ବାଣପୁର (ଓଡିଶା ତାଜା ନ୍ୟୁଜ ) ନି.ପ୍ର :- ତାରିଣୀପୀଠ, ଝିଣ୍ଟିକାପଲ୍ଲୀଠାରେ ବାଣପୁର ଏନଏସି ଅଞ୍ଚଳର ଶତାଧିକ କୃଷକ ବନ୍ଧୁଙ୍କ ଦ୍ୱାରା ଆୟୋଜିତ ଏକ ଆତ୍ମୀୟତାପୂର୍ଣ୍ଣ କାର୍ଯ୍ୟକ୍ରମରେ ସମାଜସେବୀ ତଥା ବାଣପୁର ଏନଏସିର ବିଜେପି ଯୁବ ସଂଗଠକ ଶ୍ରୀ ଦେବୀ ପ୍ରସାଦ ମିଶ୍ରଙ୍କୁ ଅତିଥି ଭାବେ ଆମନ୍ତ୍ରଣ କରାଯାଇଥିଲା । ଶ୍ରୀ ମିଶ୍ର କାର୍ଯ୍ୟକ୍ରମରେ ଯୋଗଦେଇ କୃଷକ ବନ୍ଧୁମାନଙ୍କ ସହ ମତବିନିମୟ କରିଥିଲେ । ଚଳିତ କୃଷି ଋତୁରେ ଉତ୍ତମ ଅମଳ ଓ କୃଷକମାନଙ୍କ ସମୃଦ୍ଧି କାମନା କରି ମା’ଙ୍କ ନିକଟରୁ ଆଜ୍ଞାମାଳ ଆଣିବା ଏହି ଆୟୋଜନର ମୁଖ୍ୟ ଉଦ୍ଦେଶ୍ୟ ଥିଲା ।
ଏହି ଅବସରରେ କୃଷକମାନଙ୍କ ସମସ୍ୟା, ଆଶା ଓ ଆବଶ୍ୟକତା ସମ୍ପର୍କରେ ଶ୍ରୀ ମିଶ୍ର ଆଲୋଚନା କରିଥିଲେ । କୃଷକ ବନ୍ଧୁମାନଙ୍କର ସ୍ନେହ, ଆତ୍ମୀୟତା ଓ ଆତିଥ୍ୟ ପାଇଁ ଶ୍ରୀ ମିଶ୍ର କୃତଜ୍ଞତା ପ୍ରକାଶ କରିବା ସହ କୃଷକ ସମାଜର ସୁଖଦୁଃଖରେ ସର୍ବଦା ସାଥୀ ହୋଇ ରହିବା ଏବଂ ସେମାନଙ୍କ ସମସ୍ୟା ଓ ଆବଶ୍ୟକତାକୁ ଗୁରୁତ୍ୱର ସହ ଉପସ୍ଥାପନ କରିବା ପାଇଁ ସଂକଳ୍ପ ପ୍ରକାଶ କରିଥିଲେ । ମା’ ତାରିଣୀଙ୍କ ଆଶୀର୍ବାଦରେ ଚଳିତ ଋତୁରେ କୃଷକମାନଙ୍କୁ ଉତ୍ତମ ଅମଳ ମିଳିବା ସହିତ ସେମାନଙ୍କ ଜୀବନରେ ସୁଖ, ସମୃଦ୍ଧି ଓ ଉନ୍ନତି ଆସୁ ବୋଲି ଶ୍ରୀ ମିଶ୍ର ମା’ଙ୍କ ନିକଟରେ କାମନା କରିଥିଲେ ।
