ହିଞ୍ଜିଳିକାଟୁ (ଓଡ଼ିଶା ତାଜା ନ୍ୟୁଜ) (ନିପ୍ର) :- ହିଞ୍ଜିଳିକାଟୁ ଥାନା ଅଞ୍ଚଳରେ ଗାଈ,ଗୋରୁ ପୋଢ ଓ ମଇଁଷି ବେଧଡକ ଭାବେ ଚାଲାଣ ହେଉଥିବା ଜଣାପଡ଼ିଛି। ଏବେ ଗୋମାଫିଆ ଓ ସିଣ୍ଡିକେଟ ଦୁହେଁ ଦୁହିଁଙ୍କ ଭାଇ ପାଲଟି ଯାଇଥିବା ସୂତ୍ରରୁ ଜଣାପଡ଼ିଛି। ପ୍ରଚ୍ଛଦ ପଟରେ ସିଣ୍ଡିକେଟ ଗୋମାଫିଆଙ୍କୁ ସାହସ ଦେବା ଫଳରେ ଗାଁ ଗହଳରୁ ଗାଈ, ଗୋରୁ, ପୋଢ ଓ ମଇଁଷି ବେଧଡକ ଭାବେ ହିଞ୍ଜିଳି ଥାନା ଅଞ୍ଚଳ ଦେଇ ପରିବହନ ହେଉଥିବା ନୀତି ଦିନିଆ ଘଟଣା ପାଲଟିଛି। ପୂର୍ବରୁ ହିଞ୍ଜିଳି ଥାନା ପୁଲିସ କିଛି ଗୋମାଫିଆଙ୍କୁ ବାନ୍ଧି ଜେଲ ଠୁଙ୍କିବା ଫଳରେ କିଛି ଦିନ ପାଇଁ ଆଖପାଖ ଅଞ୍ଚଳର ଗାଁରୁ ଗୋଚାଲାଣ କାରବାର ଥମିଥିବା ଜଣା ପଡ଼ିଥିଲା। କିନ୍ତୁ କିଛି ଦିନର ନିରବତା ପରେ ଏବେ ପୁଣି ଗୋମାଫିଆଙ୍କ ସାହସ ପୁରାପୁରି ବଢ଼ି ଯାଇଛି ।
ସିଣ୍ଡିକେଟର ଛତ୍ର ଛାୟା ତଳେ ରହି ଓ ସେମାନଙ୍କ ପ୍ରୋତ୍ସାହନ ଓ ସମର୍ଥନ ପାଇ ଗୋମାଫିଆ ନିଜ ଇଛା ଅନୁଯାୟୀ ଗୋଚାଲାଣ କରୁଥିବା ଜଣାପଡ଼ିଛି। ପୂର୍ବରୁ ହିଞ୍ଜିଳି ଥାନା ଅଞ୍ଚଳର କିଛି ପେଶାଦାର ଗୋମାଫିଆ ଗାଁ ଗଣ୍ଡା ବୁଲି ବୁଲି ଗାଈ,ଗୋରୁ, ପୋଢ ଓ ମଇଁଷି କିଣି ପିକଅପ ଗାଡ଼ି ଯୋଗେ ରାଜ୍ୟ ଓ ରାଜ୍ୟ ବାହାରକୁ ଚାଲାଣ କରୁଥିଲେ। ପାଟ୍ରୋଲିଂ ବେଳେ କିମ୍ୱା ଗୁପ୍ତ ସୂଚନା ଆଧାରରେ ହିଞ୍ଜିଳି ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ଗୋଚାଲାଣ ଗାଡ଼ି ସହ ଚାଳକକୁ ଗିରଫ କରି ଜେଲ ହାଜତକୁ ପଠାଉଥିଲା। ଏସବୁ ନିୟମିତ ଭାବେ ହେଉ ନ ଥିଲେ ମଧ୍ୟ ଗୋମାଫିଆଙ୍କ ମଧ୍ୟରେ ଗିରଫଦାରୀ ଭୟରେ ଗୋଚାଲାଣ ପରିମାଣରେ ହ୍ରାସ ଦେଖାଦେଇଥିଲା। ପରେ ସ୍ଥାନୀୟ ଅଞ୍ଚଳର ଗୋସେଵକଙ୍କ ଅଭିଯୋଗ ଆଧାରରେ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ଗୋଚାଲାଣ ଗାଡ଼ି ଓ ଚାଳକଙ୍କୁ ଗିରଫ କରିବାରେ ସକ୍ଷମ ହୋଇଥିଲା।
