ଭୁବନେଶ୍ୱର (ଓଡିଶା ତାଜାନ୍ୟୁଜ ) ନି. ପ୍ର :- ମଦର୍ସ ପବ୍ଲିକ ସ୍କୁଲ୍, ପାହାଳ, ଏସବି୧ ଗ୍ରୁପ୍ ଅଫ୍ କମ୍ପାନିଜ୍ ସହଭାଗିତାରେ ଆଜି ନୂତନ ଅତ୍ୟାଧୁନିକ ସ୍ପୋର୍ଟସ୍ ହବ୍କୁ ଆନୁଷ୍ଠାନିକ ଭାବେ ଉଦ୍ଘାଟନ କରାଯାଇଛି, ଯାହା ସାରା ରାଜ୍ୟରେ ବିଦ୍ୟାଳୟ ସ୍ତରୀୟ କ୍ରୀଡ଼ା ଭିତ୍ତିଭୂମି ପାଇଁ ଏକ ନୂଆ ମାନଦଣ୍ଡ ସ୍ଥାପନ କରିଛି । ଏସବି୧ ଗ୍ରୁପ୍ ଅଫ୍ କମ୍ପାନିଜ୍ର ଅଧ୍ୟକ୍ଷା ଶ୍ରୀମତୀ ବୈଜୟନ୍ତୀ ସାହୁ ଏବଂ ମଦର୍ସ ଗ୍ରୁପ୍ ଅଫ୍ ସ୍କୁଲ୍ସର ପ୍ରମୁଖ ନେତୃବୃନ୍ଦ, ଯଥା ଅଧ୍ୟକ୍ଷା ଶ୍ରୀମତୀ ପଲି ପଟ୍ଟନାୟକ, ନିର୍ଦ୍ଦେଶକ ଶ୍ରୀ ଶ୍ରୀଜିତ୍ ପଟ୍ଟନାୟକ, ପରିଚାଳନା ନିର୍ଦ୍ଦେଶିକା ସୁଶ୍ରୀ ମିନତି ସାବତ, ଅଧ୍ୟକ୍ଷା ସୁଶ୍ରୀ ଚିତ୍ରା ଅଜୟ, ମଦର୍ସ ଗ୍ରୁପ୍ ଅଫ୍ ସ୍କୁଲ୍ସର ସହ-ପ୍ରତିଷ୍ଠାତା ଶ୍ରୀ ନବରଞ୍ଜନ ପଟ୍ଟନାୟକ ଏବଂ ମଦର୍ସ ଗ୍ରୁପ୍ ଅଫ୍ ସ୍କୁଲ୍ସର ପରିଚାଳନା ନିର୍ଦ୍ଦେଶିକା ସୁଶ୍ରୀ ଋତୁପର୍ଣ୍ଣା ପଟ୍ଟନାୟକଙ୍କ ଉପସ୍ଥିତିରେ ଏହି କ୍ରୀଡ଼ା କମ୍ପ୍ଲେକ୍ସର ଆନୁଷ୍ଠାନିକ ଉଦ୍ଘାଟନ ହୋଇଥିଲା ।
ଏହି ଅବସରରେ ଓଡ଼ିଶା ସରକାରଙ୍କ ଆଇନ, ପୂର୍ତ୍ତ ଏବଂ ଅବକାରୀ ମନ୍ତ୍ରୀ ଶ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି ଯେ, “ଶିକ୍ଷା କେବଳ ପାରମ୍ପରିକ ପାଠ୍ୟକ୍ରମ ମଧ୍ୟରେ ସୀମିତ ରହିବା ଉଚିତ ନୁହେଁ । ବିଶେଷ କରି କ୍ରୀଡ଼ା ଏବଂ ସଂସ୍କୃତି ଭଳି ପାଠ୍ୟକ୍ରମ ବହିର୍ଭୂତ କାର୍ଯ୍ୟକଳାପ ପାଇଁ ସ୍କୁଲଗୁଡ଼ିକ ଏକ ସକ୍ରିୟ ମଞ୍ଚ ଯୋଗାଇଦେବା