ପୁରୀ (ଓଡିଶା ତାଜା ନ୍ୟୂଜ ) (ନି.ପ୍ର) ଭୁବନେଶ୍ୱର :- ପୁରୀର ଜିଲ୍ଲା କ୍ରୀଡ଼ା ପରିସର ଖୋ ଖୋ ଏକାଡେମୀରେ ଅନୁଷ୍ଠିତ ୫୬ତମ ଓଡ଼ିଶା ରାଜ୍ୟ ସିନିୟର ଖୋ ଖୋ ଚାମ୍ପିଅନସିପ୍ (ବାଳକ ଓ ବାଳିକା) ୨୦୨୬ରେ ଓଡ଼ିଶା ଏଏମ୍/ଏନ୍ଏସ୍ ଇଣ୍ଡିଆ ଖୋ ଖୋ ହାଇ ପରଫରମାନ୍ସ ସେଣ୍ଟର (ଓଡ଼ିଶା ଏଏମ୍/ଏନ୍ଏସ୍ ଖୋ ଖୋ ଏଚପିସି)ର ଆଥଲେଟ୍ ମାନେ ଉତ୍କୃଷ୍ଟ ପ୍ରଦର୍ଶନ କରିଛନ୍ତି। ବିଭିନ୍ନ ଜିଲ୍ଲା ଓ ଅନୁଷ୍ଠାନ ଦଳଗୁଡ଼ିକର ପ୍ରତିନିଧିତ୍ୱ କରି ଖେଳାଳିମାନେ ଚାମ୍ପିୟନସିପ୍ ବିଜୟରେ ଉଲ୍ଲେଖନୀୟ ଅବଦାନ ରଖିବା ସହ ବ୍ୟକ୍ତିଗତ ଭାବେ ଶ୍ରେଷ୍ଠ ସମ୍ମାନ ହାସଲ କରିଥିଲେ। ବରିଷ୍ଠ ବାଳକ ବର୍ଗରେ ପୁରୀ ଚାମ୍ପିୟନ ହୋଇଥିବାବେଳେ, ଓଡ଼ିଶା ଏଏମ୍/ଏନ୍ଏସ୍ ଖୋ ଖୋ ଏଚପିସିର ଖେଳାଳି ଶିବ ଗୁଣ୍ଟା, ଶୁଭମ ବିଶ୍ୱାଳ, ଆଦିତ୍ୟ ଦାସ ଓ ସୌମ୍ୟ ରଞ୍ଜନ ସ୍ୱାଇଁ ଦଳର ଟାଇଟଲ୍ ବିଜୟ ଅଭିଯାନରେ ପ୍ରମୁଖ ଭୂମିକା ନିର୍ବାହ କରିଥିଲେ ।
ଏହି ସଫଳତାକୁ ଆହୁରି ସୁଦୃଢ଼ କରି ଓଡ଼ିଶା ଏଏମ୍/ଏନ୍ଏସ୍ ଖୋ ଖୋ ଏଚପିସିର ଶିବ ଗୁଣ୍ଟା ଟୁର୍ଣ୍ଣାମେଣ୍ଟରେ ଉତ୍କୃଷ୍ଟ ପ୍ରଦର୍ଶନ ପାଇଁ ଶ୍ରେଷ୍ଠ ଆଟାକର ଭାବେ ବିବେଚିତ ହୋଇଥିଲେ । ବରିଷ୍ଠ ବାଳିକା ବର୍ଗରେ ରୋମାଞ୍ଚକର ଫାଇନାଲ୍ ମ୍ୟାଚ୍ ଡ୍ର’ରେ ଶେଷ ହେବା ପରେ କିସ୍ ବିଶ୍ୱବିଦ୍ୟାଳୟ ଓ ବାଲେଶ୍ୱରକୁ ଯୁଗ୍ମ ଚାମ୍ପିୟନ ଘୋଷଣା କରାଯାଇଥିଲା। ଓଡ଼ିଶା ଏଏମ୍/ଏନ୍ଏସ୍ ଖୋ ଖୋ ଏଚପିସିର ଖେଳାଳି କାଦମ୍ବିନୀ ମାଝୀ, ଶୁଭଶ୍ରୀ ସିଂ, ସବିତା ମୁର୍ମୁ, ଦୁର୍ଗାସିନୀ ମାଝୀ, ଲିସାରାଣୀ ରାଇତା, ଶୁଭଶ୍ରୀ ମଲ୍ଲିକ, ଆଶିକା କୁଜୁର, ଚିନ୍ମୟୀ ପ୍ରଧାନ ଓ ରକ୍ତିମା ଭଣ୍ଡା କିସ୍ ବିଶ୍ୱବିଦ୍ୟାଳୟ ପକ୍ଷରୁ ପ୍ରତିନିଧିତ୍ୱ କରିଥିବାବେଳେ, ରଞ୍ଜିତା ବାରିକ ବାଲେଶ୍ୱର ପକ୍ଷରୁ ଖେଳିଥିଲେ ।
