ଖଣ୍ଡପଡା (ଓଡିଶା ତାଜା ନ୍ୟୂଜ ) ନି.ପ୍ର :- ଖଣ୍ଡପଡ଼ା ସହର ସମେତ ଆଖପାଖ ଅଞ୍ଚଳରେ ଅବସ୍ଥିତ ପୂଜା ମଣ୍ଡପ ଗୁଡିକରେ ମା ଦୁର୍ଗାଙ୍କ ମୃଣୟ ମୂର୍ତ୍ତି ପୂଜା ପାଉଛନ୍ତି।ସପ୍ତମୀ ତିଥିରୁ ଏକାଧିକ ପୂଜା ମଣ୍ଡପରେ ମା’ ଙ୍କ ମୂର୍ତ୍ତି ପୂଜା ପାଉଥିବା ବେଳେ ନିକଟସ୍ଥ ଖଳିସାହି ଗ୍ରାମ ଶାରଦୀୟ ଦୁର୍ଗା ପୂଜା ଯୋଗୁଁ ଉତ୍ସବ ମୁଖର ହୋଇ ଉଠିଛି।ଖଣ୍ଡପଡ଼ା ସହରର ସର୍ବ ପୁରାତନ ତଳସାହି ପୂଜା ମଣ୍ଡପରେ ମା ଦୁର୍ଗାଙ୍କ ୭୫ ତମ ପୂଜା ଉତ୍ସବ ମହାସମାରୋହରେ ଆରମ୍ଭ ହୋଇଛି।ମା’ ଙ୍କ ଦର୍ଶନ ନିମନ୍ତେ ସଂନ୍ଧ୍ୟା ସମୟରେ ସମସ୍ତ ପୂଜା ମଣ୍ଡପ ଗୁଡିକ ନିକଟରେ ଶ୍ରଦ୍ଧାଳୁଙ୍କ ଭିଡ଼ ପରିଲକ୍ଷିତ ହେଉଛି ।
ରଙ୍ଗ ବେରଙ୍ଗର ଆଲୋକମାଳାରେ ପୂଜା ମଣ୍ଡପ ଗୁଡିକ ଝଲସି ଉଠୁଥିବା ବେଳେ ଗୁରୁବାର ଦିନ ତଳ ସାହି ପୁଜା କମିଟିର ସଦସ୍ୟମାନଙ୍କର ସହଯୋଗରେ ରକ୍ତଦାନ ଶିବିର ଆୟୋଜନ କରିଥିଲେ। ଏହି କାର୍ଯ୍ୟକ୍ରମ ରେ ଖଣ୍ଡପଡ଼ା ପୋଲିସ ଅଧିକାରୀ କୃତିବାସ ହରିଚନ୍ଦନ ଯୋଗଦାନ ଦେବା ସହ ସ୍ବାସ୍ଥ୍ୟ ପରୀକ୍ଷା କରି ରକ୍ତଦାନ କରିଥିଲେ। ସ୍ଥାନୀୟ ଯୁବକମାନେ ସ୍ବାଛା କୃତ ଭାବେ ୪୪ ଜଣ ରକ୍ତଦାନ କରି ଥିବା ଜଣାପଡିଛି।ବିଭିନ୍ନ ପୂଜା କମିଟି ପକ୍ଷରୁ ଏ ଅବସରରେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିବା ସୂଚନା ମିଳିଛି।ଖଣ୍ଡପଡ଼ା ସହର ସମେତ ବ୍ଲକ ଅଞ୍ଚଳର ବିଭିନ୍ନ ସ୍ଥାନରେ ଅବସ୍ଥିତ ୧୦୦ ରୁ ଉର୍ଦ୍ଧ୍ବ ପୂଜା ମଣ୍ଡପରେ ମା ଦୁର୍ଗାଙ୍କ ମୃଣୟ ମୂର୍ତ୍ତି ପୂଜା ପାଉଥିବା ଜଣାପଡିଛି ।
ବନମାଳିପୁର ଗ୍ରାମ ବଡସାହି ଓ ନିକଟସ୍ଥ ନିମପାଟଣା ଗ୍ରାମରେ ନିଆରା ଢଙ୍ଗରେ ପାଳିତ ହୋଇଛି ଦଶହରା ପର୍ବ। ବର୍ଷ ବର୍ଷ ଧରି ପ୍ରଚଳିତ ପରମ୍ପରା ଅନୁଯାୟୀ ପବିତ୍ର ଦଶହରା ଦିନ ଖାଡୁ ବଳଦକୁ ଅନୁକୂଳ ଭାବେ ଗ୍ରହଣ କରାଯାଇ ପୂଜାର୍ଚ୍ଚନା