ଆବଶ୍ୟକ । ମୁଁ ନିଶ୍ଚିତ ଯେ ଏହି ନୂତନ ସ୍ପୋର୍ଟସ୍ ହବ୍ ସୁବିଧା ଛାତ୍ରଛାତ୍ରୀମାନଙ୍କୁ ସେମାନଙ୍କର କ୍ରୀଡ଼ା ଲକ୍ଷ୍ୟ ପୂରଣ କରିବାରେ ଏବଂ ଆଗକୁ ବଢ଼ିବାରେ ସାହାଯ୍ୟ କରିବ, ଏବଂ ମଦର୍ସ ପବ୍ଲିକ ସ୍କୁଲ୍ ଏହି ଦିଗରେ ନିରନ୍ତର ପ୍ରଶଂସନୀୟ ତଥା ଅଗ୍ରଣୀ ପଦକ୍ଷେପ ଗ୍ରହଣ କରୁଛି ।”
ଏହି ଭବ୍ୟ ଉଦ୍ଘାଟନ ଅବସରରେ ଅନୁଷ୍ଠାନ ପକ୍ଷରୁ ଫୁଟବଲ୍, ଚେସ୍, ପିକଲ୍ବଲ୍, ଟେନିସ୍ ଏବଂ ସନ୍ତରଣକୁ ନେଇ ଏକ ବ୍ୟାପକ ଦୁଇ ଦିନିଆ ପ୍ରତିଯୋଗିତା ଆୟୋଜନ କରାଯାଇଥିଲା, ଯେଉଁଥିରେ ସାରା ଓଡ଼ିଶାରୁ ୧,୦୦୦ ରୁ ଅଧିକ ଛାତ୍ର-ଖେଳାଳି ଭାଗ ନେଇଥିଲେ। ଏହି କାର୍ଯ୍ୟକ୍ରମ ଏକ ଆକର୍ଷଣୀୟ ଉଦ୍ଯାପନୀ ତଥା ସମ୍ବର୍ଦ୍ଧନା ଉତ୍ସବ ସହିତ ସମାପ୍ତ ହୋଇଥିଲା, ଯେଉଁଥିରେ ମାନ୍ୟବର ଆଇନ ମନ୍ତ୍ରୀ ଶ୍ରୀ ପୃଥ୍ୱୀରାଜ ହରିଚନ୍ଦନ, ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଶ୍ରୀ ଜଗନ୍ନାଥ ପ୍ରଧାନ ଏବଂ ଏସ୍ଆର୍ବି ଆଣ୍ଡ ଆସୋସିଏଟ୍ସର ଅଂଶୀଦାର ଶ୍ରୀ ରାଜୀବ ଶେଖର ସାହୁଙ୍କ ସମେତ ଅନେକ ବିଶିଷ୍ଟ ଅତିଥି ଯୋଗ ଦେଇଥିଲେ।
ଏହି ପଦକ୍ଷେପ ପଛରେ ଥିବା ଲକ୍ଷ୍ୟ ଉପରେ ଆଲୋକପାତ କରି ଶ୍ରୀମତୀ ବୈଜୟନ୍ତୀ ସାହୁ ପାରମ୍ପରିକ ପାଠପଢ଼ା ବାହାରେ ଚରିତ୍ର ଗଠନ, ଧୈର୍ଯ୍ୟ ଏବଂ ନେତୃତ୍ୱର ବିକାଶ କରୁଥିବା ଭିତ୍ତିଭୂମିରେ ନିବେଶ କରିଥିବାରୁ ସ୍କୁଲକୁ ପ୍ରଶଂସା କରିଥିଲେ, ଯାହା ସ୍ଥାନୀୟ ପ୍ରତିଭାମାନଙ୍କୁ ଜାତୀୟ ତଥା ଅନ୍ତର୍ଜାତୀୟ ସ୍ତରରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ଏକ ଉପଯୁକ୍ତ ମଞ୍ଚ ପ୍ରଦାନ କରିବ। ଅନୁଷ୍ଠାନର ସର୍ବାଙ୍ଗୀନ ବିକାଶର ମୂଳ ଲକ୍ଷ୍ୟ ଉପରେ ଗୁରୁତ୍ୱ ଦେଇ ଶ୍ରୀମତୀ ପଲି ପଟ୍ଟନାୟକ କହିଥିଲେ ଯେ, ଏହି ନୂତନ ସୁବିଧା ଛାତ୍ରଛାତ୍ରୀମାନଙ୍କୁ ବିଶ୍ୱସ୍ତରୀୟ କ୍ରୀଡ଼ା ସୁଯୋଗ ଯୋଗାଇଦେବା ଏବଂ ସେମାନଙ୍କ ମଧ୍ୟରେ ଶୃଙ୍ଖଳା ତଥା ଦଳଗତ ମନୋଭାବର ମୂଲ୍ୟବୋଧ ଗଢ଼ିତୋଳିବା ପାଇଁ ସ୍କୁଲର ସଂକଳ୍ପକୁ ଆହୁରି ସୁଦୃଢ଼ କରୁଛି । ଏହା ଆମ ଛାତ୍ରଛାତ୍ରୀମାନଙ୍କୁ ସର୍ବାଙ୍ଗୀନ ଶିକ୍ଷା ପ୍ରଦାନ କରିବା ପାଇଁ ଆମର ପ୍ରତିବଦ୍ଧତାକୁ ସ୍ପଷ୍ଟ କରୁଛି ।
ଏହି ବିଶ୍ୱସ୍ତରୀୟ ସ୍ପୋର୍ଟସ୍ କମ୍ପ୍ଲେକ୍ସ ଏହି ଅଞ୍ଚଳର ଶିକ୍ଷାନୁଷ୍ଠାନ କ୍ଷେତ୍ରରେ ଅନେକ ନୂତନ ସୁବିଧା ଆରମ୍ଭ କରିଛି, ଯେଉଁଥିରେ ଓଡ଼ିଶାର ପ୍ରଥମ ସ୍କୁଲ-ସ୍ତରୀୟ ସ୍ୱତନ୍ତ୍ର ଗଲ୍ଫ ପ୍ରଶିକ୍ଷଣ ବ୍ୟବସ୍ଥା ଏବଂ ବିଶ୍ୱବ୍ୟାପୀ ଲୋକପ୍ରିୟ ହେଉଥିବା ପିକଲ୍ବଲ୍ ଖେଳ ସହିତ ପିଲାମାନଙ୍କୁ ପରିଚିତ କରାଇବା ପାଇଁ ଚାରୋଟି ନିୟମାନୁଯାୟୀ ପିକଲ୍ବଲ୍ କୋର୍ଟ ଅନ୍ତର୍ଭୁକ୍ତ । ଏହି ସ୍ୱତନ୍ତ୍ର ସୁବିଧାଗୁଡ଼ିକ ସହିତ ଏକ ସୁଇମିଂ ପୁଲ୍, ଫୁଟବଲ୍ ପଡ଼ିଆ, ଟେନିସ୍ କୋର୍ଟ, ବାସ୍କେଟବଲ୍ କୋର୍ଟ, ଇନଡୋର୍ ବ୍ୟାଡମିଣ୍ଟନ କୋର୍ଟ ଏବଂ ପ୍ରଫେସନାଲ୍ କ୍ରିକେଟ୍ ଅଭ୍ୟାସ ନେଟ୍ ଭଳି ସମ୍ପୂର୍ଣ୍ଣ କ୍ରୀଡ଼ା ସୁବିଧା ରହିଛି, ଯାହା ବୃତ୍ତିଗତ ମାନଦଣ୍ଡ ଅନୁଯାୟୀ ସାମଗ୍ରିକ ଶାରୀରିକ ଶିକ୍ଷା ପ୍ରଦାନ କରିବା ପାଇଁ ଡିଜାଇନ୍ କରାଯାଇଛି ।