ଏହା ସହିତ, ଓଡ଼ିଶା ଏଏମ୍/ଏନ୍ଏସ୍ ଖୋ ଖୋ ଏଚପିସିର ଆଥଲେଟ୍ ମାନେ ବ୍ୟକ୍ତିଗତ ବର୍ଗରେ ମଧ୍ୟ ପ୍ରମୁଖ ସମ୍ମାନ ହାସଲ କରିଥିଲେ। ଶୁଭଶ୍ରୀ ସିଂ ଶ୍ରେଷ୍ଠ ଆଟାକର ଏବଂ ରଞ୍ଜିତା ବାରିକ ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ । ଏହି ଚାମ୍ପିୟନସିପ୍ରେ ଖୋ ଖୋ ଫେଡେରେସନ୍ ଅଫ୍ ଇଣ୍ଡିଆ, ଓଡ଼ିଶା ଖୋ ଖୋ ଆସୋସିଏସନ୍ ଏବଂ ରାଜ୍ୟ କ୍ରୀଡ଼ା ପ୍ରଶାସନର ଅଧିକାରୀମାନେ ଯୋଗ ଦେଇଥିଲେ । ଆଥଲେଟ୍ ମାନଙ୍କୁ ଅଭିନନ୍ଦନ ଜଣାଇ ଏଏମ୍/ଏନ୍ଏସ୍ ଇଣ୍ଡିଆ ମାନବ ସମ୍ବଳ ଓ ପ୍ରଶାସନ ବିଭାଗ ନିର୍ଦ୍ଦେଶକ ତଥା ଭାଇସ୍ ପ୍ରେସିଡେଣ୍ଟ ଶ୍ରୀ ଆଶୁତୋଷ ତେଲାଙ୍ଗ କହିଛନ୍ତି “୫୬ତମ ଓଡ଼ିଶା ରାଜ୍ୟ ବରିଷ୍ଠ ଚାମ୍ପିୟନସିପ୍ରେ ଆମ ଖେଳାଳିମାନଙ୍କ ଉତ୍କୃଷ୍ଟ ପ୍ରଦର୍ଶନ ସେମାନଙ୍କ ଶୃଙ୍ଖଳା, ନିଷ୍ଠା ଏବଂ ଓଡ଼ିଶା ଏଏମ୍/ଏନ୍ଏସ୍ ଇଣ୍ଡିଆ ଖୋ ଖୋ ହାଇ ପରଫର୍ମାନ୍ସ ସେଣ୍ଟରରେ ପ୍ରଦାନ କରାଯାଉଥିବା ସଂଗଠିତ ପ୍ରଶିକ୍ଷଣକୁ ପ୍ରତିଫଳିତ କରୁଛି ।
ଦଳଗତ ଓ ବ୍ୟକ୍ତିଗତ ବର୍ଗରେ ସେମାନଙ୍କ ସଫଳତା କ୍ରୀଡ଼ା ପ୍ରତିଭାର ବିକାଶ ଏବଂ ଖୋ ଖୋ କ୍ରୀଡ଼ାରେ ଉତ୍କର୍ଷତା ହାସଲ କରିବାର ଏକ ପ୍ରମୁଖ କେନ୍ଦ୍ର ଭାବେ ଓଡ଼ିଶାର ସ୍ଥିତିକୁ ଆହୁରି ସୁଦୃଢ଼ କରିବା ପ୍ରତି ଆମର ପ୍ରତିବଦ୍ଧତାକୁ ପୁନଃପ୍ରମାଣିତ କରୁଛି।” ଓଡ଼ିଶା ଏଏମ୍/ଏନ୍ଏସ୍ ଇଣ୍ଡିଆ ଖୋ ଖୋ ଏଚପିସି ଉତ୍କର୍ଷତାର ଏକ ପ୍ରମୁଖ କେନ୍ଦ୍ର ଭାବେ ପ୍ରତିଷ୍ଠିତ ହୋଇଛି । ଏଠାରେ ବିଶ୍ୱସ୍ତରୀୟ ପ୍ରଶିକ୍ଷଣ, ବୈଜ୍ଞାନିକ ସହାୟତା ଏବଂ ଏକ ବୃତ୍ତିଗତ ପ୍ରଶିକ୍ଷଣ ବ୍ୟବସ୍ଥା ଯୋଗାଇ ଦିଆଯାଉଛି, ଯାହା ଖେଳାଳିମାନଙ୍କୁ ରାଜ୍ୟ, ଆଞ୍ଚଳିକ ଓ ଜାତୀୟ ସ୍ତରରେ ନିଜର ପ୍ରତିଭା ପ୍ରଦର୍ଶନ କରିବା ସହ ଉତ୍କୃଷ୍ଟ ପ୍ରଦର୍ଶନ ହାସଲ କରିବାକୁ ସକ୍ଷମ କରୁଛି ।
