛି।
