ବାତ୍ୟା ‘ଅର୍ଣ୍ଣବ’ର ପ୍ରଭାବରେ ପ୍ରବଳ ବର୍ଷା ବି ସତ୍ୟାଗ୍ରହୀଙ୍କ ମନୋବଳ ଭାଙ୍ଗିପାରିନି
ପୁରୀ (ଓଡ଼ିଶା ତାଜା ନ୍ୟୁଜ) (ନିପ୍ର) :- ପୁରୀ ସହରବାସୀଙ୍କ ପାଇଁ ପୂର୍ବପରି ଶ୍ରୀମନ୍ଦିର ପ୍ରବେଶ ଓ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ ସୁବିଧା ପୁନଃ ପ୍ରଚଳନ ଦାବିରେ ଚାଲିଥିବା ସଚେତନତା ପଦଯାତ୍ରା ଆଜି ୨୧୦ ଦିନରେ ପହଞ୍ଚିଛି । ବାତ୍ୟା ‘ଅର୍ଣ୍ଣବ’ର ପ୍ରଭାବରେ ପୁରୀରେ ପ୍ରବଳ ବର୍ଷା ଲାଗି ରହିଥିବା ସତ୍ତ୍ୱେ ପଦଯାତ୍ରୀମାନେ ନିଜର ନ୍ୟାଯ୍ୟ ଦାବି ନେଇ ଅଟଳ ରହିଛନ୍ତି । ପ୍ରତିକୂଳ ପାଗକୁ ଖାତିର ନକରି ଏହି ଶାନ୍ତିପୂର୍ଣ୍ଣ ଆନ୍ଦୋଳନ ଜାରି ରହିବା ସ୍ଥାନୀୟ ଭକ୍ତଙ୍କ ଦୃଢ଼ ଆସ୍ଥା ଓ ସଂକଳ୍ପକୁ ପ୍ରତିଫଳିତ କରୁଛି ।
ଏହି ସଚେତନତା ପଦଯାତ୍ରା ୧ ଏପ୍ରିଲ ଉତ୍କଳ ଦିବସରୁ ଶ୍ରୀଗୁଣ୍ଡିଚା ମନ୍ଦିରରୁ ଏବଂ ଏପ୍ରିଲ ୨ ତାରିଖରେ ବଳଗଣ୍ଡିସ୍ଥିତ ଭକ୍ତ ସାଲବେଗ ପୀଠରୁ ଆରମ୍ଭ ହୋଇଥିଲା । ସେହିଦିନଠାରୁ ପଦଯାତ୍ରୀମାନେ ପ୍ରତିଦିନ ସିଂହଦ୍ୱାର ସମ୍ମୁଖରେ ଶାନ୍ତିପୂର୍ଣ୍ଣ ଭାବେ ନିଜର ଦାବି ଜଣାଇ ଆସୁଛନ୍ତି । ଦୀର୍ଘ ୨୧୦ ଦିନ ଧରି ଜାରି ରହିଥିବା ଏହି ସତ୍ୟାଗ୍ରହ ସତ୍ୟ, ଅହିଂସା ଓ ଗଣତାନ୍ତ୍ରିକ ପଦ୍ଧତିରେ ନ୍ୟାୟ ହାସଲ କରିବାର ଏକ ନିରନ୍ତର ପ୍ରୟାସ ।
ପଦଯାତ୍ରାର ଆବାହକ ଶ୍ରୀ ସ୍ୱାଧୀନ କୁମାର ପଣ୍ଡା କହିଛନ୍ତି ଯେ, ପୁରୀ ସହର ଓ ସଦରବାସୀଙ୍କ ପାଇଁ ପୂର୍ବପରି ଶ୍ରୀମନ୍ଦିର ପ୍ରବେଶ ଓ ଦର୍ଶନ ସୁବିଧା ପୁନଃ ପ୍ରଚଳନ ନହେବା ପର୍ଯ୍ୟନ୍ତ ଏହି ଅହିଂସାତ୍ମକ ସତ୍ୟାଗ୍ରହ ଅବ୍ୟାହତ ରହିବ । ବର୍ଷା ହେଉ କି ଅନ୍ୟ କୌଣସି ପ୍ରତିକୂଳ ପରିସ୍ଥିତି, ନିଜର ନ୍ୟାଯ୍ୟ ଦାବି ପ୍ରତି ଆନ୍ଦୋଳନକାରୀଙ୍କ ପ୍ରତିବଦ୍ଧତା ଅତୁଟ ରହିବ । ଏହି ଆନ୍ଦୋଳନ କାହାରି ବିରୋଧରେ ନୁହେଁ; ବରଂ ପୁରୀବାସୀଙ୍କ ଧାର୍ମିକ ଅଧିକାର, ସ୍ୱାଭିମାନ ଓ ସମାନ ସମ୍ମାନର ସୁରକ୍ଷା ପାଇଁ ଉଦ୍ଦିଷ୍ଟ ।
ମହାପ୍ରଭୁ ଶ୍ରୀଜଗନ୍ନାଥଙ୍କ ସଂସ୍କୃତି ସମାନତା, ସମନ୍ୱୟ ଓ ଭାଇଚାରାର ବାର୍ତ୍ତା ବହନ କରେ । ଏହି ଆଦର୍ଶକୁ ଆଧାର କରି ପୁରୀବାସୀଙ୍କ ଦୀର୍ଘଦିନର ଦାବିର ସମାଧାନ କରିବା ସହ ଶ୍ରୀମନ୍ଦିର ଦର୍ଶନ ପାଇଁ ଏକ ସ୍ଥାୟୀ ବ୍ୟବସ୍ଥା ଗ୍ରହଣ କରିବାକୁ ସରକାରଙ୍କ ନିକଟରେ ପଦଯାତ୍ରୀମାନେ ଦାବି ଜଣାଇଛନ୍ତି । ଆଜିର ଏହି ୨୧୦ତମ ଦିନର ଅହିଂସାତ୍ମକ ଜନଜାଗରଣ ପଦଯାତ୍ରାରେ ସର୍ବଶ୍ରୀ ହରିଶଙ୍କର ମିଶ୍ର, ଚକ୍ରଧର ମହାପାତ୍ର ,
ସୁକାନ୍ତ ପଣ୍ଡା, ବିଶ୍ୱନାଥ ମିଶ୍ର, ନୃସିଂହନାଥ ନାୟକ, କିଶୋର ଚନ୍ଦ୍ର ଦାସ, ଭାରତୀ ମହାନ୍ତି, ମନୀଷା ପାତ୍ର, ଚିକି ସାହୁ, ମମତା ସ୍ୱାଇଁ, ରମେଶ ଚନ୍ଦ୍ର ମହାନ୍ତି, ମନୋରଞ୍ଜନ ରଣସିଂହ, ଶିଶିରକାନ୍ତ ଶତପଥୀ, ବରୁଣ ମହାପାତ୍ର, ସନ୍ତୋଷ ସେନାପତି, ରଶ୍ମିରଞ୍ଜନ ପାତ୍ର, ବାପିନା ସାମନ୍ତରାୟ, ଭୋଳା ଓ ମାନସ ପଟ୍ଟନାୟକଙ୍କ ସମେତ ଅନ୍ୟାନ୍ୟ ପଦଯାତ୍ରୀ ଯୋଗଦେଇ ଦାବି ପ୍ରତି ନିଜର ଏକତା ଓ ସମର୍ଥନ ପ୍ରକାଶ କରିଥିଲେ ।
