ମାଲକାନଗିରି (ଓଡିଶା ତାଜା ନ୍ୟୁଜ ) ନି. ପ୍ର :- ମାଲକାନଗିରି ଜିଲ୍ଲା ପଡିଆ ବ୍ଲକ ଅନ୍ତର୍ଗତ ଏମଭି-୫୮ ଗ୍ରାମ ଖେଳ ପଡିଆରେ ଜୟ ମା’ ବାସନ୍ତୀ ଜିଲ୍ଲାସ୍ତରୀୟ ଫୁଟବଲ ଟୁର୍ଣ୍ଣାମେଣ୍ଟର ଦ୍ଵିତୀୟ ଦିନରେ ଆଜି ଉତ୍ସାହର ସହ ପ୍ରବଳ ଦର୍ଶକ ଙ୍କ ଭିଡ଼ ଜମିଥିବା ଦେଖିବାକୁ ମିଳିଥିଲା । ଆଜିର ମ୍ୟାଚ୍ରେ ପଡିଆ ଫୁଟବଲ କ୍ଳବ ଏବଂ ଗଣ୍ଡୱାନା ଫୁଟବଲ କ୍ଳବ ପରସ୍ପର କୁ ଭେଟିଥିଲେ। ପଡିଆ ଫୁଟବଲ କ୍ଳବକୁ ୨-୧ରେ ପରାସ୍ତ କରି ଗଣ୍ଡୱାନା ଫୁଟବଲ କ୍ଳବ ବିଜୟ ହାସଲ କରିଥିଲା । ଆଜିର ଟୁର୍ଣ୍ଣାମେଣ୍ଟରେ ମୁଖ୍ୟ ଅତିଥି ଭାବେ ଜିଲ୍ଲା ଉତ୍କଳ ସାମ୍ବାଦିକ ସଙ୍ଘ ସଭାପତି ଅଶୋକ ମିଶ୍ର ଯୋଗ ଦେଇଥିଲେ ।
ଏଥିସମେତ ଉତ୍କଳ ସାମ୍ବାଦିକ ସଙ୍ଘ ସମ୍ପାଦକ ବି ଶ୍ରୀନିବାସ ପାତ୍ର, ମାଟେରୁ ସରପଞ୍ଚ ଲକ୍ଷ୍ମଣ ମାଡକାମୀ, ସାମ୍ବାଦିକ ସୁଧାଂଶୁ ଶେଖର ମହାନ୍ତି ଏବଂ ସାମ୍ବାଦିକ ସୌରଭ ମଣ୍ଡଳ ପ୍ରମୁଖ ମଞ୍ଚାସୀନ ରହି ଖେଳାଳିମାନଙ୍କୁ ଉତ୍ସାହିତ କରିଥିଲେ । ଗ୍ରାମ କମିଟି ମୁଖ୍ୟ ମୋହନ ମଣ୍ଡଳ, ଗୌରପଦ ବିଶ୍ୱାସ, ମନିମହନ ମଣ୍ଡଳ, ହରିହର ଗାଇନ, କାର୍ତ୍ତିକ ରାୟ ପ୍ରମୁଖ ଉପସ୍ଥିତ ରହି ଏହି ଟୁର୍ଣ୍ଣାମେଣ୍ଟ ପରିଚାଳନା କରିଥିଲେ ।
ଉପସ୍ଥିତ ଅତିଥିମାନେ ଖେଳାଳିମାନଙ୍କୁ ଶୁଭେଚ୍ଛା ଜଣାଇବା ସହ ଯୁବପିଢ଼ିଙ୍କ ମଧ୍ୟରେ କ୍ରୀଡ଼ା ମନୋଭାବ, ଶୃଙ୍ଖଳା ଓ ଭାଇଚାରା ବୃଦ୍ଧିରେ ଏଭଳି ଆୟୋଜନର ଗୁରୁତ୍ୱ ଉପରେ ମତବ୍ୟକ୍ତ କରିଥିଲେ । ଟୁର୍ଣ୍ଣାମେଣ୍ଟକୁ ନେଇ ଏମଭି-୫୮ ସମେତ ଏହାର ଆଖପାଖ ଅଞ୍ଚଳର ଶହ ଶହ କ୍ରୀଡ଼ାପ୍ରେମୀ ବେଶ୍ ଉତ୍ସାହ ର ସହ କ୍ରୀଡା ର ମଜା ନେଇଥିଲେ ।
