ନୟାଗଡ଼ (ଓଡିଶା ତାଜାନ୍ୟୁଜ ) ନି. ପ୍ର :- ନୟାଗଡ଼ ସ୍ବୟଂ ଶାସିତ ମହାବିଦ୍ୟାଳୟର ଶିକ୍ଷାଦାନ ସମୟ ସକାଳ ସାତଟାରୁ ଆରମ୍ଭ କରିବା ଏବଂ ପୂର୍ବାହ୍ନ ଭିତରେ ପ୍ରାୟ ସମସ୍ତ କ୍ଲାସ୍ ଶେଷକରି ଅପରାହ୍ନ ସମୟ ଫାଙ୍କାରଖିବା ପଛରେ ଯେଉଁ ଦୁରଭିସନ୍ଧି କାମକରୁଛି, ତାହା ସୁସ୍ଥ ଶିକ୍ଷାଦାନ ପ୍ରକ୍ରିୟାର ପରିପନ୍ଥୀ ବୋଲି ବିଶିଷ୍ଟ ବାମପନ୍ଥୀ ନେତା ତଥା ପୂର୍ବତନ ଛାତ୍ର ନେତା ବିଶ୍ଵନାଥ ମହାପାତ୍ର କ୍ଷୋଭ ପ୍ରକାଶ କରିଛନ୍ତି ! କଲେଜରେ ଆବଶ୍ୟକୀୟ ଶ୍ରେଣୀଗୃହର ଅଭାବ ନଥିଲା ବେଳେ ସକାଳ ନଅଟା ପରେ କ୍ଲାସ୍ ଆରମ୍ଭ କରି ଅପରାହ୍ନ ଚାରିଟା ପର୍ଯ୍ୟନ୍ତ ଚଳେଇଲେ ଆଖପାଖ ଓ ଦୂର ଦୂରାନ୍ତରୁ ଛାଟିପିଟି ହୋଇ ଦୌଡ଼ୁଥିବା ଛାତ୍ର ଛାତ୍ରୀ ମାନେ ହଟହଟାରୁ ରକ୍ଷା ପାଇପାରନ୍ତେ ।
ଘରୋଇ ଶିକ୍ଷାନୁଷ୍ଠାନ ଗୁଡିକୁ ସହଯୋଗ କରିବା ପାଇଁ ତଥା ଘରୋଇ କୋଚିଂ ବ୍ୟବସ୍ଥା ସହିତ ସଂପୃକ୍ତ ଶିକ୍ଷକ ଓ ଶିକ୍ଷାର୍ଥୀଙ୍କୁ ସୁବିଧା ଦେବାପାଇଁ ବିଧିସମ୍ମତ୍ତ ସମୟ ନିର୍ଘଣ୍ଟକୁ ବିଶୃଙ୍ଖଳିତ କରିବା ଦ୍ୱାରା ପରୋକ୍ଷରେ ଶିକ୍ଷାର ଘରୋଇକରଣକୁ ଉତ୍ସାହିତ କରାଯାଇ ସରକାରୀ ଶିକ୍ଷାନୁଷ୍ଠାନଗୁଡ଼ିକୁ ନ୍ୟୁନ କରାଯାଉଛି ବୋଲି ଶ୍ରୀ ମହାପାତ୍ର ଅଭିଯୋଗ କରିଛନ୍ତି ! ନୟାଗଡ଼ ମହାବିଦ୍ୟାଳୟ ସମସ୍ତ ଶୈକ୍ଷିକ ଭିତ୍ତିଭୂମି ସୁଦୃଢ ଥିବା ଏକ ପ୍ରମୁଖ ଶିକ୍ଷାନୁଷ୍ଠାନ ଓଡିଣାରେ । ଏହାର ଶ୍ରେଣୀ ଶିକ୍ଷାଦାନକୁ ଲଘୁକରି କୋଚିଂ ବ୍ୟବସ୍ଥାକୁ ଗୁରୁତ୍ଵ ଦେଲେ ସ୍ଵଚ୍ଛଳ ବର୍ଗର ପିଲାମାନେ କିଛି ଲାଭବାନ ହୋଇପାରନ୍ତି,
ଉତ୍ତୀର୍ଣ୍ଣ ଫଳାଫଳରେ କିଛି ରେକର୍ଡ ସୃଷ୍ଟି କରିପାରନ୍ତି ! ମାତ୍ର ସାଧାରଣ ବର୍ଗର ପିଲାମାନେ ଏହାଦ୍ବାରା କ୍ଷତିଗ୍ରସ୍ତ ହେଉଛନ୍ତି, ଏହା ପରିଚାଳନା ପରିଷଦ ବିଚାର କରିବା ଦରକାର ! ଯେଉଁ ଶିକ୍ଷକ ଓ ଶିକ୍ଷାକର୍ମୀମାନେ ଆର୍ଥିକ ଅବିଚାରର ସମ୍ମୁଖୀନ ହେଉଛନ୍ତି ବେତନରେ, ସେମାନଙ୍କୁ ନ୍ୟାୟସଙ୍ଗତ ପ୍ରାପ୍ୟ ଦେବାକୁ ହେବ ! ବାୟୋମେଟ୍ରିକ୍ ଉପସ୍ଥାନ ପାଠଦାନ ନିଶ୍ଚୟତାର ଏକମାତ୍ର ମାପକାଠି ନୁହେଁ ! ନୟାଗଡ଼ କଲେଜ ଭଳି ଏକ ଖ୍ୟାତି ସଂପନ୍ନ ଶିକ୍ଷାନୁଷ୍ଠାନର ମାନବୃଦ୍ଧି ପାଇଁ ଶିକ୍ଷା ନିର୍ଘଣ୍ଟର ସଂଶୋଧନ ସହିତ ଶ୍ରେଣୀଶିକ୍ଷାର ବାସ୍ତବବାଦୀ ତତ୍ତ୍ଵାବଧାନରେ କଡାକଡି କରିବାର ଆବଶ୍ୟକତା ରହିଛି ବୋଲି ଶ୍ରୀ ମହାପାତ୍ର ପ୍ରକାଶ କରିଛନ୍ତି ।
