ବାଲିପାଟଣା (ଓଡିଶା ତାଜାନ୍ୟୁଜ ) ନି. ପ୍ର :- ଖୋର୍ଦ୍ଧା ଜିଲ୍ଲା,ବାଲିପାଟଣା ବ୍ଲକ ଅନ୍ତର୍ଗତ ବିଭିନ୍ନ ଅନୁଷ୍ଠାନ ପକ୍ଷରୁ ୮୦ ତମ ସ୍ୱାଧୀନତା ଦିବସ ପାଳିତ ହୋଇଯାଇଛି । ବନମାଳୀପୁର ସ୍ଥିତ ଆଦର୍ଶ ଶିଶୁ ନିକେତନ ବିଦ୍ୟାଳୟ ପକ୍ଷରୁ ଆଜି ବିଦ୍ୟାଳୟର ଛାତ୍ର ଛାତ୍ରୀଙ୍କ ଦ୍ବାରା ପ୍ରଭାତ ଫେରି, ସ୍ବାଗତ ସଙ୍ଗୀତ ଗାନ କରାଯିବା ସହ ସ୍ୱାଧୀନତା ଦିବସ ଉପରେ ଭାଷଣ ଦିଆଯାଇଥିଲା । ଏହି କାର୍ଯ୍ୟକ୍ରମରେ ବିଦ୍ୟାଳୟର ଅଧ୍ୟକ୍ଷା ଶୈଳବାଳା ମେକାପ ପତାକା ଉତ୍ତୋଳନ କରିଥିବାବେଳେ ଏଥିରେ ମୁଖ୍ୟ ଅତିଥି ଭାବେ ଅବସର ପ୍ରାପ୍ତ କ୍ରୀଡା ଶିକ୍ଷକ ଶିବ ଚରଣ ସାହୁ,
ସମ୍ମାନୀତ ଅତିଥିଭାବେ ସଭାପତି ଦଇତାରୀ ମାଣିକ, ସଂପାଦକ ସୁରେନ୍ଦ୍ର ନାଥ ସାହୁ, ପ୍ରମୁଖ ଯୋଗ ଦେଇ ସ୍ୱାଧୀନତା ଦିବସ ଉପରେ ନିଜ ନିଜର ବକ୍ତବ୍ୟ ପ୍ରଦାନ କରିଥିଲେ । ଏହି ଉତ୍ସବରେ ବିଦ୍ୟାଳୟ ପରିଚାଳନା କମିଟିର ସଭ୍ୟ ବିଜୟ ବେହେରା, ପ୍ରଦୀପ କୁମାର ପାତ୍ର, ଟୁଲୁ ସାହୁ, ଉମେଶ ଚନ୍ଦ୍ର ସାହୁଙ୍କ ସମେତ ବିଦ୍ୟାଳୟର ସମସ୍ତ ଶିକ୍ଷକ, ଓ ଶିକ୍ଷୟିତ୍ରୀମାନେ ଉପସ୍ଥିତ ରହିଥିଲେ ।
ସେହିପରି ଏହି ବ୍ଲକର କୁରଞ୍ଜିପୁର ଗ୍ରାମପଞ୍ଚାୟତ ଅନ୍ତର୍ଗତ ସୋଧୁଅ ଠାରେ ଥିବା ବୀଣାପାଣି ଶିଶୁ ବିଦ୍ୟା ନିକେତନ ପକ୍ଷରୁ ମଧ୍ଯ ସ୍ବାଧୀନତା ଦିବସ ପାଳିତ ହୋଇଯାଇଛି। ଏହି ୮୦ ତମ ସ୍ବାଧିନତା ଦିବସ ପାଳନ କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ ତ୍ରୟମାସିକ “କୃପାନେତ୍ର”ର ସଂପାଦକ ରବୀନ୍ଦ୍ର ନାଥ ପାତ୍ର ଯୋଗ ଦେଇ ପତାକା ଉତ୍ତୋଳନ କରିଥିବାବେଳେ ଅନୁଷ୍ଠାନର ଅଧ୍ୟକ୍ଷ ବିଭୂତି ଭୂଷଣ ମହାନ୍ତି ଏବଂ
ସମାଜ ସେବୀ ଭାଗିରଥି ସାହୁ ପ୍ରମୁଖ ଯୋଗ ଦେଇ ସ୍ବାଧୀନତା ଦିବସ ପାଳନ ଉପରେ ନିଜ ନିଜର ବକ୍ତବ୍ୟ ପ୍ରଦାନ କରିଥିଲେ । ବୀଣାପାଣି ଶିଶୁ ବିଦ୍ୟା ନିକେତନର ପିଲାମାନଙ୍କ ଦ୍ବାରା ପ୍ରଭାତ ଫେରି, ସ୍ବାଗତ ସଙ୍ଗୀତ ଗାନ କରାଯାଇଥିଲା । ଏହି ଉତ୍ସବରେ ଶିକ୍ଷୟିତ୍ରୀ ବିଜୟ ଲକ୍ଷ୍ମୀ ବେହେରା,ମନୋସ୍ମିନି ପଢ଼ିହାରି, ଅନୁପମା ନାୟକ ପ୍ରମୁଖ ଯୋଗଦେଇଥିଲେ ।
