ଜି.ଆର୍. ପ୍ୟାଲେସ୍ରେ ଜମିଲା ମହିଳାଙ୍କ ଉତ୍ସାହ, ନୃତ୍ୟ ଓ ପ୍ରତିଯୋଗିତାରେ ମନ ମୋହିଲା କାର୍ଯ୍ୟକ୍ରମ
ବଲାଙ୍ଗୀର (ଓଡ଼ିଶା ତାଜା ନ୍ୟୁଜ) (ନିପ୍ର) :- ବଲାଙ୍ଗୀରରେ ଭାରତୀୟ ସଂସ୍କୃତି, ଧାର୍ମିକ ଆସ୍ଥା ଓ ପାରମ୍ପରିକ ରୀତିନୀତିର ଅପୂର୍ବ ସମାଗମ ଦେଖିବାକୁ ମିଳିଛି। ଅଖିଳ ଭାରତୀୟ ମାରୱାଡ଼ି ମହିଳା ସମ୍ମିଳନୀ ପକ୍ଷରୁ ଦ୍ୱାଦଶତମ କରୱା ଚୌଥ୍ ସହ ଶରଦ ପୂର୍ଣ୍ଣିମା ଉତ୍ସବ ଜି.ଆର୍. ପ୍ୟାଲେସ୍ରେ ଧୁମ୍ଧାମ୍ରେ ଆୟୋଜିତ ହୋଇଯାଇଛି । ସମ୍ମିଳନୀର ଅଧ୍ୟକ୍ଷା ପୁନମ ଖଣ୍ଡେଲୱାଲ, ଅନିତା ଡାଲମିଆ ଏବଂ ସଙ୍ଗୀତା ଝରୱାଲିଆଙ୍କ ନେତୃତ୍ୱରେ ଆୟୋଜିତ ଏହି ଉତ୍ସବରେ ମହିଳାମାନଙ୍କ ମଧ୍ୟରେ ବେଶ୍ ଉତ୍ସାହ ଓ ଆନନ୍ଦ ଦେଖିବାକୁ ମିଳିଥିଲା।
କାର୍ଯ୍ୟକ୍ରମରେ କଣ୍ଟାବାଞ୍ଜି ବିଧାୟକ ଲକ୍ଷ୍ମଣ ବାଗ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ଅଗ୍ରୱାଲ ସଭା ଟ୍ରଷ୍ଟର ଅଧ୍ୟକ୍ଷ ଅଶୋକ ଛାପଡ଼ିଆ, ସାମ୍ବାଦିକ ସଂଘର ସଭାପତି ମୋହନ ସୋନି, ଅଗ୍ରୱାଲ ସଭା ଟ୍ରଷ୍ଟର ପୂର୍ବତନ ଅଧ୍ୟକ୍ଷ କୈଳାସ ଅଗ୍ରୱାଲ ଏବଂ କୈଳାସ ଚନ୍ଦ୍ର ଅଗ୍ରୱାଲ,ଅନୀଲ ଝରବାଳୀୟ, ମନୋଜ ଭାଇଙ୍କ ସମେତ ଅନେକ ଗଣ୍ୟମାନ୍ୟ ବ୍ୟକ୍ତି ଯୋଗଦେଇଥିଲେ। କରୱା ଚୌଥ୍ ସ୍ୱାମୀଙ୍କ ଦୀର୍ଘାୟୁ ଓ ଦାମ୍ପତ୍ୟ ଜୀବନର ମଙ୍ଗଳ କାମନା ସହ ଜଡ଼ିତ ଏକ ପାରମ୍ପରିକ ପର୍ବ ହୋଇଥିବା ବେଳେ ଶରଦ ପୂର୍ଣ୍ଣିମାର ମଧ୍ୟ ଧାର୍ମିକ ଓ ସାଂସ୍କୃତିକ ଦୃଷ୍ଟିରୁ ବିଶେଷ ମହତ୍ତ୍ୱ ରହିଛି ।
ଏହି ଦୁଇ ପର୍ବକୁ ଏକାଠି ପାଳନ କରିବା ମାଧ୍ୟମରେ ମହିଳାମାନଙ୍କୁ ନିଜ ପରମ୍ପରା ସହ ଯୋଡ଼ିବା ସହ ସାମାଜିକ ଏକତା ଓ ଭାଇଚାରାକୁ ମଜବୁତ କରିବାର ପ୍ରୟାସ କରାଯାଇଥିଲା । ଉତ୍ସବର ମୁଖ୍ୟ ଆକର୍ଷଣ ଥିଲା ନବବିବାହିତା ମହିଳାମାନଙ୍କ ମଧ୍ୟରେ ଆୟୋଜିତ ‘କରୱା ସୁନ୍ଦରୀ’ ପ୍ରତିଯୋଗିତା। ଏହା ସହ ସିଙ୍ଗଲ୍ ଡ୍ୟାନ୍ସ, ଗ୍ରୁପ୍ ଡ୍ୟାନ୍ସ ଓ ଅନ୍ୟାନ୍ୟ ପ୍ରତିଯୋଗିତା ମାଧ୍ୟମରେ ମହିଳାମାନେ ନିଜର କଳା ଓ ପ୍ରତିଭା ପ୍ରଦର୍ଶନ କରିଥିଲେ।
ବିଭିନ୍ନ ପ୍ରତିଯୋଗିତାର ବିଜେତାମାନଙ୍କୁ ଅତିଥିମାନଙ୍କ ଦ୍ୱାରା ସମ୍ମାନିତ କରାଯାଇଥିଲା । ଏହି ଆୟୋଜନକୁ ସଫଳ କରିବାରେ ବିନାୟକ ଡେକୋର ମାଲିକ ଅନୀଲ କେଶବ ଝରବାଳୀୟ ଏବଂ ରୁଦ୍ର ଟ୍ରେଡର୍ସ ସହଯୋଗ କରିଥିଲେ । ପାରମ୍ପରିକ ପର୍ବର ମହତ୍ତ୍ୱକୁ ଅକ୍ଷୁଣ୍ଣ ରଖିବା ସହ ମହିଳାମାନଙ୍କ ମଧ୍ୟରେ ଏକତା, ସଂସ୍କୃତି ଓ ସାମାଜିକ ସମ୍ପର୍କକୁ ସୁଦୃଢ଼ କରିବାର ବାର୍ତ୍ତା ଦେଇ ଏହି ଦ୍ୱାଦଶତମ ଉତ୍ସବ ସମ୍ପନ୍ନ ହୋଇଥିଲା ।
