ନୟାଗଡ଼ (ଓଡ଼ିଶା ତାଜା ନ୍ୟୁଜ) (ନିପ୍ର) :- ନୟାଗଡ଼ ଜିଲ୍ଲା କାର୍ଯ୍ୟାଳୟର ସଦଭାବନା ସଭା ଗୃହରେ ଜିଲ୍ଲା ସମାଜ ମଙ୍ଗଳ ବିଭାଗ (DSWO Section) ପକ୍ଷରୁ ଯୌତୁକ ନିଷେଧ ଅଧିନିୟମ-୧୯୬୧ ସମ୍ବନ୍ଧୀୟ ଏକ ଜିଲ୍ଲାସ୍ତରୀୟ ତାଲିମ ଶିବିର ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମ ନୟାଗଡ଼ ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟ ଶ୍ରୀମତୀ ମଧୁମିତା ରଥଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା । କାର୍ଯ୍ୟକ୍ରମରେ ଜିଲ୍ଲାର ବିଭିନ୍ନ ପ୍ରଶାସନିକ ଓ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ। ପ୍ରମୁଖ ଅତିଥିମାନଙ୍କ ମଧ୍ୟରେ ଅତିରିକ୍ତ ଜିଲ୍ଲାପାଳ ଶ୍ରୀମତୀ ରୋଜିନା ଦାସ, CDO-cum-EO ଶ୍ରୀ ଲଗ୍ନଜିତ ରାଉତ,
ଉପଜିଲ୍ଲାପାଳ ଶ୍ରୀ କର୍ଣ୍ଣାଦେବ ସମାଦାର, DLSA ସଚିବ ଶ୍ରୀମତୀ ଅଞ୍ଜଳୀ ମଛକୁନ୍ଦ, ଡେପୁଟି କଲେକ୍ଟର ଶ୍ରୀମତୀ ତପ୍ତି ରାଜ, DSWO ଶ୍ରୀମତୀ ଜୟଶ୍ରୀ ପଟନାୟକ, PO-cum-PO ଶ୍ରୀମତୀ ସଞ୍ଜୁଲତା ପାଣିଗ୍ରାହୀ ଓ ଜିଲ୍ଲା ହବ୍ ଫର୍ ଏମ୍ପାୱରମେଣ୍ଟ ଅଫ୍ ଉଇମେନ୍ (DHEW) ର ଜିଲ୍ଲା ସଂଯୋଜକ ଶ୍ରୀ ସୌମ୍ୟ ରଞ୍ଜନ ଦାଶ ଉପସ୍ଥିତ ଥିଲେ।ତାଲିମ ଶିବିରରେ ଜିଲ୍ଲାର ସମସ୍ତ CDPO, LS, DSO, DPO, DSSO ଓ ଅନ୍ୟାନ୍ୟ ବିଭାଗୀୟ ଅଧିକାରୀମାନଙ୍କ ସମେତ ପ୍ରାୟ ୬୦ ଜଣ ଅଂଶଗ୍ରହଣକାରୀ ଯୋଗଦେଇଥିଲେ ।
ଯୌତୁକ ନିଷେଧ ଅଧିନିୟମର ବିଭିନ୍ନ ସଂଶୋଧନ, ଆଇନଗତ ବ୍ୟବସ୍ଥା, ଅଭିଯୋଗ ପଞ୍ଜୀକରଣ, ମହିଳା ସୁରକ୍ଷା, ସଚେତନତା ସୃଷ୍ଟି ଓ ଯୌତୁକ ପ୍ରଥା ନିରାକରଣରେ ପ୍ରଶାସନର ଭୂମିକା ଉପରେ ବିସ୍ତୃତ ଆଲୋଚନା ହୋଇଥିଲା । ଜିଲ୍ଲାପାଳ ଶ୍ରୀମତୀ ମଧୁମିତା ରଥ ତାଙ୍କ ଉଦ୍ବୋଧନରେ ଯୌତୁକ ପ୍ରଥାକୁ ସମାଜ ପାଇଁ ଏକ ଅଭିଶାପ ବୋଲି ଉଲ୍ଲେଖ କରି
ଏହାର ସମୂଳ ନିରାକରଣ ପାଇଁ ସମସ୍ତ ବିଭାଗକୁ ସମନ୍ୱିତ ଭାବେ କାମ କରିବାକୁ ଆହ୍ୱାନ ଜଣାଇଥିଲେ । ସେ କହିଥିଲେ ଯେ ଆଇନ ସହିତ ସଚେତନତା ଓ ସାମାଜିକ ଭାଗୀଦାରି ମାଧ୍ୟମରେ ମାତ୍ର ଯୌତୁକମୁକ୍ତ ସମାଜ ଗଠନ ସମ୍ଭବ । ଶେଷରେ DSWO ବିଭାଗ ପକ୍ଷରୁ ସମସ୍ତ ଅତିଥି ଓ ଅଂଶଗ୍ରହଣକାରୀଙ୍କୁ ଧନ୍ୟବାଦ ଜଣାଯାଇଥିଲା। ତାଲିମ ଶିବିରଟି ସଫଳତାର ସହିତ ସମାପ୍ତ ହୋଇଥିବା ବିଭାଗ ପକ୍ଷରୁ ସୂଚନା ଦିଆଯାଇଛି ।
