କଟକ (ଓଡ଼ିଶା ତାଜା ନ୍ୟୁଜ) (ନିପ୍ର) :- ସମଗ୍ର ରାଜ୍ୟରେ ନିଶା ନିବାରଣ ସଚେତନତା କାର୍ଯ୍ୟକ୍ରମ ଚାଲିଥିବା ବେଳେ କଟକ ଜିଲ୍ଲା ଅବକାରୀ ବିଭାଗର କଟକ ଜିଲ୍ଲା ଅବକାରୀ ଅଧିକ୍ଷକ ଶ୍ରୀ କରୁଣା ଶଙ୍କର ତ୍ବିଓ୍ବାରୀଙ୍କ ନିର୍ଦ୍ଦେଶ କ୍ରମେ ଆଜି କଟକ ଜିଲ୍ଲା ସହରାଞ୍ଚଳ ଅବକାରୀ ନିରୀକ୍ଷକ ଶ୍ରୀ କମଲ ଲୋଚନ ପାଇକରାୟ ସଦଳବଳେ କଟକର ବାଦାମବାଡ଼ି ଥାନା ଅନ୍ତର୍ଗତ ନେତାଜୀ ବସ୍ ଟର୍ମିନାଲ ନିକଟସ୍ଥ କାଳି ମନ୍ଦିର ରୋଡ଼ ନିକଟରେ ଅତର୍କିତ ଚଢ଼ାଉ କରି କଟକ ସତୀଚଉରା(ଇମାମପଡା) ର ୨୬ ବର୍ଷ ବୟସ୍କା ରେଶମା ବେଗମ୍ ନାମକ ମହିଳାଙ୍କୁ ଗିରଫ କରିବା ସହ ତାଙ୍କ ନିକଟରୁ ୬୨ ଗ୍ରାମର ହିରୋଇନ୍ ଓ ଏହି କାରବାରରେ ବ୍ୟବହୃତ ଏକ ହିରୋ ଆକ୍ଟିଭା ନଂ:-ଓଡି.ଜିରୋ.୫.ବିଏଚ୍-୭୨୯୮ କୁ ଜବତ କରିଛନ୍ତି ।
ଏହି ଜବତ ସାମଗ୍ରୀର ଆନୁମାନିକ ମୂଲ୍ୟ ପ୍ରାୟ . ୭ଲକ୍ଷ,୧୦ ହଜାର ଟଙ୍କା ହେବ ବୋଲି ଅବକାରୀ ବିଭାଗ ପକ୍ଷରୁ ସୂଚନା ଦିଆଯାଇଛି । ଚୋରା ମହିଳା ନିଶା ବେପାରୀଙ୍କ ବିରୁଦ୍ଧରେ ଓଡ଼ିଶା ଅବକାରୀ ଆଇନ ୧୯୮୫ ର ଧାରା ଏନ୍.ଡି.ପି.ଏସ୍ ୨୧(ବି) ଅନୁଯାୟୀ ଅବକାରୀ ଥାନାରେ ଏକ ମାମଲା ନଂ:-୧୦୨/୨୦୨୬-୨୭ ରୁଜ୍ଜୁ କରାଯାଇ ମହିଳାଙ୍କୁ କୋର୍ଟ ଚାଲାଣ କରାଯାଇଛି ଏବଂ ଜାମିନ ନାମଞ୍ଜୁର ହେତୁ ତାଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି ।
ଏହି ଚଢ଼ାଉରେ ନିରୀକ୍ଷକ ଶ୍ରୀ ପାଇକରାୟଙ୍କ ସହ ଅବକାରୀ ଥାନା ଭାରପ୍ରାପ୍ତ ଅଧିକାରୀଣୀ ସୁଶ୍ରୀ ସଙ୍ଗୀତା ମହାପାତ୍ର, ସହକାରୀ ଉପ-ନିରୀକ୍ଷକ ଶ୍ରୀମତୀ ସୁନୀତା ଏଣ୍ଡ, ମହିଳା କନେଷ୍ଟବଳ ଶ୍ରୀମତୀ ବାସନ୍ତୀ ସଲିମା, କନେଷ୍ଟବଳ ଶ୍ରୀ ସୁନୀଲ କୁମାର ବଳ ଓ ଶ୍ରୀ ରଞ୍ଜନ କୁମାର ଭୋଇ ସାମିଲ ଥୂଲେ । ଏହି ଚଢାଉ କାର୍ଯ୍ୟକ୍ରମ ଆଗାମୀ ଦିନରେ ଆହୁରି ବ୍ୟାପକ କରାଯିବ ବୋଲି ଅବକାରୀ ଅଧିକ୍ଷକ ଶ୍ରୀ ତିୱାରୀ କହିଛନ୍ତି ।