କରା ଯାଇଥିଲା। ପ୍ରଥମେ ବଳଦକୁ ଚାନ୍ଦୁଆ,ଘାଗୁଡି,ଘଣ୍ଟି ପିନ୍ଧାଇ ସାଜସଜ୍ଜା କରାଯିବା ସହ ଖାଡୁ ବଳଦର ବିଭିନ୍ନ ସରଞ୍ଜାମକୁ ଗୃହକର୍ତ୍ତାଙ୍କ ଦ୍ଵାରା ପୂଜା କରାଯାଇଥିଲା। ସଂନ୍ଧ୍ୟାରେ ଝାଞ୍ଜ, ଖୋଳ,ମୃଦଙ୍ଗ ସହ ସଙ୍କୀର୍ତ୍ତନ କରି ଖାଡୁ ବଳଦକୁ ଗ୍ରାମ ପରିକ୍ରମା କରାଯାଇଥିଲା।ଏ ଅବସରରେ ଗ୍ରାମର ଆରାଧ୍ୟ ମା’ ବ୍ରାହ୍ମଣୀ ଦେବୀଙ୍କ ନିକଟରେ ସ୍ଵତନ୍ତ୍ର ରୀତିନୀତି ଅନୁଯାୟୀ ପୂଜାର୍ଚ୍ଚନା ପର୍ବ ଅନୁଷ୍ଠିତ ହୋଇଥିଲା ।
ଖାଡୁ ବଳଦ ଭଳି ଅନନ୍ୟ ତଥା ବିଲୁପ୍ତ ପ୍ରାୟ ପ୍ରାଚୀନ ପରମ୍ପରାକୁ ଦିର୍ଘ ବର୍ଷ ଧରି ବଞ୍ଚାଇ ରଖିଥିବା ବନମାଳିପୁର ଓ ନିମପାଟଣା ଗ୍ରାମବାସୀଙ୍କୁ ସମଗ୍ର ଖଣ୍ଡପଡ଼ା ଅଞ୍ଚଳବାସୀ ଭୁରିଭୁରି ପ୍ରଶଂସା କରିଥିବା ଜଣାପଡିଛି।ଦଶହରା ପୂଜା ଯୋଗୁଁ ଉତ୍ସବମୁଖର ଖଳି ସାହି ଚଳିତବର୍ଷ ଗ୍ରାମର ୫ ଟି ପୂଜା ମଣ୍ଡପରେ ମା’ ଦୁର୍ଗାଙ୍କ ମୃଣୟ ମୂର୍ତ୍ତି ପୂଜା ପାଉଛନ୍ତି।ପୂଜା ମଣ୍ଡପରେ ସାଜସଜ୍ଜା ସାଙ୍ଗକୁ ଆକର୍ଷଣୀୟ ତୋରଣ ଦର୍ଶକମାନଙ୍କ ମନ ଛୁଇଁ ପାରିଥିବା ବେଳେ ମା’ ଙ୍କ ଦର୍ଶନ ନିମନ୍ତେ ସଂନ୍ଧ୍ଯା ସମୟରେ ପୂଜା ମଣ୍ଡପ ଗୁଡିକ ନିକଟରେ ଶ୍ରଦ୍ଧାଳୁଙ୍କ ଅସମ୍ଭବ ଭିଡ ପରିଲକ୍ଷିତ ହେଉଛି।
ରଙ୍ଗୀନ ଆଲୋକମାଳାରେ ପୂଜାମଣ୍ଡପ ସମେତ ଖଳିସାହି ଗ୍ରାମର ଗଳିକନ୍ଧି ରାସ୍ତା ଝଲସି ଉଠୁଛି। ଟ୍ରାଫିକ ବ୍ୟବସ୍ଥା ନିୟନ୍ତ୍ରଣ ନିମନ୍ତେ ଖଣ୍ଡପଡ଼ା ପୁଲିସ ପ୍ରଶାସନ ପକ୍ଷରୁ ବ୍ୟାପକ ପୁଲିସ ଫୋର୍ସ ମୁତୟନ କରାଯାଇଥିବା ଜଣାଯାଇଛି।ରାତ୍ର କାଳରେ ପୂଜା ମଣ୍ଡପ ନିକଟରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେଉଛି।ଆସନ୍ତା ୨୩ ତାରିଖ ଶୁକ୍ରବାର ଅପରାହ୍ନରେ ଜଗତଜନନୀ ମା’ ଦୁର୍ଗାଙ୍କର ଭଷାଣି ଉତ୍ସବ ଅନୁଷ୍ଠିତ ହେବ ବୋଲି ବିଭିନ୍ନ ପୂଜା କମିଟିର ସଦସ୍ଯମାନଙ୍କ ଠାରୁ ପ୍ରକାଶ ।
