ହିଞ୍ଜିଳିକାଟୁ (ଓଡ଼ିଶା ତାଜା ନ୍ୟୁଜ) (ନିପ୍ର) :- ହିଞ୍ଜିଳିକାଟୁ ପୌରାଞ୍ଚଳରେ ଏକ ଅଭାବନୀୟ ଘଟଣା କ୍ରମରେ ତିନିଟି ପରିବାର ତିନି ଜଣ ପୁଅଙ୍କୁ ହରାଇ ମର୍ମାହତ ହୋଇଛନ୍ତି। ଏଭଳି ଏକ ଦୁଃଖଦ ଘଟଣାରେ ହିଞ୍ଜିଳି ବିଧାୟକ ତଥା ଓଡିଶାର ମାନ୍ୟବର ବିରୋଧୀ ଦଳର ନେତା ନବୀନ ପଟ୍ଟନାୟକ ଗଭୀର ଶୋକ ପ୍ରକାଶ କରି ଦିବଙ୍ଗତ ଆତ୍ମାଙ୍କ ସଦଗତି ପ୍ରାପ୍ତି ନିମନ୍ତେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ନିକଟରେ ପ୍ରାର୍ଥନା କରିଛନ୍ତି। ଗଣେଷ ମୂର୍ତ୍ତି ଆଣିବା ପାଇଁ ଡାଲା ଅଟୋରେ ବସି ଯାଉଥିବା ବେଳେ ହିଞ୍ଜିଳିକାଟୁର ଫୁଲ ବ୍ୟବସାୟୀ କାଳିଆ ମୁନୀଙ୍କ ଏକମାତ୍ର ପୁଅ ଚନ୍ଦନ ମୁନୀଙ୍କ ଦୁର୍ଘଟଣା ଘଟି ମୃତ୍ୟୁ ଘଟିଥିଲା ।
ପୁଣି ଗତ କାଲି ଏକ ଘରୋଇ କୋଚିଂ ସେଣ୍ଟରର ଗଣେଷ ମୂର୍ତ୍ତି ଭସାଣି ବେଳେ କୋଚିଂ ସେଣ୍ଟରର ଦୁଇ ଜଣ ଛାତ୍ର ନେତାଜୀ ମାର୍ଗ ବାସିନ୍ଦା କୈଳାସ ସାହୁଙ୍କ ପୁଅ ଆଦର୍ଶ ସାହୁ ଓ ଗାୟତ୍ରୀ ନଗର ବାସିନ୍ଦା ସୁଜୟ ସମେଲୀଙ୍କ ପୁଅ ପ୍ରୀତମ ସାହୁ ଘୋଡାହାଡ ନଦୀ ଗର୍ଭରେ ବୁଡ଼ି ପ୍ରାଣ ହରାଇଥିଲେ। ଏହି ସମ୍ବେଦନଶୀଳ ଘଟଣାରେ ବିରୋଧୀ ଦଳ ନେତା ନବୀନ ପଟ୍ଟନାୟକ ତିନି ପରିବାରକୁ ସହାୟତାର ହାତ ବଢ଼ାଇଛନ୍ତି। ବିରୋଧୀ ଦଳ ନେତାଙ୍କ ନିର୍ଦ୍ଦେଶ କ୍ରମେ ହିଞ୍ଜିଳି ବିଜେଡିର ଏକ ପ୍ରତିନିଧି ମଣ୍ଡଳୀ ମୃତକଙ୍କ ପରିବାରକୁ ଭେଟି ଦଶାହ କାର୍ଯ୍ୟ ପାଇଁ ନବୀନ ବାବୁ ଦେଇଥିବା ୨୦ ହଜାର ଟଙ୍କା ଲେଖାଏଁ ପ୍ରତି ପରିବାରକୁ ସହାୟତା ରାଶି ପ୍ରଦାନ କରିଛନ୍ତି।
ଉକ୍ତ ପ୍ରତିନିଧି ଦଳରେ ବିଜେଡି ରାଜ୍ୟ ମହିଳା ସାଧାରଣ ସମ୍ପାଦିକା, ବିଜେଡି ଶ୍ରମିକ ସାମ୍ମୁଖ୍ୟର ରାଜ୍ୟ ଉପାଧ୍ୟକ୍ଷା ରଞ୍ଜିତା ସାହୁ, ବିରୋଧୀ ଦଳ ନେତାଙ୍କ ଜିଲ୍ଲା ପରିଷଦ ପ୍ରତିନିଧି ଦେବାନନ୍ଦ ମହାପାତ୍ର, ନଗର ସଭାପତି ହୃଦୟାନନ୍ଦ ମହାପାତ୍ର, ପୌର ପରିଷଦ ଅଧ୍ୟକ୍ଷ ସୁବାସ ଚନ୍ଦ୍ର ପୋଲେଇ,ପୌର ପ୍ରତିନିଧି ପ୍ୟାରୀ ମୋହନ ପାଢ଼ୀ, କାଉନସିଲର ବିଭୁ ପ୍ରସାଦ ପଣ୍ଡା, ଶ୍ୟାମଘନ ବେହେରା, କୃଷ୍ଣ ଚନ୍ଦ୍ର ସାହୁ, କିରଣ ପଟ୍ଟନାୟକ, ସତ୍ୟବ୍ରତ ପଟ୍ଟନାୟକ ଓ ଛାତ୍ର ନେତା କେଶବ ମହାରଣା ପ୍ରମୁଖ ସାମିଲ ହୋଇଥିଲେ । ଏଥି ସହିତ ଅନ୍ୟାନ୍ୟ ସରକାରୀ ସହାୟତା ଯୋଗାଇ ଦେବା ପାଇଁ ବିଜେଡି ସମସ୍ତ ପ୍ରକାର ପ୍ରୟାସ କରିବ ବୋଲି ଟିମ ଶୋକ ସନ୍ତପ୍ତ ପରିବାରକୁ ପ୍ରତିଶ୍ରୁତି ଦେଇଥିଲେ।
