ଭାରତ ମଣ୍ଡପମ, ଦିଲ୍ଲୀରେ ଆୟୋଜିତ ଭାରତ ଇଣ୍ଟରନ୍ୟାସନାଲ ରାଇସ କନକ୍ଲେଭରେ ବଲିଉଡ ଅଭିନେତା ସୋନୁ ସୁଦଙ୍କ ଦ୍ୱାରା ସମ୍ମାନିତ
କଣ୍ଟାବାଞ୍ଜି (ଓଡ଼ିଶା ତାଜା ନ୍ୟୁଜ) (ନିପ୍ର) :- ଶ୍ୟାମଜୀ ଏଗ୍ରୋ ପ୍ରୋସେସିଂ ଗ୍ରୁପର ଯୁବ ଉଦ୍ୟୋଗୀ ଆଦର୍ଶ ଅଗ୍ରୱାଲ ନିଜର ଉଦ୍ୟମଶୀଳତା, ପରିଶ୍ରମ ଏବଂ ବ୍ୟାବସାୟିକ ପ୍ରତିଭା ବଳରେ ଏକ ଉଲ୍ଲେଖନୀୟ ସଫଳତା ହାସଲ କରି ଅଞ୍ଚଳର ଗୌରବ ବୃଦ୍ଧି କରିଛନ୍ତି। ତାଙ୍କୁ ଦିଲ୍ଲୀର ଭାରତ ମଣ୍ଡପମଠାରେ ଆୟୋଜିତ ଭାରତ ଇଣ୍ଟରନ୍ୟାସନାଲ ରାଇସ କନକ୍ଲେଭ ଅବସରରେ ଇଣ୍ଡିଆନ ରାଇସ ଏକ୍ସପୋର୍ଟର୍ସ ଫେଡେରେସନ (IREF) ପକ୍ଷରୁ ‘ୟଙ୍ଗେଷ୍ଟ ଏଣ୍ଟରପ୍ରେନ୍ୟୋର’ ବା ସବୁଠୁ କମ ବୟସ୍କ ଉଦ୍ୟୋଗୀ ସମ୍ମାନରେ ସମ୍ମାନିତ କରାଯାଇଛି।
ଏହି ପ୍ରତିଷ୍ଠିତ ସମାରୋହରେ ବଲିଉଡ ଅଭିନେତା ସୋନୁ ସୁଦ ଏବଂ ଇଣ୍ଡିଆନ ରାଇସ ଏକ୍ସପୋର୍ଟର୍ସ ଫେଡେରେସନର ଅଧ୍ୟକ୍ଷ ପ୍ରେମ ଗର୍ଗ ଆଦର୍ଶ ଅଗ୍ରୱାଲଙ୍କୁ ସମ୍ମାନିତ କରିଥିଲେ। ଆଦର୍ଶ ଅଗ୍ରୱାଲଙ୍କ ଏହି ସଫଳତା ସେଥିପାଇଁ ମଧ୍ୟ ବିଶେଷ ଯେ ସେ ବ୍ୟବସାୟ ସହିତ ବିମାନ ଚଳାଚଳ କ୍ଷେତ୍ରରେ ମଧ୍ୟ ନିଜର ଯୋଗ୍ୟତା ରଖିଛନ୍ତି। ସେ ଏମବିଏ ଶିକ୍ଷା ହାସଲ କରିଛନ୍ତି ଏବଂ ଜଣେ ପ୍ରାଇଭେଟ ଜେଟ ପାଇଲଟ ମଧ୍ୟ ଅଟନ୍ତି। ବର୍ତମାନ ସେ ଲଡ୍ଡୁ ଗୋପାଳ ଇଣ୍ଡଷ୍ଟ୍ରିଜ ପ୍ରାଇଭେଟ ଲିମିଟେଡର ପରିଚାଳନା ନିର୍ଦେଶକ ଭାବେ କାର୍ଯ୍ୟ କରୁଛନ୍ତି ।
ପ୍ରତିଷ୍ଠିତ ଅଗ୍ରୱାଲ ପରିବାର ସହ ସମ୍ପର୍କ ଆଦର୍ଶ ଅଗ୍ରୱାଲ ସହରର ପ୍ରତିଷ୍ଠିତ ଅଗ୍ରୱାଲ ପରିବାର ସହ ଜଡିତ। ସେ ଶ୍ୟାମଜୀ ମନ୍ଦିର ଟ୍ରଷ୍ଟର ପୂର୍ବତନ ଅଧ୍ୟକ୍ଷ କୁନୁରାମ ଅଗ୍ରୱାଲଙ୍କ ପୌତ୍ର ଏବଂ ଦୀପକ ଅଗ୍ରୱାଲ ଓ ଶ୍ରୀମତୀ ପ୍ରିୟଙ୍କା ଅଗ୍ରୱାଲଙ୍କ ସୁପୁତ୍ର ଅଟନ୍ତି। ସେ ଗୌରୀଶଙ୍କର ସାଇକେଲ ଷ୍ଟୋର ସହ ଜଡିତ ସ୍ୱର୍ଗତ ସୁନୀଲ ଅଗ୍ରୱାଲ, ରାକେଶ ଅଗ୍ରୱାଲ ଏବଂ ସ୍ୱର୍ଗତ ନୀରଜ ଅଗ୍ରୱାଲଙ୍କ ପୁତୁରା ମଧ୍ୟ ଅଟନ୍ତି।
ତାଙ୍କ ପିତା ଶ୍ରୀ ଶ୍ୟାମଜୀ ରାଇସ ମିଲର ମୁଖ୍ୟ ଏବଂ ଇଣ୍ଡିଆନ ରାଇସ ଏକ୍ସପୋର୍ଟର୍ସ ଫେଡେରେସନର ଓଡ଼ିଶା ଜୋନର ଅଧ୍ୟକ୍ଷ ଭାବେ ମଧ୍ୟ ସକ୍ରିୟ ଅଛନ୍ତି । ଶିକ୍ଷା, ବିମାନ ଚଳାଚଳ ଏବଂ ଶିଳ୍ପ ଜଗତରେ ତାଙ୍କର ସକ୍ରିୟତା ଯୁବ ପିଢ଼ି ପାଇଁ ପ୍ରେରଣାଦାୟକ ବୋଲି ବିବେଚନା କରାଯାଉଛି। ତାଙ୍କର ଏହି ସଫଳତାରୁ ଅଞ୍ଚଳର ଯୁବକମାନେ ଉଦ୍ୟମିତା, କୃଷି ଭିତ୍ତିକ ଶିଳ୍ପ ଏବଂ ନୂଆ ବ୍ୟାବସାୟିକ ସୁଯୋଗ ଦିଗରେ ଆଗକୁ ବଢିବା ପାଇଁ ପ୍ରେରଣା ପାଇବେ ।