ଗୋସେବକଙ୍କ ବାରମ୍ବାର ଅଭିଯୋଗ ଓ ପୁଲିସର ଘନଘନ ଧରପଗଡ ଯୋଗୁଁ ଗୋମାଫିଆଙ୍କ ନିଦ ହଜିଯାଇଥିଲା। ଫଳରେ ହିଞ୍ଜିଳି ଥାନା ଅଞ୍ଚଳରେ ଗୋମାଫିଆଙ୍କ କାରବାର ବନ୍ଦ ହୋଇ ଯାଇଥିଲା। କିନ୍ତୁ ପୂର୍ବଭଳି ଏବେ ଗୋ ଚାଲାଣ ବେଳେ ଆଉ କାହାର ଅଭିଯୋଗ ନାହିଁ କିମ୍ଵା ପୁଲିସ କାର୍ଯ୍ୟନୁଷ୍ଠାନ ବି ଦେଖିବାକୁ ମିଳୁନି। ବାଟଘାଟରେ ଗୋଚାଲାଣ ଗାଡ଼ିକୁ ଅଟକାଇ ପୁଲିସ କାର୍ଯ୍ୟାନୁଷ୍ଠାନ ପାଇଁ ଦାବି କରୁଥିବା ଗୋସେବକଙ୍କ ସ୍ୱର ଏବେ ଧିମା ଗତିରେ ନରମି ଯାଇଛି। ତେଣୁ ପୂର୍ବଭଳି ପୁଲିସ ଆଉ ତତ୍ପରତା ଦେଖାଇ ଗୋଚାଲାଣ କରୁଥିବା ପିକଅପ ଭ୍ୟାନ ଓ ଡ୍ରାଇଭରକୁ ଗିରଫ କରିବାରେ ଅସମର୍ଥ ହୋଇଛି।
ଏପରି ସ୍ଥଳେ ଦିନ ହେଉ କି ରାତି ହେଉ ମାଫିଆ ମାନେ ବ୍ୟାପକ ଭାବେ ଗାଁ ଗଣ୍ଡାରୁ ଗୋଚାଲାଣ କରୁଥିବା ଦେଖା ଯାଇଛି। ଗତ ରବିବାର ରାତି ପ୍ରାୟ ୮ଟା ବେଳେ ହିଞ୍ଜିଳି ଥାନାର କଞ୍ଚୁରୁ ରାସ୍ତାରେ ଓ ମଙ୍ଗଳବାର ସକାଳେ ହିଞ୍ଜିଳି ଥାନାର ୫୯ ନଂ ଜାତୀୟ ରାଜପଥ ଦେଇ ପିକଅପ ଭ୍ୟାନ ଯୋଗେ ପୋଢ଼ ମଇଁଷି ଚାଲାଣ ହେଉଥିବା ଜଣା ପଡ଼ିଛି। କେଉଁ ଅଦୃଶ୍ୟ ସିଣ୍ଡିକେଟ ବଳରେ ଗୋ ମାଫିଆ ବେଶ ସକ୍ରିୟ ହୋଇ ହିଞ୍ଜିଳି ଥାନା ଅଞ୍ଚଳରେ ଏଭଳି ଭାଵେ ବେଧଡକ ଗୋଚାଲାଣ କରିବାରେ ସାହାସ ଜୁଟାଇ ସଫଳ ହେଉଛନ୍ତି, ତାହା ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ତଦନ୍ତ ଓ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦୃଷ୍ଟି ଆକର୍ଷଣ କରାଯାଇଛି।
